Malaquías 3
3
1Chi Kman aju Tajaw Tcyakil: Cxel nsama'ne nsanjele tu'n tcub nej nwitze binchalte be. Aju Cyajawe in che ayone ti'j nok minaben cpol tuj tja, aju tja Dios. Ch'ix tpon sanjel aju cyaj bant ti'j jun yol tu'n cyuc'ile ex aju cyaje tu'n tpon, chi Kman.
2Pero ¿alcye jun jacu tzic'x tu'n tuj k'ij oc tul? ¿Alcye jun jacu ten tipun tu'n tcub we' twitz oc tul? Porque tzul mer ic tza'n jun k'ak' tu'n tbaj tz'e'y tcyakil kbinchben mya ba'n tu'n, ex mer ic tza'n jun jabón tu'n tel tx'jet tz'il ki'j. 3Cbel ke' tu'n cybaj sakset ke pal tiyjil Leví tuj cybinchben mya ba'n, ic tza'n jun xjal nno'cx tk'o'n sak pwak ex k'an pwak tuj k'ak' tu'n tcyaj sakix. Te tibajxitzun jlu, cxel cyk'o'n pal cyoyaj tuj tumelxix te Kman. 4Entons cjawil tzalaj Kman ti'j cyoyaj aj Judá ex ti'j cyoyaj aj Jerusalén, ic tza'n tej tjaw tzalaj ti'j ojtxi.
5Chi Kman aju Tajaw Tcyakil: Chin ule tu'n tcub cycastiwoye wu'ne. Tujx k'ij lu ax kine chin oquel te testiw cyi'j keju ba'n mañ cyu'n, keju in cybincha'n aj pajil, keju nok tten in xi cytziyan jun cyyol, keju mya cabal in xi cychjo'n twi cyc'u'j ke majen, keju in che yajlan cyi'j ke meba xu'j ex cyi'j ke c'wa'l minti' cyman ex cytxu', ex keju in cybincha'n mya ba'n cyi'j stranjer xjal, ex minti' in che niman weye.
Aju tlaji'n ex ke mastl oyaj
6Akine Dios minti' in chin ch'expaje, cyja'tzun minti' ma che naje, akeye tiyjil Jacob. 7Ma tz'el cypa'n cyibe ti'j nleye ic tza'n el cypa'n cyib ke cyxe'chele, ex minti' in xi cynimane. Akine Dios aju Tajaw Tcyakil in xi nma'ne cyeye: Cyajtz meltz'aje wuc'ile ex jacutzun chin aj meltz'aje cyuc'ile. Atzun cyeye in cyma'ne: ¿Tiku'n il ti'j tu'n kaj meltz'aje tuc'ila? 8In xi nkanine cyeye: ¿Jacupelo bant tu'n ncub elk'a'ne tu'n jun xjal, akine Dios? Atzun cyeye ma txi cyelk'a'ne aju at woclene ti'j. Ex cucx ttzaj cykanine: ¿Titzun ma kelk'aye teya? Che chiye. Aju ma tz'el cyelk'a'ne, atzun aju tlaji'n ex mastl oyaj weye. 9Ax toc akeye aj Israel, cycyakile ma txi cyelk'a'ne aju at woclene ti'j; tu'n tlaj jlu ctzajel mya ba'n cyibaje wu'ne. 10Cyintze tcyakil tlaji'n tuj c'ubl te, tu'ntzun mi'n tcub naj wabj tuj njaye. Chin cyk'o'nque tuj malbil ti'j jlu, ka ma tzaj cyi'ne tlaji'n, che elel njako'ne ke tventanil cya'j tu'n t-xi nk'o'ne nimxix nxtalbile cyeye. 11Mlay txi nk'o'ne ambil cye ke ẍplon tu'n tbaj cywa'n cyawale ex mlay tzaj tz'ak twitz cy-uvaye ka na'nxtok tul tk'ij. 12Cycyakil mastl nasyon oc cyma' cyja': At tzalajbil cyeye tu'nju tbanilxix cytx'otx'e, che chilo. Akine Dios aju Tajaw Tcyakil in chin k'mante jlu.
Aju tk'ak'bil tc'u'j Dios cyi'j ke xjal etzan tu'n
13Chi Kman in tma'n: Cyuw o che yoline wi'je, ex in tzaj cykanine weye: ¿Alcyetzun yol mya ba'n o txi kma'ne ti'ja? Che chiye. 14O cymaye cyja': Nokx gan tu'n kajben te Dios ex ¿alcyetzun ba'n jacu kcamba ka ma txi kniman tley, ex ti tajben ke tu'n kbet tuj bis twitz Kman aju Tajaw Tcyakil? 15In kile at tzalajbil cye ke xjal in jaw cyniman cyib, ke binchal mya ba'n puro ba'n nne'la tcyakil cye, ex minti' castiw in tzaj cyi'j keju nno'c cyk'o'n Dios tuj malbil, che chiye.
16Ke xjal nimal Dios e yolin cyxolx ex e cub bi'n tu'n Kman. Twitz Kman o tz'ibet jun libro jatum in che tzaj na'n ke xjal ba'n che niman te Kman ex in che ximan ti'j. 17Tuj tk'ijlalil oc tbant jlu wu'ne, che oquel te jun tnam etzan wu'ne, ex ctzajel k'ak'an nc'u'je cyi'j ic tza'n jun mambaj in tzaj tz'e'y tc'u'j ti'j tc'wa'l in ajben te, chi Kman aju Tajaw Tcyakil. 18Atzun c'elel cynic'e ti'j ka mya junx ta' ju xjal ba'n tuc'il ju xjal mya ba'n, ex mya junx ta' ju xjal in c'ulun te Dios tuc'il ju xjal minti' in c'ulun te.
Currently Selected:
Malaquías 3: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993