1 P 2
2
1Yuj tu', yowalil che bekcan masanil pojanil tzet man watx'ok. Manchakxa e yet k'anenej junok anima. Manxaokab cabsatok che yut e ba. Manchakxaokab e yak' sawenal yin junok mac ay tzet ay bay. Manchakxa ex buchwaj yin junokxa mactxel. 2-3Ta yel wali maxax e yojtaknej el sic'libil tol watx' Cham Jajawil, axca yochen junok aq'uiẍ unin yim, axcaokab tu' e yochen jun cuybej Dios c'am somil, yet watx' che yi e yip yin e colbanil.
Chi lajbelay Cristo yetok jun ch'en
4Co jitzek oc co ba c'atan Cham Jajawil xin, axca chi yun yajtok juntzanok ch'en yiban junok miman ch'en chi aycantok yipomalok yich na. A jun mac axca miman ch'en ti', a ton Cristo, Cham tol iquis, cax iquis on c'apax yetok ayon ti'. A ton Cham max intaknelay el yuj eb anima, palta sic'bil el yuj Dios, cax miman yelapnok yul sat Cham. 5Yuj tu' xan aek oc e ba yul k'ab Dios, yet chex oc is templook bay ok ex oc yin sacerdotealok Dios, yuj e yak'on xajanbal bay Cham yin espíritu yuj Jesucristo. Caw wal chi tzalojbi Cham yetok juntzan xajanbal tu'. 6Yuj tu xan caytu' yaloncan Dios yin Cristo yul tx'an Un Tz'ibbilcan axca ti':
Ayin wal chi wacan oc jun ch'en ch'en bay Sión yet chi oc bay jolom txiquin na, tol sic'bil el wuj, c'al miman yelapnok. A mactxel chi yaoc ch'en yipok c'ul, man ok somchaj el c'ul yuj, ẍi Dios yul tx'an Un tu'.
7Caw miman yelapnok Cristo yul co sat, mac on txel chi jaoc co c'ul yin, palta ay pax eb c'am chi yaoc c'ul yin Cham. A ton yin juntzan ti' chi yal tx'an Un Tz'ibbilcan axca ti':
A ch'en ch'en max yintaknej el eb watx'nem na, a ch'en max oc yin jolomok txiquin na, ẍi.
8Chi yalon c'apax junelxa axca ti':
Axca junok ch'en ch'en bay chi chipil anima yakan, cax chi telc'ojtok eb yuj, caytu' yayji Cham, ẍi tx'an Un tu'.
Yujtol caytu' yayji Cristo yul sat eb c'am chi yaoc c'ul yin tu', xan toc'al chi somchaj el eb yuj, yujtol c'am chi yikej eb is k'anej. Miman txequelxa yayji yet payxa, tol t'inanc'alta' caytu' ok yut ba eb.
Conob onxa Dios tinani'
9Palta ayon ti', axca tol junxanej inatilej jayji, sic'bil on oc yin sacerdoteal, yuj jak'on serbil co Reyal, chi yal elapnok a ton Dios. Conobxa Dios jayji, pojbil on el yuj joccan yetok, yuj jalon el is watx'ilal Cham. Yujtol a' max on ion eltek xol k'ekk'inal, cax max on yaoncan oc bay is sakk'inalil c'ayubtak yoqui. 10Man conobok Dios e yayji yet yalan. Axa pax tinani xin, is conob exxa. A yet yalantok tu', c'am mac max ok' c'ul e yin, palta tinani xin, chi ok' c'ul Dios e yin jetok.
Asannejokab Dios chi jak' serbil tinani'
11Ex wuẍtak, ex wanab camc'ulnebil, man co conobok yulyibank'inal ti', yujtol ec'jabwomc'al jayji bay. Yuj tu' xan chin tewitok ayex, tol manchak e beybalnej juntzan tzet chi yochej oc e mimanil. Yujtol a juntzan yob ochwanilal tu', chi yak'lej owal yetok janimail. 12Watx'okab chi jut co beybal yil eb manto ojtaknenok Dios. Yuj tu xin, caxc'al chi yal eb tol yob chi jut co ba tinani', palta tatol chi yil eb co watx' beybal, ok yal eb watx' k'anej yin Dios yet ok jay c'ual beyc'ulal. 13Yuj co camc'ulal yin Cham Jajawil, xan yikemokab chi jut co ba bay masanil eb co yajawil sic'bil oc yin opiso yuj eb anima. Chi jikej tzet chi yal cham rey, cham sat yajaw. 14Chi jiken c'apax bay juntzanxa eb yajaw, yujtol ak'bil yopiso eb yuj cham rey, yuj yaon oc eb yailal yin eb chi oc is mul, c'al yuj yalon eb watx' k'anej yin eb watx' tzet chi el yuneni. 15Chi yochej Dios tol caw wal watx' chi jut co beybal, yet watx' c'am bay chi can mitx'an eb c'am is nabal, yet chon al-lay yobal yuj eb. 16Ayon ti' bekanxa jayji, xan jak'ek txecloj el xin tol bekan onxa. Asan bian, manchak co naek tol yuj bekan onxa, cax bekanxac'al junen tzanc'al tzet man watx'ok. Co naektek tol ayonxa oc yak'omalok serbil Dios. 17Ayokab yelapnok junjun jet animail yul co sat, cax chi co camc'ulnen c'apax eb jet creyenteal. Xiwokonek bay Dios. Ayokab yelapnok cham rey yul co sat.
Max yab yail Cristo juj
18Ex mosejal, ikejek bay chi yal e patrón. Ayokab yelapnok eb yul e sat. Man asannejok bay eb watx' is nabal c'al bay eb manso c'ul che yikej, palta ikejek c'apax bay eb yob is nabal. 19Ta asan yuj ayoc co nabal yin Dios xan comonc'al chon etnelayi, palta ta chi jak' techajok, caw wal chi tzaloj Dios jetok. 20K'inalok yuj junok tzet yob max el juneni cax chon mak'lay tinani', ¿xin ta yujc'al ok jak' techaj jun yailal tu' xan watx' on? Palta k'inalok ta comonc'al chi alay oc yailal jiban yuj junok tzet watx' chi el junen tinani', ta chi jak' techaj jun yailal tu', a ton jun tu' watx' yul sat Dios. 21Tutun a yuj jun ti', xan max con yawtej oc Dios yetok, yuj jak'on techaj yatakilal. Ilab tol jujc'al max yab yail Cristo. Axca tu' max yut tx'oxoncan is watx' beybal ayon, yet watx' caytu' chi yun co beybalneni. 22A Cham, c'am junok yobtakil max yunej, tamwal ay junok lek'tial k'anej max yala'. 23A yet max buchwaj eb yin Cham, maj buchwaj Cham yin eb. A yet max alay oc Cham yin yailal yuj eb, maj yak' Cham yowal pakon ba. Toc'al max bek oc ba Cham yul k'ab Dios, Cham watx' beyc'ulnewi. 24A Cristo max ikon can aj co yobtakil yetok is mimanil, yet max aj locan yin te curus, yet watx' c'amxa yalon yet tzet man watx'ok jin, yujtol axca tol camnakxa jayji bay yobtakil. Axca tu' max con yutej, yet watx', watx'c'al chi jut co beybal. Caw max yab yail Cham juj, yujc'al co colchajcan elok. 25A yet payxa, lajan on wal axca junok calnel c'aynakcantok. A pax tinani', mayal on meltzojtek bay Cham Jilomal, Cham chi taynen janimail.
Currently Selected:
1 P 2: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
