Ex 37
37
Watx'jubal te caẍail trato
(Ex 25.10-22)
1Max watx'nej Bezaleel te caẍail trato yetok te acacia, jun metro yetok 10 centímetro max yun is k'atil, axa is sat xin, 65 centímetro max yunej. Ac'ala' 65 centímetro max yun yaj c'apax is tel. 2Max oc oro yin c'al yul, cax max oc c'apax oro yin tilak bay yiban, bay tzalan ajok. 3Max watx'ji c'apax caneb argolla naba oro chi oc yin yakan canebal, cax cabcab yin junjun pac'. 4Max watx'nej c'apax juntzanok te batxbanil naba acacia, cax max oc oro yin. 5Max lajwi tu', max jul-lay ec'tok yul ch'en argolla ayxa oc yin te caẍail trato tu', yet watx' chi je' batxlayi.
6Max watx'ji c'apax jun makilej tol naba oro bay chi ak'lay tan yobtakil, jun metro yetok 10 centímetro is k'atil, yetok 65 centímetro is sat. 7Ay cab yechel querubín tol chac'bil yetok martillo ayoc bay yiban tilak is makil tu'. 8Junejc'al max yun jun makilej tu' yetok cab yechel querubín tu': Junjun querubín ay bay cab tilak jun makilej tu'. 9Ac-'omba chi yunej. A tu' chi toj t'anjab bay yiban jun makilej bay chi ak'lay tan yobtakil tu'. Axa is xic' xin, jenantok yiban makil caẍail trato tu', cax axca tol yenel yayji ocok.
Watx'jubal meẍail ixim pan
(Ex 25.23-30)
10Max watx'nej c'apax Bezaleel jun meẍa. A te acacia max oc yin te'. 90 centímetro max yun is k'atil; axa sat xin, 45 centímetro max yunej; axa is tel xin, 65 centímetro max yun yaji. 11Max oc naba oro yin, cax max oc c'apax oro yin tilak. 12Max watx'nej c'apax aj oyan yin tilak bay yiban, tol ukeb centímetro max aji. Max oc c'apax oro yin is tilak bay yiban. 13Max watx'ji c'apax caneb argolla naba oro, cax max oc yin caneb txiquin bay ayoc caneb yakan, 14junej chi can juntzan argolla tu' yetok jun oyan aj tilak tu'. A bay tu' chi oc is batxbanil yet chi je' batxlay jun meẍa tu'.
15A te batxbanil tu', a ton te acacia max oc yin, cax max oc c'apax oro yin. 16Max watx'nen c'apax mitx'k'abej oro chi k'anlay bay meẍa tu'; tixtak ch'en max k'anabax ti': ch'en plato, cucharón, ẍalu, c'al sec', a ton chi k'anlay yet chi seclay ay ofrenda yin aejal.
Watx'jubal batxlub candil
(Ex 25.31-40)
17Max watx'nej c'apax Bezaleel jun batxlub candil naba oro, chac'bil yetok martillo. A yich bay chi ay batxanok, is teal yetok is xumaquil, cax junnejc'al max yunej. 18Oxox is k'ab max eltek bay cab is tz'eyil. 19Junjunc'al juntzan is k'ab tu', ay oxeb is xumaquil axca yet almendro. 20A jun is teal tu', ay c'apax caneb is xumaquil axca yet almendro. 21A bay yalan, bay ayiltek junjun mojan is k'ab tu', ay junjun xumaquil. 22A is xumaquil tu', c'al is k'ab, junejc'al yayji yetok batxlubal tu'. A jun tu', naba oro chac'bil yetok martillo. 23Max watx'ji c'apax ukeb candil naba oro, yetok ch'en ch'en chi ion el tanil an mecha, c'al is platoal. 24A yet max watx'ji jun batxlub candil tu', yetokc'al is mitx'k'abil, 75 libra oro max oc yin.
Watx'jubal altar yet incienso
(Ex 30.1-5)
25Max watx'nej c'apax Bezaleel jun altar yet incienso, yetok te acacia. Lajanc'al max yun can paq'uil, 45 centímetro c'al elok; axa pax is tel 90 centímetro max yun yaji. Ay c'apax yuc'a' bay txiquinlak, junnejc'al max yun yetok jun altar tu'. 26Lajwi tu', max oc oro yin bay yiban, c'al yin is can paq'uil, yetokc'al yin is yuc'a', cax max oc c'apax oro yin is tilak. 27A bay yalan is tilak, a tu' max oc cabcab argolla oro yin cab is paq'uil, cax max ec'tok te' batxbanil bay yul ch'en argolla tu', yet chi je' batxlay jun altar tu'. 28A te batxbanil chi oc tu', a ton te acacia max oc c'apax oro yin.
Watx'jubal aceite chi k'anabaxi
29Max watx'ji c'apax aceite chi k'anabax yet chi sic'lay el junok mactxel, ma junok tzet yetal tol chi occan yetok Dios, c'al perfume caw wal watx', axca chi yun watx'nen eb watx'nem perfume.
Currently Selected:
Ex 37: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
