YouVersion Logo
Search Icon

Matey 8

8
Jun xjal nim tx'a'c ti'j banix tu'n Jesús
Marcos 1.40-45; Lucas 5.12-16
1Tejtzun tcu'tz Jesús twi witz, nim xjal e oc lpe' ti'j. 2Ul jun xjal nim tx'a'c ti'j minti' k'anbil ti'j, cub ẍmeje' twitz Jesús ex tma:
—Tat, ka tajbila, jacu chin banixe tu'na.
3Xi tnukpi'n Jesús tk'ab ex oc tmaco'n ex tma:
—Wajbile, bi'x cbantela.
Ex jurat naj el tx'a'c ti'j xjal ex banix. 4Xitzun tma'n Jesús te:
—K'o'nca cwent ti'j tu'n mi'n t-xi tma'na te jun xjal; nok o'cx txi'ya, yec'unx tiba te pal ex k'onxa toyaja ic tza'n in tma'n tley Moisés, tu'ntzun tel cynic' xjal ti'j ka ma banixa.
Banix tmajen capitán aj Rom tu'n Jesús
Lucas 7.1-10
5Ocxtzun Jesús tuj tnam Capernaum, pon jun capitán aj Rom tuc'il, in cubsan twitz 6ex tma:
—Tat, at jun nmajene tx'ayl tuj njaye, tzkijle'n tyabil ex nimxix in chyo'n te.
7Xitzun tma'n Jesús te:
—Chin xe'le, ex cbanixel wu'ne. 8Xi ttzak'we'n capitán:
—Tat, mya ba'n kine tu'n tocxa tuj njaye; o'cx k'mantza yol ex cbanixel nmajene. 9Porque icx weye atine tjak' tcawbil juntl, ex ate' soldad tjak' ncawbile. Ka ma txi nma'ne te jun soldad: Txi'ya, in xi'tzun; ex ka ma txi nma'ne te juntl: Tzaja, in tzajtzun; ex ka ma txi nma'ne te nmajene: Binchama jlu, in banttzun tu'n, chi capitán.
10Tej tbinte Jesús tyol capitán, jaw labin ti'j ex xi tma'n cye keju lepch ke'c ti'j:
—Ax toc cxel nma'ne cyeye, na'nx twile tocslabl jun xjal aj Israel ic tza'n tocslabl xjal lu. 11Cxel nma'ne cyeye: Che tzajel nimcu xjal tuj tjawitz k'ij ex tuj telex k'ij, ex che bel ke' ti'j mes ttxlaj Abraham tuc'ix Isaac ex Jacob tuj cawbil in tzaj tuj cya'j. 12Atzun cye keju attok cyoclen nej ti'j cawbil, che elex xo'n tuj klolj; atzun ctzajel ok'el ex ckitx'itx'il t-xe cye' xjal, chi Jesús cye.
13Xitzun tma'n Jesús te capitán:
—Txi'ya; ic tza'n ma tocslaya, icxtzun cbinchetel teya.
Ex ax or banix ju tmajen capitán.
Banix ju xu'j tji' Pedro tu'n Jesús
Marcos 1.29-31; Lucas 4.38-39
14Pontzun Jesús tja Pedro. Xi tque'yin Jesús yabtok aju xu'j tji' Pedro tu'n cyak, tx'ayl twi watbil. 15Oc tmaco'n Jesús tk'ab xu'j, bi'x ic' cyak ti'j; jawtzun we' ex ajben cye.
Nimcu yab e banix tu'n Jesús
Marcos 1.32-34; Lucas 4.40-41
16Tej tex k'ij pon cyi'n xjal nimcu yab tuc'il Jesús at ju'ẍ tuj cyanmi; ex tu'n tyol Jesús e je'tz ke ju'ẍ tuj cyanmi, ex cycyakil yab e banix tu'n, 17tu'ntzun tjapun aju yol k'ma'maj tu'n Isaías aju t-sanjel Dios chi cyja': Ax el k'inte kyabil, ex el ti'n c'ixc'oj ki'j, chi Isaías.
O cyajbe xjal tu'n cyoc lpe' ti'j Jesús
Lucas 9.57-62
18Tej tlonte Jesús nim xjal at ti'jele, xi tma'n cye t-xnak'tzben tu'n cyic'x jlajxi laguna. 19Ul jun xnak'tzal ti'j ley ex xi tma'n te Jesús:
—Xnak'tzal, chin oquel lpe'ye ti'ja nok jatum ma txi'ya, chi xjal. 20Xi tma'n Jesús te:
—Ke wech at cyjul, ex ke chyu'j at cyk'u'; atzun weye minti' jatum tu'n ncub tane, akine sc'o'maj kine tu'n Dios tu'n ntene cyuc'il xjal, chi Jesús te.
21Ex xi tma'n juntl t-xnak'tzben te:
—Tat, chin tyoma, nej cyjel nmaku'ne nmane, chi xjal.
22Xi tma'n Jesús te:
—Lpe'ca wi'je; k'oncja cye cyimni tu'n tcu'x cymaku'n cycyimni.
We' jun nintz cyk'ik' tu'n Jesús
Marcos 4.35-41; Lucas 8.22-25
23Tejtzun tocx Jesús tuj barc, e oc lpe' ke t-xnak'tzben ti'j. 24Tzaj jun cyk'ik' nimxix tibaj laguna, jaw pulin a' ti'j barc. Pero te Jesús in tan. 25E ultzun lak'e' t-xnak'tzben ttxlaj ex jaw cyc'asun, ex xi cyma'n te:
—Tat, ko tcloma porque ch'ix kxi mulk'aje tuj a', che chi.
26Xitzun tma'n Jesús cye:
—¿Tiku'n in che xobe akeye xinak ch'in cyocslable? Jawtzun we' Jesús, xi tmayo'n cyk'ik' tuc'ix a'; ex bi'x we' tcyakil. 27Atzun cye t-xnak'tzben e labin ti'j, in cyma'n:
—¿Alcyetzun ju xjal lu? Porque tuc'ix cyk'ik' ex a' in xi cyniman tyol.
Cabe xjal aj Gadara at ju'ẍ tuj cyanmi
Marcos 5.1-20; Lucas 8.26-39
28Tejtzun tpon Jesús jlajxi laguna tuj cytx'otx' xjal aj Gadara, oc noj cabe xjal twitz, e etz tuj camposant. At ju'ẍ tuj cyanmi ex puro tx'u'j ke, cyja'tzun mi jun xjal in bet tuj be lu. 29Ex e jaw sch'in ke xjal lu in cyma'n:
—¿Ti toclena ki'je, aya Jesús Tc'wa'l Dios? ¿Maj ma tzula tzalu tu'n kyajlanjtz naje tu'na na'nxtok tpon tk'ijlalil? Che chi.
30Ex ate' txkan boch in che wa'n najchak, nimcu cybet. 31E cubsantzun ke ju'ẍ twitz Jesús:
—Ka ma ko ex tlajo'na cyuj xjal lu, k'ontza permis keye tu'n kxi'ye cyxol boch tu'n kocxe cyuj, che chi.
32Xitzun tma'n Jesús cye:
—Cyxi'ye.
E je'tztzun ke ju'ẍ tuj cyanmi xjal ex e ocx cyuj boch; entons ex cyxo'n cyib boch ttxa'n xak, e cu'pun tzak tuj laguna ex bi'x e naj tuj a'.
33Atzun ke pastor boch e je'l ok, ex tej cypon tuj tnam xi cytx'olba'n tcyakil, ax icx xi cyma'n aju otok baj cyi'j ke xjal at ju'ẍ tuj cyanmi. 34Entons cycyakil xjal tuj tnam e je'tz canil ti'j Jesús; ex tej cylonte, e cubsan twitz Jesús tu'n tex tuj cytanmi.

Currently Selected:

Matey 8: MAMH

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy