Ez 11
11
Yailal yiban eb yajawil conob Israel
1Max wilon xin tol a Yespíritu Dios max in iontok, cax max in apnitac'al oc bay chon octok bay yul templo Jehová bay yetc'ulal yichcan. A bay jun puerta tu', ay 25 winak ayic'ok, max wilon xol eb tu', max txecloj eltek Jaazanías, c'ajol Azur, yetok Pelatías c'ajol Benaías, a ton eb tu' yajaw yayji xol conob. 2Max waben yalon Jehová ayin axca ti': A ton wal juntzan ti' chi naon yunen yobtakil, c'al yak'on eb yobal nabalej bay jun conob ti'. 3Chi yalon eb: Man mojok co watx'nen aj co na tinani'. A jun conob ti' lajan axca junok xij; axa ayon ti' lajan on axca no chibej, ẍi eb. 4Yuj tu' xan al in k'anej bay eb, ẍi Jehová ayin.
5A Yespíritu Jehová max ak'on wunej, tol chi wal axca ti': Tix wal max yun yalon Jehová ti': A wal juntzan tu' che na' ayex israel ex ti'; wojtak wal tzet chi ec' yin e nabal. 6Ayex ti', xiwilxa anima max e mak' cam bay jun conob ti', toxac'al max nojil yulak calle e yuj, yuj is mimanil eb anima tu'. 7Yuj tu' ayin wal caw Jehová in ti' chi wal ayex: A Jerusalén ti', lajan wal ok yun axca wal junok xij. Palta a no chibej tu', mayexnak ayex ti', palta tol a ton eb e yet conob max e mak' cam tu'. A pax ayex ti xin, ok ex wiel yul conob ti'. 8Yuj ay e xiwc'ulal bay owal, xan ayin wal caw Jehová in chi wala', tol ok watek owal e yiban. 9Ayin ok waoc yailal e yiban; ok ex wiel yul conob ti', cax ok ex waon oc yul k'ab eb tx'ok conobal. 10Ok ex ak'lay cam yetok espada; ayin ok ex in beyc'ulnej sataktok mojonail Israel ti'. Caywal tu' ok yun nachaj el e yuj tol ayin ton Jehová in. 11A jun conob ti', man lajanok ok yun axca junok xij ayex, tamwal ayex ti' lajan ok e yun axca no chibej. A bay sataktok is mojonail Israel ti', a tu' ok ex in beyc'ulnej. 12Caywal tu' ok yun nachaj el e yuj tol ayin ton Jehová in. Yujtol ayex ti', c'am wal jabok max e beybalnej in chekbanil ti', tamwal max e yikej in ley; palta tol max e beybalnej is beybal juntzan nacionlak ayic' e cawilal ti', quin chi, ẍi Jehová.
13Yak'ban lanan in k'anjab el yuj Jehová tu', max ayc'ay Pelatías, is c'ajol Benaías cami. Max in ay paknaj sat tx'otx', cax max in wek'on el waw, max waloni: Ay Mamin Jehová, ¿tom wal ok ak'xac'al lajwok el jaywanxa chito cancan bay Israel ti'? quin chi.
Junxa trato Dios yetok eb israel
14Max k'anjab pax Jehová ayin, max yalon axca ti': 15Ach anima, a eb cajan bay Jerusalén, chi yal eb e yin ayex max ex ilaytok yin presoal: A eb tu', caw wal najat ayil eb bay Jehová, xan a tx'otx' tx'otx' ti', mayal ak'lay can tx'otx' co sataknej, ẍi eb. Palta a eb caw wal yinatil Israel etok, a ton eb ayto oj a ba yetok, a ton eb ibiltek yin presoal etok ti'. 16Yuj tu' xan al bay eb cajyom bay Jerusalén axca ti': Tix wal yalon Jehová Cham Yajaw ti': Max wiel eb bay is tx'otx'al, cax max in saklemnentok eb bay juntzan tx'ok nacional. Palta yak'ban ayic' eb bay tu', yin txennej tiempoal ayin ec' yetok eb axca tol ayic' in templo xol eb, ẍi Jehová, cachi. 17Cax chalon c'apax bay eb ibiltok yin presoal etok: Caywal ti' yalon Jehová axca ti': Ayin ok ex wak' meltzojtek junelxa, ok ex wiel bay juntzan nacionlak bay max ex in saklemnejtok. Ok ex in wajbaj ocok, axa wak'on e tx'otx' ayex junelxa. 18Ok ex meltzoj junelxa bay e conob, cax ok e c'ayon el masanil juntzan yechelej tol yajbejtak. 19Ok wiel jun nabalej ayoc e yin tol caw axca ch'en, cax ok wak'on jun ac' nabalej ayex tol watx'. 20Caywal tu' ok yun yayjok ec' eb axca wal yalon in ley, c'al beybalnen eb in chekbanil; in conob wal ok yun eb, ayinxa is Diosal eb ok wunej. 21A pax eb tol oktoc'al beybalnen juntzan beybalej tol yajbejtak yoc tu xin, ayin wal caw Jehová in chi wala', tol ok waoc yailal yiban eb yuj, ẍi Jehová, cachi, ẍi Cham ayin.
Max elcan is mayk'ak'al Jehová bay Jerusalén
22Axca tu xin max wil yajwan eb querubín, axa toj jenenok eb tu'. Max toj c'apax juntzan rueda tu' yetok eb, a pax mayk'ak'al Diosal Israel ayoc yiban eb, 23max aj wanok, axa yel bay conob Jerusalén. Axa tu' max apni oc bay jolom witz bay yetc'ulal yichcanil jun conob tu'. 24Lajwi tu', max wiloni tol chin ilay meltzojtek bay Babilonia yuj Yespíritu Dios, a ton bay ayic' juntzanxa eb max ilaytek yin presoal. A juntzan ti' max tx'ox Jehová wila'. Lajwi tu xin, c'amxa tzet max wila'. 25Max wal masanil juntzan tzet yetal max tx'ox Jehová ayin tu' bay eb ibiltek yin presoal tu'.
Currently Selected:
Ez 11: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
