Dt 6
6
Jun miman chekbanilej ay is may
1A ton wal juntzan ley c'al juntzan chekbanilej ti' max chek Jehová co Diosal wal ayex, tol ok e yak' k'anabaxok yet ok e yion tx'otx' tx'otx' k'axepal a' Jordán e satakok. 2Ikejek masanil is chekbanil, chi wal ayex ti' c'al bay eb e yuninal c'al bay eb e yi e txiquin, yet watx' ayc'al yelapnok Jehová co Diosal yul e sat yet ayex ec' bay yulyibank'inal ti'. Axca tu' xiwil abilal ok e yil bay sat tx'otx' ti'. 3Yuj tu xin ex wet conob Israel, abek cax aek wal oc yin e c'ul e yiken juntzan chekbanilej ti', yet watx' watx'c'al ok ex elocok, yelxac'al mimek conob ok ex eloc bay sat tx'otx' tx'otx' yax sat tu', axca max yun yalon Jehová co Diosal yetok eb jichmam.
4Ex wet conob Israel, abek wal xin: Asannej Jehová co Diosal, c'am junokxa.
5Camc'ulnejek Jehová co Diosal yin masanil e c'ul, yin e yanimail, c'al yetok masanil e yip.
6A juntzan k'anej chi wal ayex ti' tinani' c'ubajekcan yin e nabal. 7A juntzan ti' ok e yak'c'al cuy eb e yuninal yin junjun c'u. Ayexc'al oc e yaloni yet ayex ec' bay e na, yet ipan e beyi, yet chex waycan ajok, c'al yet chex ajwanok. 8C'alek oc masanil juntzan chekbanilej ti' yin e k'ab c'al yin e nan sat axca junok yechelej yuj e naontek. 9Cax che tz'iben c'apax oc yin is pilaliẍal e yatut c'al yin is puertail.
Chi yal cham Moisés tol chi yikej eb ley Dios
10A Jehová co Diosal, a' ok ex ion octok bay jun tx'otx' max yak' is ti' yak'on bay eb jichmam, a ton Abraham, Isaac c'al Jacob. Ay wal conoblak manxa watx'ilok bay jun tx'otx' tu' tol mayexnak max e watx'nej ajok. 11Caw wal ay te na nojnak yuj tzetak yetal tol caw wal watx', mayexnak max e yak' nojok. Ay uc'bala' jotbil, mayexnak max e yab yail e jotoni. Ay uva c'al olivo awbil, mayexnak max e yawa'. A juntzan tu' toxac'al ok e lo' masantac'al chi yal noj e c'ul. 12A yet ok yunen masanil juntzan tu', tojta wal Jehová c'ayc'ulal e yuj. Naektek tol a Cham max ex ion eltek bay Egipto, bay ayex oc yin mosejal. 13Axa Jehová co Diosal ayokab yelapnok yul e sat. Asannej Cham che yak' serbil, cax asan is bi Cham che yak' binaj yin tzet bay che yak' e ti' e yuneni. 14Manchak ex tzakloj yintak is diosal eb anima cajan bay e cawilal tu', 15yujtol ow Jehová co Diosal yin juntzan tu'. Ayic' Cham e xol, axa talaj chi yunej, chi tit yowal c'ul cax chex c'ayon elok, yujtol c'am chi cha' c'ul chi jaoc co nabal yin junokxa tx'ok diosal.
16Manchak e yak' porobal Jehová co Diosal, axca max e yun bay Masah. 17Ikejek wal is ley c'al is chekbanil Cham, a ton wal jantak is chekbanil max yala'. 18Watx'c'al che yut e nabal c'al e beybal satak Jehová, yet watx' watx'c'al chex elocok. Ok e sataknej tx'otx' tx'otx' max yak' Cham is ti' yak'on bay eb jichmam. 19Ok elaj eb ajc'ul e satak yuj Jehová, axca max yut yaloni.
20A yet yajtok tu' ok k'anlej eb e yuninal ayex: ¿Tzet yuj xan chi jikej juntzan ley c'al chekbanilej max yal Jehová co Diosal? ta ẍi eb. 21Cax chex tak'wi bay eb axca ti': Ayon ti' tol mosejal jayji bay cham reyal Egipto yet payxa, axa Jehová max on bet ion eltek yetok wal is mayk'ak'al. 22Ayon ti' max jil wal milagro c'ayubtakxac'al yoqui max tx'ox Cham bay reyal Egipto c'al bay masanil is nación tu'. 23Max on yion eltek bay tu', cax max on yiontek cayti' bay tx'otx' tx'otx' max yak' is ti' yak'on bay eb jichmam. 24Yuj tu' xan max chek Jehová jikej juntzan chekbanilej ti' yin co naontek Cham, c'al jiquisbi ec' yuj, axca ton jayji tinani'. 25Yuj wal tu xin, ta ok jikejc'al juntzan chekbanilej ti' axca max yun yalon Jehová, watx' on yul is sat, quex chi bay eb.
Currently Selected:
Dt 6: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
