Ez 12
12
Tx'oxbanilej yayji Ezequiel
1Max k'anjab Jehová ayin, max yalon axca ti': 2Ach anima tol cajan ach bay nan xol jun conob tol caw wal tenomtak. Tutun ay sat eb, palta axca wal tol c'am chi ilwi eb. Ay c'apax txiquin eb, palta axca wal tol c'am chi je' yaben eb, yujtol a jun conob ti' junelnej wal tol tenomtak. 3Yuj wal tu' xan wajbaj aj a tzet yetal, axca tol chach toj yin presoal; yet c'ualil, satak wal eb chach el bay a na, tx'ok bay chach tojcanok; tekan ok nachaj el yuj eb axca tu', caxc'al yelxac'al tenomtak eb. 4Yet wal c'ualil, satak wal masanil eb cheon eltek a tzetak yetal, axca tol chach tojcan yin presoal; ac'ala' yet yayc'ualil, chach el c'apax tok satak eb; axca wal tol chach tojcan yin presoal. 5Ol junok olan bay is paredal a na, cax chach eltok bay tu' yetok masanil a tzet yetal satak eb masanil. 6A yet lananxa k'ekbi ayok, cha jolomxic'nej masanil a tzet yetal satak wal eb masanil, cax chach eli. Cha makchej a sat, yet watx' c'am chi je' elon bay chach toji. Chi wochej tol ach chach oc tx'oxbanilejal bay jun conob Israel ti', ẍi Jehová.
7Max in watx'nej aj masanil in tzet yetal axca wal max yun yalon Jehová ayin. Yet c'ualil max in eltek yetok in tzet yetal tu', axca wal mactxel lanan toj yin presoal. Axa yet yayc'ualil max wol jun olan bay paredal in na, axa yet max k'ekbi ay xin, max in jolomxic'nej masanil in tzet yetal tu'. Satak wal eb max in eltok.
8Axa yet k'inibalil yet junxa c'u, max k'anjab Jehová ayin max yalon axca ti': 9A eb et conob Israel tol yelxac'al tenomtak tu', mayal mi k'anlej eb ayach yuj tzet yetal chon tu'. 10Al bay eb tol ayin chi wala', lanan a tx'oxon elok, tol caywal tu' ok yun reyal Jerusalén c'al yetok masanil anima cajan bay tu'. 11Chalon c'apaxok tol tx'oxbanilej ayji oc bay eb, yujtol yowalil axca tu' ok yun eb aj Jerusalén, axca wal lanan oten a ba tu', yujtol ok ilaytok eb yin presoal. 12A is yajawilal eb, yowalil ok jolomxic'nej tok is tzet yetal yet ok k'ekbok ayok, cax ok eltok bay jun olan olbil bay muralla tu'. Ok makchen el is sat, yet watx' c'am chi yil bay chi ca toji. 13Ayin ok watok in tx'an yal yiban, cax ok ayc'ay yul, axa yilaytok bay Babilonia, bay is tx'otx'al eb caldeo; palta man ok yil conob tu'. A bay tu' ok camok. 14Cax ok in saklemnen cantok eb soldado chi tayneni, ac'ala' cay c'apax tu' ok yun juntzanxa is soldado eb; ayin ok wak' uktelay eb yetok espada. 15A yet mayal in saklemnejtok eb bay juntzanxa nacionlak, catawal tu' ok nachaj el yuj eb tol ayin ton Jehová in. 16Yujtol ok wak' yunej, tol ay jaywanokxa eb ok elcan bay xol owal, xol wajil, c'al xol ilya', yet watx' a bay juntzanxa nación bay ok tokcan eb, ok yal eb yuj jantakxa tzet yetal yajbejtak max el yunen eb, c'al yojtaknen el eb tol ayin ton Jehová in, ẍi Cham.
Tz'ininixac'al ok yuncan Jerusalén
17Max k'anjab pax Jehová junelxa ayin, max yalon axca ti': 18Ach anima, bilan aj yuj xiwilal yet chach lowi, cax tx'oxil a bilc'ulal yet choq'uena'. 19Al bay masanil eb et israelal: Caywal ti' yalon Jehová Cham Yajaw, yin eb cajyom bay Jerusalén, c'al yin masanil eb cajyom bay is makbej Israel: Ok low eb yin bilc'ulalil c'al yuq'uena' eb yin somc'ulal; yujtol a jun nación tu' ok lajwok ayok. Tz'ininixac'al ok yuncanok, yuj masanil etnewomal chi yun eb cajyom. 20Masanil conoblak bay cajan eb anima, ok lajwok ayok; tz'inan tx'otx'xac'al ok yuncan jun nación tu'. Caywal tu' ok yun nachaj el e yuj tol ayin ton Jehová in, ẍi Jehová, cachi, ẍi Cham.
21Max k'anjab pax Jehová ayin, max yalon axca ti': 22Ach anima, ¿tzet chi yal elapnok jun k'anej eb israel chi yal eb axca ti': Toc'al chi ec' el tiempo, c'amc'al chi yun tzet chi yal eb chekbej Dios, ẍi jun k'anej tu'? 23Yuj tu' xan al bay eb: Axca ti' yalon Jehová Cham Yajaw: Ayin ok wak' yunej tol manxa ok al-lay jun k'anej tu' junelxa e xol. Toxa ok yun juntzan k'anej max in tx'oxil tu', ẍi Jehová, cachi. 24Yujtol c'amxa mac ok tz'ak yala' tol ay tzet chi yila', tamwal ay mac naom el k'anej yin lek'tial e xol. 25Yujtol ayin wal caw Jehová in, ok in k'anjabok. Ayin wal caw Jehová in chi wala', tol a tzet ok wal tu' manxa ok mayjok yuneni. A ayex conob tenomtak ex ti' tol ok e yil wali, tol ayin ok in k'anjabok, cax ok wak'on yun tzet yetal chi wal tu', ẍi Cham.
26Max k'anjab Jehová ayin, max yalon axca ti': 27Ach anima, a eb et israelal tu', chi yal eb tol a juntzan max in tx'ox ela', c'al juntzan k'anej max ala', ok mayjok, aytoc'al yabilal yuneni, ẍi eb. 28Yuj tu' xan al bay eb, tol ayin wal caw Jehová in chi wala', tol a in k'anej man ok mayjok yuneni. A tzet chi wala' yowalil chi yun yin aymanil, ẍi Cham ayin.
Currently Selected:
Ez 12: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
