Ex 38
38
Watx'jubal altar bronce
(Ex 27.1-8)
1Max watx'nen c'apax Bezaleel jun altar bay chi tz'a xajanbal. A te acacia max oc yin; cab metro yetok 25 centímetroc'al max yun is yechel can paq'uil, axa is tel xin, jun metro yetok 25 centímetro max yunej. 2Cax max watx'ji aj caneb yuc'a' bay canebal txiquin tu', junnejc'al chi yun yetok jun altar tu', cax broncec'al chi oc yin. 3Broncec'al is mitx'k'abil jun altar tu', axca net bay chi ay tan, c'al ch'en pala, mimek sec', ch'en tenedor, c'al yetok netal tzak'ak'. 4Cax max watx'ji c'apax oc jun rejail altar tu' tol naba bronce. A bay yalan is ti' max oqui, a tu' chi apni bay is nan jun altar tu'. 5Max watx'ji c'apax caneb argolla naba bronce, junjun yet junjun txiquin bay ayoc rejail tu'. A yul juntzan tu' chi ec'tok is batxbanil. 6A te acacia max oc yin is batxbanil tu', max oc bronce yin te'. 7Cax max jul-lay ec'tok yulak ch'en argolla ayoc bay yin is tz'eyil jun altar tu', yet chi je' batxlayi. A jun altar tu', chemte' max oc yin, cax olan max yuncan yul.
Watx'jubal jun miman palangana bronce
(Ex 30.18)
8Max k'anbalnej Bezaleel ch'en espejo tol bronce, yet eb ix ix ayoc makomalok ti' an mantiado, yet chi watx'nej jun miman palangana yetokc'al is batxlubal yich.
Watx'jubal yamak'il cajlobal Dios
(Ex 27.9-19)
9Max watx'nej c'apax Bezaleel an cortina max oc yinlak amak'. A bay yetc'ulal sur, a tu' ayoc 45 metro an cortina; axa an cortina tu', a ton lino tx'umbil ayoc yin. 10Axa 20 yoyal yetokc'al is batxlubal oy tu', naba bronce. Axa is ganchoal, c'al makil chon oy, platac'al elok. 11A bay yetc'ulal norte ayoc 45 metro an cortina, c'al 20 oy yetokc'al is batxlubal naba bronce; axa is ganchoal c'al makil chon oy, platac'al elok. 12A bay yetc'ulal yayub c'u, a an cortina ayocok, ay 22 yetok nan metro is sat an, c'al lajoneb yoyal, yetokc'al is batxlubal. A is ganchoal, c'al is makil chon oy, platac'al elok. 13Cay c'apax tu' bay yetc'ulal yichcan, a an cortina ayocok, ay c'apax 22 metro yetok nan. 14A bay jun pac' bay chon octok, ay ukeb metro an cortina ayocok, yetok oxeb yoyal yetokc'al batxlubal. 15A pax bay jun pac'xa, ay c'apax ukeb metro an cortina bay tu', ay oxeb yoyal yetokc'al batxlubal. 16Masanil juntzan ti', lino tx'umbil ayoc yin, 17broncec'al ayoc batxlubalok juntzan oy tu'; axa ganchoal, c'al makil chon oy, platac'al elok.
18A janic'xa an cortina ayoc makilok ti' amak' tu', tz'isbilc'al oc is yelbub, chembil yetok an yax tx'al, an tx'al púrpura, an cak tx'al, c'al yetok lino tx'umbil. Nan is baloneb metro is sat, axa tel xin, ay cab metro yetok 25 centímetro. Lajanc'al yetok masanil an ayoc yin amak'. 19Ay caneb yoyal yetok caneb batxlubal tol bronce; a is ganchoal, c'al makil chon oy, platac'al elok. 20A masanil yestacail cajlobal Dios, yetokc'al yet an cortina ayoc yin amak', naba broncec'al elok.
Ch'en ch'en max k'anlay yin cajlobal Dios
21Max yalon cham Moisés tol chi watx'ji listail jantak ch'en oro, c'al ch'en plata, yetok ch'en bronce max oc yin watx'jubal aj is cajlobal Jehová, a ton bay chi c'uay caẍail trato. A eb levita max watx'nen listail tu', axa Itamar is c'ajol Aarón, max ikban eb. 22A Bezaleel, c'ajol Uri, is yitxiquin Hur, yin tribual Judá, a max watx'nen masanil tzet yetal max yal Jehová bay cham Moisés tol chi watx'ji. 23Axa Aholiab, is c'ajol Ahisamac, titnak yin is tribual Dan, a max colwaj yetok. A jun tu' tenom ch'en, chemom k'ap, chi je' c'apax tz'ison oc yelbub yetok yax tx'al, an tx'al púrpura, an cak tx'al, yetok an lino caw wal watx'.
24Masanil ch'en oro max k'anlay yin watx'jubal is cajlobal Dios, yin ofrendail max yun wajbalay ocok. A juntzan oro tu', 21 quintal yetok 95 libra, atac'ala' jantak yalil ch'en echbal chi k'anabax bay cajlobal Dios.
25Axa ch'en plata max wajlay aj yet max ilay aj bisil eb anima xin, ay 75 quintal yetok cab arroba atac'ala' jantak yalil ch'en echbal chi k'anlay bay cajlobal Dios. 26A masanil eb winak max tz'ibelayi, eb tol ayxa 20 abil is k'inal, ay 603,550 eb yin masanil. Junjunc'al eb tu' max yak' eb nanok siclo plata, atac'ala' jantak yalil ch'en echbal chi k'anlay bay cajlobal Dios. 2775 quintal ch'en plata max oc yin batxlubal is chemteal is cajlobal Dios, c'al batxlubal yoyal bay chi oc an cortina. A masanil juntzan plata tu' max oc yin cien batxlubalej tu', chi yal elapnok tol chi oc 75 libra yin junjun. 28A yetok junxa cab arroba plata tu' max watx'nej Bezaleel ch'en gancho max oc yin te oy, c'al makil jolom oy tu', yetok ch'en argolla.
29A masanil ch'en bronce max ak'lay yin ofrendail bay Jehová, max ajapnok is bisil yin 53 quintal yetok lajoneb libra. 30A yetok ch'en bronce tu' max watx'ji batxlubal yoyal bay max oc is puertail, bay chon octok bay yul mantiado bay chi co chalej co ba yetok Dios. Jun altar naba bronce, yetokc'al is rejail. Broncec'al el masanil mitx'k'abej bay altar tu', 31yetok c'apax batxlubal yoyal, c'al yestacail oyan oc yin yamak'il mantiado tu', yetokc'al bay ayoc is puertail.
Currently Selected:
Ex 38: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
