Jueces 20
20
Oc k'oj cyi'j aj Benjamín
1Cycyakiltzun aj Israel, tzajx ke' tuj Dan ex pon baj max tuj Beerseba, ax icx ke aj Galaad, oc cychmon cyib tuj Mizpa twitz Kman, ex junxtok cyximbetz cycyakil. 2Cycyakil ke nejenel cye cyiyjil aj Israel ate'tok cyxol ke xjal etzan tu'n Dios, ex japun jun cyajlal te cyaje syent mil soldad k'i'mlex spad cyu'n, tu'n cykan in che bet. 3O cybi tiyjil Benjamín ka otok baj cychmon cyib txkantl cyiyjil aj Israel tuj Mizpa. Atzun cye aj Israel xi cykanin te xinak aj Leví tza'n tten cyim t-xu'jil cyu'n xjal. 4Atzunte aj Leví, aju tchmil ktzan xu'j, xi tma'n cye:
—Akine tuc'ix nxu'jile o pone tuj tnam Gabaa, jun tnam cye tiyjil Benjamín, tu'n tex ak'bil ku'ne ma chixin. 5Pero tujx konic'an lu, akeju xjal najlke tuj tnam baj cytxolban cyib ti'jele ja jatum in ko posadiyine, tu'n ncub byone cyu'n; e oc ten ti'j nxu'jile ex tu'n tlaj jlu bi'x cyim. 6Atzun weye, tzaj wi'ne t-ximlal ktzan nxu'jile, baj npaẍu'ne ex xi nsama'ne jun piẍ tuj cytx'otx' teyle junjun c'loj cyiyjil aj Israel, tu'ntzun cybinte cycyakil aj Israel aju binchben lu jumajx mya ba'n. 7Atzun ja'lo, como aj Israel keye, tuj cycwente cyjel ten tu'n cyximane ti'j ex tu'n cymanteye alcye tu'n tbant cyu'ne, chi aj Leví.
8Cycyakiltzun tnam xjal junx cyximbetz e jaw we' ex cyma:
—Mi jun ke ba'n tu'n taj meltz'aj tuj tja xbalun ex ka tja. 9Aju cbantel ku'n, o'cx tu'n tjaw ki'n swert ti'j alcye ke che oquel tzokpaj ti'j tnam Gabaa. 10Cyxol cycyakil cyiyjil aj Israel cjawil ksc'o'n jun cyxol lajchak xinak, ex atzun ke jlu che xe'l jyolte wabj cye soldad; atzun ke mastl che xe'l tuj tnam Gabaa, tu'ntzun t-xelin cyi'j aj Gabaa aju mya ba'n ma cybincha cyxol aj Israel.
11Cycyakil aj Israel oc cychmon cyib, junx cyximbetz, tu'ntzun cyoc tzokpaj ti'j tnam. 12Xi cysama'n ke sanjel tuj tcyakil tx'otx' cye tiyjil Benjamín, tu'ntzun t-xi cyma'n cye cyja': ¿Ti tten ma bant aju mya ba'n lu cyxole? Che chi. 13Cyk'ontze ke xinak jumajx mya ba'n ate' tuj tnam Gabaa, tu'ntzun cycub kbyo'ne ex tu'ntzun cysakset aj Israel tuj mya ba'n.
Atzun cye tiyjil Benjamín minti' xi cybi'n cyyol cyerman ax aj Israel, 14nok o'cx cycyakil tiyjil Benjamín e tzaj cyuj cycyakil cytanmi, oc cychmon cyib tuj tnam Gabaa tu'n cyxi' k'ojlel cyi'j txkantl aj Israel. 15Ke soldad e tzaj cyuj cycyakil tnam cye aj Benjamín, japun jun cyajlal te 26 mil cybaj, ex minti' e oc te tajlal akeju wuk syent xinak mas at cynabl tuj k'oj otok che jaw sc'o'n ax tuj tnam Gabaa. 16Cyxol cycyakil ke xinak lu attok wuk syent tu'n cynayaj ba'n che ak'nan, ex mejorxix che xo'n tu'n xobl, ax icx jacu tza'w jun ttzmal wibaj cyu'n tu'n jun xobl abj ex mlay tz'el ti'j tu'n mi'n ta'w. 17Atzun cye txkantl aj Israel o baj cychmon cyib, cyaje syent mil xinak elni ke twitz k'oj ex at cynabl tu'n cyk'ojin.
Aju k'oj oc cyi'j tiyjil Benjamín
18Atzun cye aj Israel e je'x tuj Betel, ex atzun xi cykanin te Dios tu'n tel cynic' ti'j alcye jun c'loj cyiyjil tu'n toc tzokpaj tnejel cyi'j tiyjil Benjamín. Atzunte Kman tzaj ttzak'we'n cye ka ake tiyjil Judá tu'n cyoc tzokpaj tnejel. 19Cyja'tzun tten, primxix e jaw we' aj Israel ex e cub ten tumlal twitz tnam Gabaa. 20E je'xtzun k'ojlel cyi'j tiyjil Benjamín, ex baj cytxolban cyib twitz tnam Gabaa tuj txolin cyten. 21Atzun cye tiyjil Benjamín e etz tuj tnam, ex tuj k'ij lu cub cybyo'n 22 mil soldad aj Israel. 22-24Cyja'tzun, e je'x aj Israel tuj Betel ok'el twitz Kman tejxi ttzaj klolj, ex atzun xi cykanintl te ka tu'n cyoc tzokpaj juntl maj cyi'j ke cyerman, akeju tiyjil Benjamín. Como tzaj tma'ntl Kman tu'n cyoc tzokpaj juntl maj, cyja'tzun oc cyipuntl, ex tuj juntl k'ij e pon juntl maj k'ojlel cyi'j aj Benjamín tujx lugar jatum e cub ten nej. 25Pero tuj tcabinmaji'n e je'tz aj Benjamín tuj Gabaa tu'n cyoc tzokpaj cyi'j ex e cub cybyo'ntl wajxaklaj mil soldad aj Israel k'i'mlex cyspad. 26E je'xtzun cycyakil soldad aj Israel cyuc'ix cycyakil tnam xjal juntl maj tuj Betel tu'n cyoc ten ok'el twitz Kman. Tuj enter k'ij minti' e wa'n ex xi cyk'o'n ke oyaj patun in che cub cyuc'ix ke chojbil te mojbabl tibil.
27-28Tuj tk'ijlalil lu aju cax c'ubl tley Dios atzun ta'tok tuj Betel, ex aju pal in ajbentok twitz, atzun Finees aju tcy'ajal Eleazar ex tal tchman Aarón. Xi cykanintl aj Israel te Kman cyja': ¿Ocpe ko oquel tzokpaje k'ojlel juntl maj cyi'j ke kermaniye, akeju tiyjil Benjamín, ex ka mi'n? Atzunte Kman tzaj tma'n cye: Cyoc tzokpaje cyi'j, porque nchi'j che'x nk'o'ne tuj cyk'abe.
29Xi cyewan cyib txkan soldad aj Israel ti'jele tnam Gabaa, 30acux in bet cyxi' mastl tu'n cyk'ojin cyi'j aj Benjamín, ex tuj toxin k'ij baj cytxolban cyib twitz tnam Gabaa ic tza'nx otok cybincha cabe maj. 31E etz juntl maj tiyjil Benjamín tuj tnam, e je'l lak'e' ti'j tnam tu'n cyoc tzokpaj k'ojlel cyi'j aj Israel, ex cub cybyo'ntl balo 30 aj Israel tuj tbeyil Betel, ax icx tuj tbeyil Gabaa ex tuj cojbil; 32tuj cywitz ka in che oktok aj Israel cywitz, ex otok cub cyi'j cyu'n ic tza'nx otok che tenba cyu'n cab maj. Atzun cye aj Israel nok cyja' e je'l lak'e' ti'j tnam tu'ntzun cyxi lpe' aj k'oj cyi'j cyuj ke be. 33Atzun cye aj Israel jurat e je'tz jatum ate'tok ex baj cytxolban cyib tuj k'oj tuj Baal-tamar; ax icx keju cyewantok cyib tuj chk'ajlaj ti'jtzi tnam Gabaa e je'tz jatok cyewan cyib, 34ex e oc tzokpaj ti'j tnam. Laj mil cybaj aj Israel, akeju at-xix cyipun tuj k'oj e oc tzokpaj ti'j tnam Gabaa. Cyuwxix k'oj oc, ex atzun ke tiyjil Benjamín minti'tok ba'n cyu'n ka cyja'tok tu'n cynaj. 35Ate Kman tzaj k'onte cye aj Benjamín tuj cyk'ab aj Israel, ex tuj k'ij lu e cub cybyo'n aj Israel 25 mil tuc' jun syent soldad tiyjil Benjamín k'i'mlex cyspad. 36Eltzun cynic' ke tiyjil Benjamín ti'j ka otok cub cyi'j.
Ke aj Israel nok cyja' e je'l ok cywitz aj Benjamín, porque k'ukltok cyc'u'j cyi'j ke xinak otok txi cyewan cyib tu'n cyoc tzokpaj ti'j tnam Gabaa. 37Ake jlu nok minaben e oc tzokpaj ti'j tnam Gabaa ex e cub cybyo'n tu'n spad cycyakil ke xjal ate' tuj. 38Akeju otok txi cyewan cyib tu'n cyoc tzokpaj ti'j tnam, otok bant ti'j cyu'n cyuc'il txkantl aj Israel, ka ma jaw bukin txkan sib, atzun jun techal ka otok tzyet tnam cyu'n. 39O cybincha aj Israel mer ic tza'n otok che el ok, ex tej cyque'yinte txkan sib in bukin tjaw, e ajtzun meltz'aj tu'n cyoc tzokpaj cyi'j tiyjil Benjamín.
Ke tiyjil Benjamín cub cybyo'n 30 aj Israel, ex tu'ntzun jlu o ke' cyc'u'j, tuj cywitz ka otok cub cyi'j aj Israel cyu'n, ic tza'nx tuj tnejel k'oj otok tz'oc cyu'n; 40pero tejtzun tjaw t-sibel tnam, ex tej taj cyque'yin aj Benjamín cyi'jxi, lu tk'ak'al ex t-sibel tnam otok japun twitz cya'j. 41E ajtztzun meltz'aj aj Israel tu'n cyoc tzokpaj cyi'j tiyjil Benjamín, ex atzun cye aj Benjamín tzaj nim cyxobil tej tel cynic' ti'j mya ba'n otok tzaj cyi'j. 42E je'ltzun ok cywitz aj Israel tuj be in xi' tuj tzkij tx'otx'; minti'tok tumel tu'n cyclet, porque e je'tz aj Israel cyuj tnam, in che tzyet-xi tiyjil Benjamín cyu'n ex in che cubxi cybyo'n. 43Baj cytxolban cyib aj Israel cyi'jele tiyjil Benjamín, e oc lpe' cyi'j ex e cub cybyo'n, xi'x ke' tu'n cybyet tuj lugar Menúha ex pon baj max tuj tjawitz k'ij te tnam Gabaa.
44Cyja'tzun e cyim wajxaklaj mil soldad tiyjil Benjamín; cycyakil ke jlu cyuw cyc'u'j tuj k'oj. 45Atzun ke mastl e aj meltz'aj ex e je'x ok tuj tzkij tx'otx' tumlal pic Rimón tbi, pero e cub byo'n jwe' mil tuj be. Atzun cye aj Israel cucx e je'x lpe' cyi'j, ex cub cybyo'ntl cabe mil xinak. 46E cyim 25 mil soldad tu'n tcyakilx tuj k'ij lu, tiyjil Benjamín ke, cycyakil ke jlu cyuw cyc'u'j tuj k'oj. 47Pero at kak syent tiyjil Benjamín e je'x ok tuj tzkij tx'otx' ex axtzun e cyaj ten cyaje xjaw tuj pic Rimón tbi. 48Atzun cye aj Israel e oc tzokpaj cyi'j mastl tiyjil Benjamín tuj teyle junjun tnam, e cub cybyo'n cycyakil tu'n spad, cyuc'ix ke alumaj tuc'ix tcyakilju o cnet cyu'n, ex oc cyk'o'n cyk'ak'al tnam.
Currently Selected:
Jueces 20: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993