Popular Bible Verses from 1 P 2

Share

Palta ayon ti', axca tol junxanej inatilej jayji, sic'bil on oc yin sacerdoteal, yuj jak'on serbil co Reyal, chi yal elapnok a ton Dios. Conobxa Dios jayji, pojbil on el yuj joccan yetok, yuj jalon el is watx'ilal Cham. Yujtol a' max on ion eltek xol k'ekk'inal, cax max on yaoncan oc bay is sakk'inalil c'ayubtak yoqui.

A Cristo max ikon can aj co yobtakil yetok is mimanil, yet max aj locan yin te curus, yet watx' c'amxa yalon yet tzet man watx'ok jin, yujtol axca tol camnakxa jayji bay yobtakil. Axca tu' max con yutej, yet watx', watx'c'al chi jut co beybal. Caw max yab yail Cham juj, yujc'al co colchajcan elok. A yet payxa, lajan on wal axca junok calnel c'aynakcantok. A pax tinani', mayal on meltzojtek bay Cham Jilomal, Cham chi taynen janimail.

Man conobok Dios e yayji yet yalan. Axa pax tinani xin, is conob exxa. A yet yalantok tu', c'am mac max ok' c'ul e yin, palta tinani xin, chi ok' c'ul Dios e yin jetok.

Ta yel wali maxax e yojtaknej el sic'libil tol watx' Cham Jajawil, axca yochen junok aq'uiẍ unin yim, axcaokab tu' e yochen jun cuybej Dios c'am somil, yet watx' che yi e yip yin e colbanil.

Ex wuẍtak, ex wanab camc'ulnebil, man co conobok yulyibank'inal ti', yujtol ec'jabwomc'al jayji bay. Yuj tu' xan chin tewitok ayex, tol manchak e beybalnej juntzan tzet chi yochej oc e mimanil. Yujtol a juntzan yob ochwanilal tu', chi yak'lej owal yetok janimail. Watx'okab chi jut co beybal yil eb manto ojtaknenok Dios. Yuj tu xin, caxc'al chi yal eb tol yob chi jut co ba tinani', palta tatol chi yil eb co watx' beybal, ok yal eb watx' k'anej yin Dios yet ok jay c'ual beyc'ulal.

Yuj tu' xan aek oc e ba yul k'ab Dios, yet chex oc is templook bay ok ex oc yin sacerdotealok Dios, yuj e yak'on xajanbal bay Cham yin espíritu yuj Jesucristo. Caw wal chi tzalojbi Cham yetok juntzan xajanbal tu'.

Yuj tu', yowalil che bekcan masanil pojanil tzet man watx'ok. Manchakxa e yet k'anenej junok anima. Manxaokab cabsatok che yut e ba. Manchakxaokab e yak' sawenal yin junok mac ay tzet ay bay. Manchakxa ex buchwaj yin junokxa mactxel.

Co jitzek oc co ba c'atan Cham Jajawil xin, axca chi yun yajtok juntzanok ch'en yiban junok miman ch'en chi aycantok yipomalok yich na. A jun mac axca miman ch'en ti', a ton Cristo, Cham tol iquis, cax iquis on c'apax yetok ayon ti'. A ton Cham max intaknelay el yuj eb anima, palta sic'bil el yuj Dios, cax miman yelapnok yul sat Cham.

Ayon ti' bekanxa jayji, xan jak'ek txecloj el xin tol bekan onxa. Asan bian, manchak co naek tol yuj bekan onxa, cax bekanxac'al junen tzanc'al tzet man watx'ok. Co naektek tol ayonxa oc yak'omalok serbil Dios.

Chi yochej Dios tol caw wal watx' chi jut co beybal, yet watx' c'am bay chi can mitx'an eb c'am is nabal, yet chon al-lay yobal yuj eb.