Matey 9
9
Jun xjal tzkijle'n tyabil banix tu'n Jesús
Marcos 2.1-12; Lucas 5.17-26
1Ocxtzun Jesús tuj barc, ic'tz jlajtzi laguna, ul tuj ttanmi. 2Ex ul k'i'n jun xjal twitz Jesús tzkijle'n tyabil, coẍl twitz tcoẍbil. Tejtzun tlonte Jesús at cyocslabl xjal e ul k'inte yab, xi tma'n te xjal tzkijle'n tyabil:
—Ke' tc'u'ja nc'wa'l; ke tila ma che najset.
3At junjun xnak'tzal ti'j ley cub cyximan tuj cyanmi: Ate xjal lu in yolin mya ba'n ti'j Dios, che chi. 4Eltzun tnic' Jesús ti'j cyximbetz ex xi tma'n cye:
—¿Tiku'n in cub cyximane mya ba'n tuj cyanniye?
5¿Alcye mas jurat jacu bant, apeju tu'n t-xi k'met te xjal lu: Ke tila ma che najset, ex ka aju tu'n t-xi k'met: We'ctza ex beta? 6Cxeltzun nyec'une cyeye tu'ntzun tel cynic'e ti'j, akine sc'o'maj kine tu'n Dios tu'n ntene cyuc'il xjal, cyja'tzun at woclene twitz tx'otx' tu'n tnajset cyil xjal, chi Jesús.
Xitzun tma'n teju xjal tzkijle'n tyabil:
—We'ctza, k'i'nctz tcoẍbila, ex txi'ya tjaya.
7Jawtzun we' xjal ex xi' tja. 8Tejtzun cylonte xjal jlu, e labin ti'j, ex xi cyk'o'n chjonte te Dios tu'nju tzaj tk'o'n cyoclen xjal tu'n tbant jlu.
Txocbil te Matey tu'n Jesús
Marcos 2.13-17; Lucas 5.27-32
9Tej tic' Jesús tuj lugar lu, o til Jesús jun xjal Matey tbi k'ukltok ti'j mes tuj ja jatum nne'l peyin pwak te gobierni, ex xitzun tma'n Jesús te:
—Lpe'ca wi'je.
Jawtzun we' Matey ex oc lpe' ti'j.
10Ocxtzun Jesús tuja ex cub ke' ti'j mes cyuc'ix t-xnak'tzben. Ex nimcu peyil pwak ex aj il otok che ul e cub ke' ti'j mes ttxlaj Jesús. 11Tejtzun cylonte ke parisey jlu, xi cyma'n cye t-xnak'tzben Jesús:
—Aju Xnak'tzal cyeye ¿tiku'n in wa'n cyuc'il peyil pwak ex cyuc'il aj il?
12Tej tbinte Jesús ju yol lu, xi tma'n cye:
—Ke xjal mya yab, mya il ti'j jun k'anal cye, nok o'cx ke xjal yab. 13Cyxi'ye ex tz'elx cynic'e ti'j ti t-xilen ju yol lu tz'iban tuj Tu'jil, chi cyja': Aju wajbile cyeye atzun, tu'n tten cyc'ujlalile, ex mya tu'n ttzaj cyk'o'ne jun chojbil weye, chi tuj Tu'jil. Porque minti' ma chin ule txcol cye xjal tz'aklxix, nok o'cx ma chin ule txcol cye aj il tu'n tajtz ti'j cyanmi.
Tiku'n minti' in cub cyyo'n we'yaj ke t-xnak'tzben Jesús
Marcos 2.18-22; Lucas 5.33-39
14E ultzun ke t-xnak'tzben Juan tuc'il Jesús ex cyma:
—¿Tiku'n in cub kyo'ne we'yaj, ax icx ke parisey, atzun ke t-xnak'tzbena minti' in cub cyyo'n we'yaj? Che chi.
15Xi ttzak'we'n Jesús cye:
—¿Jacupe che bisun keju otok che txconjtz tuj mejeble'n atxtok chmilbaj cyuc'il? Pero tzul tk'ijlalil tu'n tel k'i'n chmilbaj cyxol; maxitzun cbel cyyo'n we'yaj.
16Mi a'l jun nno'c k'onte jun xbukbil ac'aj ti'j jun xbalun ma baj; porque ka ma tz'oc tk'o'n, c'elel sbit'j ju xbalun bajni tu'nju xbukbil ac'aj, ex mas cxel sbit'j ju xbalun bajni. 17Ex mi a'l jun in cu'x k'onte ac'aj vin tuj jun bols tz'u'm ma baj; porque ka ma cu'x tk'o'n, che elel sbit'j ke bols tz'u'm, cbel kojl vin, ex che najel ke bols tz'u'm. Il ti'j tu'n tcu'x k'ot ac'aj vin tuj bols tz'u'm ac'aj; entons mlay che naj cycabil.
Aju tme'jel Jairo ex aju xu'j oc tmaco'n t-xbalun Jesús
Marcos 5.21-43; Lucas 8.40-56
18Matok in yolin Jesús ti'j jlu cyuc'il, ul jun xjal nejenel cyxol judiy, cub ẍmeje' twitz Jesús ex tma:
—Ma xcyim nme'jele ja'lo, pero tzaja ex k'oncu tk'aba tibaj tu'ntzun tjaw ank'in.
19Jawtzun we' Jesús, oc lpe' ti'j cyuc'ix ke t-xnak'tzben. 20At jun xu'j yab tu'n ẍwo'j, otok bant-xi cablaj abk'i tyabtlen, pon lak'e' ti'jxi Jesús, ex oc tmaco'n xu'j ttxa'n t-xbalun Jesús. 21Porque chi xu'j tuj tanmi: Ichak nok t-xbalun tz'oc nmaco'ne, oc chin bantele. 22Pero ajtz meltz'aj Jesús, oc tque'yin ti'j xu'j ex xi tma'n te:
—Ke' tc'u'ja nme'jel; tu'n tocslabla ma cleta, chi Jesús te.
Ex bi'x banix xu'j.
23Tejtzun tocx Jesús tuj tja nejenel, o til nno'c xux cyu'n xjal ex in che ok' wen ti'j cyimni. 24Xitzun tma'n Jesús cye:
—Cyexe, porque te txin mya cyimni, nok in tan, chi Jesús. Atzun cye xjal nok xi cytze'n. 25Tejtzun cyetz lajo'n xjal ttxa'n pe'n, ocx Jesús tuja, tzaj ttzyu'n Jesús tk'ab txin ex jawtzun we' txin. 26Eltzun lak'e' tkanil jlu tuj tcyakil lugar.
Cabe xjal moẍ jaket cywitz tu'n Jesús
27Tejtzun tic' Jesús tuj lugar lu, e oc lpe' cabe xjal moẍ ti'j, in che sch'in ex in cyma'n:
—Aya Tc'wa'l David, k'ak'antz tc'u'ja ki'je, che chi. 28Tejtzun tpon Jesús tuj jun ja, e pon ke moẍ tuc'il; ex xi tma'n Jesús cye:
—¿Mape ke' cyc'u'je wi'je ka jacu bant jlu wu'ne? Xitzun cyma'n:
—Ma ke' kc'u'je ti'ja, Tat.
29Octzun tmaco'n Jesús tbak' cywitz ex tma:
—Tu'nju at cyocslable cbinchetel cyeye aju ma tzaj cykanine, chi Jesús cye.
30Jakettzun cywitz moẍ ex xi tcyuwsa'nxix Jesús cye:
—Ten cycwente ti'j tu'n mi'n cybinte xjal jlu.
31Tejtzun cyaj ke xjal lu, el tkanil cyu'n ti'j Jesús tuj tcyakil lugar.
Bant tyolin jun xjal men tu'n Jesús
32Matokx cyaj ke xjal lu, pon k'i'n jun xjal men twitz Jesús, at ju'ẍ tuj tanmi. 33Tejtzun tetz lajo'n ju'ẍ tuj tanmi men tu'n Jesús, banttzun tyolin men. E labin xjal ti'j ex cyma:
—Bajx kila' jun binchben ic tza'n jlu cyxol aj Israel.
34Atzun cye parisey in cyma'n:
—Tu'nju nejenel cye ju'ẍ in che etz ke ju'ẍ tuj cyanmi xjal tu'n Jesús.
Tzaj k'ak'an tc'u'j Jesús cyi'j xjal
35Baj tbetin Jesús cyuj cycyakil tnam ex cyuj cycyakil aldey, in tk'o'n xnak'tzbil cye xjal cyuj ja te c'ulbil cye judiy, in pacban ti'j tkanil ba'n ti'j tcawbil Dios, ex in che banix xjal tu'n, nok alcyex cyyabil ex nok alcyex c'ixc'oj toc cyi'j. 36Tejtzun tque'yinte Jesús nim xjal, tzaj k'ak'an tc'u'j cyi'j; porque otok che sict ex in che bisun, ic cyten ic tza'n ke ẍne'l minti' pastoril cye. 37Xitzun tma'n Jesús cye t-xnak'tzben:
—Ax toc nimxix twitz awal at, atzun ke ak'nal mya nim. 38Cyja'tzun che cubsane twitz tajaw awal tu'n cytzaj t-sama'n ke ak'nal chmol twitz awal, chi Jesús cye.
Currently Selected:
Matey 9: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993