Dt 5
5
Lajoneb Mandamiento
(Ex 20.1-17)
1Lajwi tu' max wajban oc cham Moisés masanil eb yet israelal, max yalon bay eb:
Abek wal tinani' xin ex wet conob, tol ok walcan juntzan ley, c'al chekbanilej ayex, tol chi cam wal e cuyoni, cax che beybalneni.
2A Jehová co Diosal max yak' jun is trato jetok bay tx'otx' witz Horeb. 3Man asanok yetok eb jichmam max yak' is trato; palta max yak' c'apax jetok ayon ti', a ton jetok ayon wajan on ec' ti' tinani'. 4A wal caw Jehová max k'anjab ayon bay jolom witz tu', yin ac-'omba satil yet max k'anjab eltek bay xol k'ak'ej. 5A e nan e xol yetok Jehová, a tu' ayin ocok, yet max walon masanil is k'anej Cham max yal ayex. Ilab tol max ex xiw ayex ti' bay k'ak'ej tu', maj je' e yajtok bay jolom witz. Max yal Jehová axca ti':
6Ayin Jehová e Diosal in, max ex wieltek bay Egipto, bay ayex ec' yin mosejal.
7C'amokab junokxa e diosal in satak.
8C'am junok yechelej che watx'nej, tamwal yechel junok tzet yetal ay bay satcan, tamwal yechel junok tzet yetal ay bay sat tx'otx', tamwal yechel tzet yetal ay bay yul a' mar. 9Manchak ex ay nojan bay, tamwal che yak' ayilal bay, yujtol ayin Jehová e Diosal in caw wal chi tit wowal e yin tatol chex oc yin ayilal bay junokxa mactxel, cax ok waon oc yailal eb mamej, eb tol chin yajoni cax ay yowal in c'ul yiban eb uninalej c'al yiban eb yet is yox c'al yet is can itxiquinej. 10Axa pax eb chi camil c'ul win xin, cax chi yiken eb in chekbanil, ok in camc'ulnej eb c'al is yinatil eb yet ok beyc'altok.
11Man comonok che yak' binaj in bi ayin Jehová e Diosal in ti', yujtol a mac comonc'al ok yak' binajok ok waoc yailal yiban.
12Mimanokab yelapnok c'ual xewilal yul e sat, yuj in e yion aj can, axca max yun waloni. 13Asannej wakeb c'ual che yil e mulnajil. 14Axa yet is suk c'ual xin, c'ual xewilal, wet yayji ocok. C'am junok e mulnajil che yil yet jun c'ual tu', tamwal e c'ajol, tamwal e cutz'in, tamwal eb nak e chekbej, tamwal eb ix e chekbej, tamwal e wacax, tamwal e chej, tamwal junokxa e jobbejal no', tamwal eb tx'ok conobal ayic' yul e conobal chi mulnaji, palta masanil chi xew e yetok. 15Naek c'apaxtek, tol yin mosejal max yun e yec' bay Egipto. Axa ayin Jehová e Diosal in ti' max ex wieltek bay tu' yetok wipalil. Yuj tu' xan chi wala' tol che yikej c'ual xewilal.
16Ayokab yelapnok e mam c'al e txutx yul e sat, axca wal max yun walon ayex, yet watx' chi najatilbi e k'inal, c'al e yayji ec' yin watx'il bay sat tx'otx' tx'otx' ok wak' ayex tu'.
17Manchak e mak'cam e yet animail.
18Manchak e yaoc e mul yul k'ab e yetbi junjun ex.
19Manchak ex elk'ani.
20Manchak e naaj k'anej yin eb e yet animail.
21Manchak e yochej oc yistzil junokxa mactxel, tamwal yatut, tamwal is tx'otx', tamwal eb nak is chekbej, tamwal eb ix is chekbej, tamwal is wacax, tamwal is burro, tamwal junokxa tzet yetal tol yet e yet animail tu' che yochej ocok, ẍi Jehová ayon.
Xiwc'ulal eb conob
(Ex 20.18-26)
22A ton wal juntzan k'anej Jehová max yal yin ipejal ti', bay nan xol k'ak'ej bay xol jun k'ek asun, yet wajan on ec' co masanil bay yich witz. Max lajwi tu xin, c'amxa tzet max yala', max tz'iben oc juntzan k'anej ti' yin cab jenan ch'en, max yak'on ayin. 23Palta a yet max e yaben jun nuk'ej tu', max oc bay xol k'ekk'inal tu', max e yiloni tol chi aj xak k'ak'ej bay jun witz, masanil ex yajaw e yayji yin junjun tribu ti', c'al eb yicham winakil conob, max ex jay ul e yalon ayin. 24Max e yalon ayin axca ti': Wal yel, a Jehová co Diosal max tx'ox wal is tzekekial, c'al is yipalil ayon, max jab wal yoc is nuk' Cham bay xol k'ak'ej. A tinani', mayal wal nachaj el juj tol chi je' k'anjab Dios yetok eb anima, cax c'am chi cam eb yuj. 25Palta xin, ¿tzet wal yuj xan ok on cam yuj jun k'ak'ej tol ayxa is may tu'? Palta ta ok jab wal yoc yul nuk' Jehová co Diosal junelxa, ok on camok. 26Yujtol ¿mac wal junok anima chi je' yaben yoc yul nuk' jun Dios iquis xol k'ak'ej axca wal max yun jaben ayon ti', yin c'am camichal? 27Yelxac'al watx' ach chach oc satak Jehová co Diosal yin aben masanil tzet ok yala'. Lajwi tu' ok al ayon masanil tzet ok yala', cax ok jiken on masanil tzet yetal ok yal ayon tu', quex chi ayin.
28A yet lanan e k'anjab ayin tu', lanan c'apax yaben Jehová tzet che yala', yuj tu' xan max yal ayin: Mayal wab tzet chi yal jun conob tu', max cha in c'ul tzet max yala'. 29Matawal cac'al ti' is nabal eb, ayc'al welapnok yul sat eb, cax chi yikenc'al eb in chekbanil yet watx', watx'c'al ok yun beytok eb, c'al yuninal eb yin tojbalk'inal. 30Yuj tu' xan al bay eb tol chi meltzoj eb bay is campamento. 31Axa ach ti xin, canan can wetok cayti', yujtol ok wal ayach masanil in chekbanil c'al in ley, cax ok a cuyon eb yin, yet watx' ok beybalnej eb bay tx'otx' tx'otx' ok wak' bay eb tu', ẍi Jehová. 32Yuj tu' xan beybalnejek masanil is chekbanil Jehová co Diosal. C'amokab wal janic'ok chex el q'uexnaj yin. 33Beybalnejek beybalej max tx'oxcan Jehová co Diosal, yet watx' watx'c'al ok yun e beytok, cax ok najatilbok e k'inal bay sat tx'otx' tx'otx' ok yak' ayex tu'.
Currently Selected:
Dt 5: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
