Ecl 1
1
Ronojel xa q'axel
1Yin Salomón ri ninch'abalij ruch'abel ri Dios; in ruk'ajol kan ri David, in rey richin ri tinamit Jerusalem. Jare' k'a ri nuch'abel.
2Ronojel xa nik'is, ronojel xa q'axel, keri' nubij ri ch'abaliy ruch'abel ri Dios,
ronojel xa nik'is, ronojel xa q'axel. Kan ronojel-wi q'axel.
3Roma, ¿achike ta k'a nuch'ek jun achin ri janila nisamej chuwech re ruwach'ulew chuxe' ri ruk'atanal ri q'ij?
4Qonojel roj winaqi' kan yojken k'a el,
y ek'o k'a ri ye'alex,
jak'a ri ruwach'ulew man jun bey xtijalatej.
5Nel-pe ri q'ij y niqaqa ri q'ij,
y junanin nibe richin napon chik ri akuchi xel-wi-pe.
6Ri kaq'iq' nibe k'a pa xokon,
nijumin k'a nibe richin napon chik pa xaman ri akuchi xel-wi-pe.
Y keri' nuben jantape' richin nusutij-rij ri ruwach'ulew.
7Ronojel ri raqen taq ya', chupan ri palou ye'apon-wi,
jak'a ri ya' ri' man jun bey ninoj.
Xa kan akuchi k'a eleneq-pe ri ya' ri',
xa kan chiri' chik xtapon-wi richin xkebebiyin jun bey chik.
8Ronojel ri k'o xa kan k'o kosik ri ruk'amon-pe
y ronojel re' ri wineq man tikirel ta chuwech chi nutzijoj;
ri wineq xa kan nurayij ruwech ronojel ri nutzu'
ronojel ri nrak'axaj kan nurayij-qa.
9Ri banobel ri xeq'ax yan, xkebek'ulun chik pe
Ri banobel ri xeban yan ojer, xkebanatej chik ri chiqawech-apo.
Xa man jun ri k'ak'a' ta ri nibanatej chuwech re ruwach'ulew.
10Roj man yojtikir ta k'a niqabij, re' kan k'ak'a-wi;
roma re' xa kan xk'oje' yan ri ojer, ri xq'ax yan.
11Ronojel ri banobel ri xeq'ax yan xa man ye'oqaqa ta chik chiqak'u'x,
y ronojel ri banobel kichin ri winaqi' ri xkepe chiqawech-apo
xa man xtoqaqa ta chikik'u'x ri winaqi' ri xkek'oje' kan chikij rije'.
Ri xuq'axaj ri xch'abalin ri ruch'abel ri Dios
12Yin ri ch'abaliy ri ruch'abel ri Dios xinok k'a rey richin ri Israel ri chiri' pa Jerusalem. 13Yin kan rik'in k'a na'oj xinjech ri wánima chukanoxik y chunik'oxik ronojel ri nibanatej chuwech re ruwach'ulew. Y re samaj re' ri ruya'on kan ri Dios chiqe, kan janila k'ayew richin niqaben. 14Xintz'et k'a ronojel ri samaj ri niban chuwech re ruwach'ulew chi maneq rejqalen. Xa man yatikir ta nawil ri nawajo', xa kan achi'el ta nawajo' nachop ri kaq'iq'. 15Ri kotokik chik, man yatikir ta naben choj chire y ri xa man jani k'o awik'in man jani ruk'amon chi nabij chi k'o chik awik'in.
16Yin kan xinbij k'a pa wánima: Kan janila nuq'ij, kan xk'oje' nim nuna'oj chikiwech ri ch'aqa' chik rey ri xek'oje' yan el pa Jerusalem roma xk'oje' nuna'oj y wetamabal. 17Kan xinjech k'a wi' richin xinwetamaj rukojol ri na'oj y ri ch'ujerik. Xintz'et k'a chi ronojel q'axel y xa man yatikir ta nawil ri nawajo', xa kan achi'el ta nawajo' nachop ri kaq'iq'. 18Y keri' toq k'iy chik na'oj k'o awik'in, re' xa man nuben ta chawe chi nikuqer ak'u'x rik'in ri nach'ob. Y ri nuya' chik q'anej más etamabel pa ruwi' xa nuk'en-pe janila q'axo'n chire.
Currently Selected:
Ecl 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.