Ez 20
20
Watx'c'ulal Dios c'al tenomtakilal Israel
1A yet lajoneb c'u waay yet is so' xajaw, yet is suk abilxa ayon ec' yin presoal, ay tzet max yochej juntzan yicham winakil conob Israel max k'anlej bay Jehová, xan max ay chotan eb in satak. 2Max k'anjab Jehová ayin, max yalon axca ti': 3Ach anima, al bay eb yicham winakilal conob Israel: Axca ti' yalon Jehová Cham Yajaw: ¿Tom chex jay ayin yin ul e k'anlen e yabej? Wal yel ayin chi wala' tol man ok in tak'wok ayex, ẍi Jehová, cachi. 4Beyc'ulnej el ach ti'. Chi cam wal ak'on yojtaknej el eb tzet yetal tol yajbejtak max yun eb e yichmam. 5Al bay eb tol ayin chi wal juntzan ti': A yet max in sic'on el eb e yichmam tu', max wak' in ti' bay eb, cax max in tx'oxon in ba bay eb bay Egipto. A bay tu' max wak' in ti' bay eb, max waloni: Ayin ton Jehová e Diosal in. 6A yet jun tiempoal tu' max wak' in ti' wion eltek eb bay Egipto, cax max wiontok eb bay jun tx'otx' tol ayin wal max in saya', a ton bay jun tx'otx' caw wal yax sat, a ton jun tx'otx' yelxac'al watx' yintak masanil tx'otx' tx'otx'. 7Max wal bay eb masanil tol junjunc'al chi yak' lajwok juntzan is diosal tol yajbejtak tu', c'am c'apax chi yetnejtok ba eb yetok is diosal eb aj Egipto, yujtol ayin Jehová e Diosal in.
8Palta max yutc'al ba eb yin tenomtakilal ayin. Maj yal c'ul eb max cha yab eb tzet max wala'. Majc'al yak' lajwok eb is diosal tol yajbejtak tu', tamwal max bekcan eb juntzan is diosal eb aj Egipto. Yuj wal tu' max in na tol yowalil ok wiel yowal in c'ul yetok yailal yin eb bay Egipto tu'. 9Palta yujtol caw wal miman in binaji, xan maj wut axca tu'; yujtol ta max wunej, caw wal yob mi max yal juntzan nación bay cajan ec' eb tu' win. Yujtol satak wal eb tu' max wak'on in ti' wion eltek eb bay Egipto. 10Max wieltek eb bay Egipto xin, max wioncantok eb bay takin tx'otx'. 11A bay tu' max wak' yojtaknej el eb in ley c'al in chekbanil, tol a yuj chi beybalnej eb in ley tu', xan chi yi eb is k'inal. 12Max wak'on beybalnej eb jun c'ual xewilal tol wet yayji ocok, yuj yoccan yechelok trato max wak' yetok eb, c'al yuj naontek eb tol ayin Jehová in ti' max in sic'can el eb. 13Palta max yutc'al ba eb yin tenomtakilal ayin bay takin tx'otx' tu', maj yikej eb in ley, max yintaknen el eb in chekbanil max wak' bay eb, yet watx' ayc'al is k'inal eb yuj. Ac'ala' jun c'ual xewilal tol wet yayji ocok, junelnej maj yikej eb. Yuj wal tu' max in na wion el yowal in c'ul yin eb bay takin tx'otx' tu'. A bay tu' max wak'xac'al lajwok eb yin junelnej waloni. 14Palta yujtol caw wal miman in binaji, xan maj wunej, yet watx' man yobok chin can satak juntzan nacionlak max ilon wion eltek eb bay Egipto.
15Yetok c'apaxok a bay takin tx'otx' tu' max wak' in ti' tol man ok octok eb bay jun tx'otx' max wak' in ti' wak'on bay eb tu', a ton jun tx'otx' manxa watx'ilok yintak masanil, bay caw wal yax sat, 16yujtol max yintaknej el eb in chekbanil, maj yikej eb in ley, maj yikej eb jun c'ual xewilal tol wet yayji ocok, yujtol asan yin juntzan comon dios ayoc is nabal eb. 17Palta xin, maxto wal cusoc in c'ul yin eb, xan maj wak'xac'al lajwok el eb bay takin tx'otx' tu'. 18Yuj tu' xan max wal bay yuninal eb, tol c'amokab chi yun eb axca beybal is mam eb tu', c'amokab chi yikej eb tzet max yal eb is mam eb tu', c'am c'apax chi yetnejtok ba eb yetok juntzan comon dios. 19Max waloni, tol ayin Jehová in is Diosal in eb, tol yikejokab wal eb in chekbanil c'al in ley. 20Mimanokab wal yelapnok jun c'ual xewilal tol wet yayji oc yul sat eb. A jun tu' tol yechelej yayji yin jun trato max in watx'nej yetok eb. Caywal tu' ok yun yojtaknen el eb tol ayin ton Jehová is Diosal in eb.
21Palta ac'ala' max oc eb yuninal eb tu' yin tenomtakilal ayin. Maj yikej eb in ley, tamwal max beybalnej eb in chekbanil, tol a ton juntzan tu' chi ak'on is k'inal eb chi beybalneni. Ac'ala' max yetnej el eb jun c'ual xewilal tol wet yayji ocok. Yuj tu' xan max in na' tol chi wiel yowal in c'ul yin eb, cax chi wak'on lajwok el eb bay takin tx'otx' tu'. 22Palta yujtol caw wal mimanbil wayji ocok, xan maxto in oc wanajok, yet watx' man yobok chin can satak juntzan nacionlak max ilon wion eltek eb bay Egipto. 23A yet ayic' eb bay takin tx'otx' tu', max wak'on in ti' tol ok in saklemnejtok eb bay masanil yulyibank'inal, 24yujtol caw wal maj yikej eb in chekbanil. Max yintaknej el eb in ley, maj yikej eb jun c'ual xewilal tol wet yayji ocok, asanc'al yin juntzan diosal yichmam eb ayoc is nabal. 25Toltax max in bek eb yunen juntzan chekbanilej man watx'ok, tol c'am chi yak' k'inalej. 26Max in bek eb yin yetnentok ba eb yuj is xajanbal, a ton yuj yak'on eb is babel unin yin xajanbalil. A juntzan tu' max wak' yun eb yet watx' chi oc eb yin xiwc'ulal, yet chi yojtaknej el eb tol ayin ton Jehová in, cachi bay eb ichamtak winak.
27Ach anima, al bay eb et israelal tol ayin Jehová Yajaw in ti', chi wal axca ti': A eb e yichmam max tx'em c'apax eb yowal in c'ul, tenomtak max yut ba eb ayin yin juntzanxa ti'. 28A yet mayal wioctok eb bay sat tx'otx' tx'otx' max wak' in ti' wak'on bay eb, max yilon oc eb juntzan tzalanlak, c'al juntzan te te' tol caw wal pim xak. A bay tu' max tx'em eb yowal in c'ul yuj yak'on eb xajanbal, c'al ofrenda, c'al yak'on tz'a eb incienso sumumi jab, c'al secon ay eb vino yin ofrendail bay juntzan comon dios. 29Max in k'anlen bay eb axca ti': ¿Tzet yelapnok juntzan lugar can ayajok bay chex toji? quin chi bay eb. Yuj tu' xan Lugar Can Ayajok chi yun binaj tinani', ẍi Cham, cachi.
30Al bay eb et israelal tol ayin Jehová Yajaw in ti' chi wal axca ti': ¿Tzet yuj xan tol che yochej che yetnejtok e ba axca max yun yetnentok ba eb e yichmam? ¿Tzet yuj xan caw wal tenomtak che yut e ba cax chex oc yin ayilal bay juntzan comon dios tol yajbejtak tu'? 31A ton yin e yak'on tz'a e yofrenda c'al e yuninal yin xajanbalil, lananc'al e yetnen el e ba yetok juntzan comon dios tu', cax chito wal e yochej chi ul e k'anlej tzet chi yochej e c'ul ayin. Wal yel, ayin Jehová Yajaw in chi wak' in ti' tol man ok in tak'wok ayex. 32Yujtol mayal e nabalnej el e beybalnen axca tzet chi beybalnej juntzanxa nacionlak, tol chi oc yin ayilal bay te', c'al bay ch'en. Palta c'am bak'in ok in cha e yun axca tu'. 33Ayin Jehová Yajaw in chi wak' in ti', tol a yetok yowal in c'ul, c'al yetok wipalil tol miman yayji ocok, ok in yajawbok e yiban. 34Ok in tx'ox wal in mayk'ak'al, c'al yowal in c'ul yet ok ex in wajbantok bay nacionlak, a ton bay sakleminak e yayjicantok wuj. 35-36Ok ex witok bay juntzan conoblak. Ayin wal caw Jehová in chi wala', tol yin wal ac-'omba satil ok ex in beyc'ulnej yin waon oc yailal e yiban, axca max yun waon oc yailal yiban eb e yichmam bay takin tx'otx' yul yet Egipto. 37Ayin ok ex in beyc'ulnej junjun ex, cax ok wak'on wal e yikej in trato. 38A mactxel tol tenomtak chi oc ajc'ulal win ok wiel e xol, ok wieltek eb bay sakleminak e yayji tinani', palta man ok octok eb bay tx'otx'al eb e yet Israelal. Caywal tu' ok yun e yojtaknen elok tol ayin ton Jehová in.
39Ex conob Israel, axca wal ti' chi yun walon ayin Jehová Yajaw in ti': Asek, ocanek ayilal bay e comon dios tu'. Palta a yet yajtok tu', ok ex oc yin yikemal ayin. Manxa ok e yetnej el in mimanbilal yin e yak'on juntzan e yofrenda ayin, c'al yin e yoc yin ayilal bay juntzan e comon dios tu'. 40A bay jun tzalan tol wet yayji, a tu' ok ex oc e masanil ex israel yin ayilal ayin, bay jun witz yelxac'al can ayaj yul makbej Israel in conob. Ayin wal caw Jehová in chi wala', tol a bay tu' ok ex in cha' yetok masanil in c'ul. A bay tu' ok in k'an ayex, tol ok e yak' e yofrenda ayin, tol ok e yitek babel sat e yawoj, c'al masanil tzet yetal tol wet yayji ocok. 41A yet ok ex in wajban eltek bay xolak juntzan nación bay sakleminak e yayji tinani', yin wal tzalojc'ulal ok yun ex in chaon axca ofrenda chabejtak. Ok in tx'ox wal in mimanbilal e xol satak masanil conob.
42A yet ok ex wion octok bay jun tx'otx' tol max wak' in ti' wak'on bay eb e yichmam, caywal tu' ok yun nachaj el e yuj tol ayin ton Jehová in. 43A bay tu' ok e natek jantakxa yob beybalej max el e yuneni. Caw wal yobxac'al ok e yab yuj juntzan tzet yetal max el e yunen tu'. 44A ayex yinatil Israel ex ti', a' ok yun e yojtaknen elok tol ayin ton Jehová in, yet watx' ok wut in c'ul e yin yuj wion aj can in mimanbilal. Ayin ton wal caw Jehová in chi wala', tol man axcaok is mojalil e yobtakil, c'al e yob beybalil ok wut in c'ul e yin, ẍi Jehová, cachi, ẍi Cham.
Jun k'ak'ej bay is makbej sur
45Max k'anjab Jehová ayin, max yalon axca ti':
46Ach anima, meltzojantok acan bay yetc'ulal sur, cax chach k'anjabtok; a in k'anej ok al yin mimek k'akte' bay is makbej sur tu', 47cax chaloni: Caywal ti' yalon Jehová Cham Yajaw axca ti': Ayin ok waoc jun k'ak'ej yet ok yak'on tz'aay masanil k'aktelak, te yax c'al te takin; tol ok chawc'al jun k'ak' tu', c'am mactxel ok je' buton tanok. A eb anima ay bay tu', ok tz'atok sat eb yuj bay sur yetokc'al bay norte. 48Masanil yulyibank'inal ok ojtaknen elok, tol ayin max waoc jun k'ak' tu'. Yujtol a jun k'ak' tu', manc'al ok tanok, ẍi Jehová, cachi, ẍi Cham.
49Lajwi tu' max in tak'wi bay Cham: ¡Ay Mamin Jehová, a eb anima chi yal eb tol asanc'al yin q'uexan k'anejal chin k'anjab chi yab eb! quin chi bay Cham.
Currently Selected:
Ez 20: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
