Ecl 2
2
1Yin kan xinch'ob-qa chi wakami ninya' k'a chire ri wánima ronojel ri nurayij. Y jari' xinben. Jak'a xintz'et chi re' xa q'axel chuqa'. 2Y yin chuqa' xinbij k'a chire ri tze'en: Rat xa yach'ujirisan y chire ri kikoten xinbij: Rat xa man jun utz nak'en-pe, xicha'. 3Yin xinwajo' xinwetamaj wi ruk'amon naqum k'iy vino chupan ri ka'i-oxi' q'ij chire ri qak'aslen. Xinben xaxe roma xinwajo' xinwetamaj re', jak'a man xiq'aber ta roma keri' xinwajo'. Y xintz'et chi ri vino chuqa' man jun nuk'en-pe chawe. 4Xinju' k'a wi' chuxe' nimalej taq samaj, xenbanala' k'a q'anej nima'q taq wachoch richin ninq'et-tzij, chuqa' xenbanala-qa nutiko'n richin uva, 5xenbanala-qa nutiko'n chupan ri nuqejoj y xinben chuqa' kutzil ri akuchi xentik-qa kotz'i'j. Y chupan k'a re' xentikila' ronojel ruwech che' ri yewachin. 6Xenben nima'q taq yakbel-ya', richin chi chiri' nink'en-wi ya' richin yenya'aj ri che' ri e nutikilon-qa. 7Xenloq' nusamajela' chi achi'a' chi ixoqi' ri xeyuqe' pa samaj wik'in y chuqa' ek'o xe'alex pa wachoch. Kan e k'iy nuwákix y nukarne'l xek'oje' y kan man jun chik xk'oje' pa Jerusalem achi'el ta yin. 8Xinch'ek k'a janila chi q'anapueq y saqipueq y ri beyomel ri e kik'amalon-pe ri ch'aqa' chik rey kichin ch'aqa' chik ruwach'ulew. Xek'oje' e k'iy nubixanela' chi achi'a' chi ixoqi'. Y kan xinben ri achike ri rurayibel ránima jun achin: Ri qumuj vino y janipe' chi ixoqi' ri xenwajo'. 9Yin kan janila k'a xnimer nuq'ij chikiwech ri winaqi' y kan janila xibe pa jotol rik'in ronojel ri xk'oje' wik'in, más chikiwech ri e rey ri xek'oje' chinuwech yin re wawe' pa Jerusalem. Y man xaxe ta ri xk'oje' wik'in, xa kan jantape' k'a xk'oje' ri na'oj wik'in. 10Y ronojel k'a ri rayixel ri xintzu' kan xinben y chuqa' ronojel ri kikoten ri xurayij ri wánima xinben, roma ri wánima kan xuxlan k'a toq xinben ronojel ri nurayij. Jare' ri xinch'ek chire ronojel ri nusamaj.
11K'ari' chi'anin xintz'et ronojel ri nima'q taq samaj ri xenben yin, chuqa' ri samaj ri janila k'ayew xuben chinuwech y re' xintz'et chi xa ronojel q'axel, y xa man yitikir ta ninwil ronojel ri ninwajo'. Y re' xa man jun nuk'en-pe chuwe chuwech re ruwach'ulew.
Ri na'oj kan k'o nuk'atzinej-wi
12Y k'ari' k'a xinch'ob rij re na'oj re'; ri ch'ujerik y ri banobel ch'obon man ch'obon ri xenbanala'. Roma ¿achike k'a xtitikir xtuben-q'anej ri xtiq'aton kan tzij chuwij yin? Xa junan ri xtuben rija' rik'in ri xinben yin. 13Yin xintz'et k'a chi ri na'oj más rejqalen chuwech ri ch'ujerik, achi'el ri saqil más rejqalen chuwech ri q'equ'm. 14Ri wineq aj-na'oj kan ronojel k'a nutz'et rik'in ri runaq'-ruwech, y ri nakanik xa pa q'equ'm nibiyin-wi. Man rik'in ri' chi e ka'i' xa pa kamik ye'apon-wi.
15K'ari' xinbij-qa pa wánima: Ri man aj-na'oj ta xa niken y keri' chuqa' xtink'uluwachij yin ¿Achike k'a nik'atzin-wi chi yin janila xintej nuq'ij richin xk'oje-el na'oj wik'in? Y roma ri' xinch'ob-qa chi re' xa kan q'axel chuqa'. 16Roma ni ri k'o runa'oj ni ri maneq runa'oj xtik'oje' ta kan kinatabal richin q'asen, roma toq niq'ax ri q'ij xa ronojel nimestex y keri' niken ri k'o runa'oj y niken ri maneq runa'oj. 17Roma ri' yin xinwetzelaj k'a ri k'aslen, roma ronojel ri samaj ri nibanatej chuwech re ruwach'ulew xa kan xik'o yan nuk'u'x chire, roma xa ronojel q'axel y xa man yatikir ta nawil ri nawajo'. 18Chuqa' kan xinwetzelaj ronojel samaj ri xinben chuwech ri ruwach'ulew, ri kan k'o chi xtinya' kan chire ri q'atoy-tzij ri xtok kan pa nuk'exel yin. 19Y kan man wetaman ta k'a, wi ri achin ri xtuben-qa richin chire ronojel ri nusamaj ri xinben rik'in janila ruk'ayewal chuwech re ruwach'ulew, k'o runa'oj ó xa maneq. Ronojel re' kan q'axel chuqa'.
20Toq xintz'et ronojel ri samaj ri akuchi xinkusaj-wi ri nuna'oj xa xinmalij nuk'u'x; 21roma jun achin ri nisamej rik'in na'oj, rik'in etamabel y rik'in ruchojmilal k'o chi nuya' kan ri rubeyomel chire jun chik ri xa man jun xuben chuch'akik. Re' chuqa' xa kan q'axel y man ruk'amon ta. 22Roma, ¿achike ta k'a nuch'ek ri achin ri janila nisamej y janila niququt chubanik ronojel ri nik'atzin chire chuwech re ruwach'ulew? 23Roma ronojel q'ij richin ri ruk'aslen ri wineq xa kan xaxe q'axo'n, y kan jantape' k'o pa ránima ri rusamaj, ni ta ri chaq'a' man nuxlan ta ri ránima, chuqa' re' xa kan q'axel y man jun rejqalen.
24Ri más jebel chire ri achin ja ri nutej, nuqum y kan nikikot ránima rik'in ri nuk'ul rik'in ri rusamaj ri rubanon. Y re' kan nuben chuwe chi kan niq'ax chinuwech chi jare' ri rurayibel ri Dios chire ri wineq. 25Roma, ¿achike ta k'a ri niwa' y nikikot wi man ta keri' nrajo' ri Dios? 26Roma ri Dios k'o nuya' chire ri wineq ri niqa' chuwech rija': Nuya' na'oj, ronojel ruwech etamabel y kikoten, jak'a chire ri wineq aj-mak nuya' q'ij chi janila k'iy numol richin chi nuya' kan chire ri qajineq chuwech ri Dios; chuqa' re' xa kan q'axel y xa man yatikir ta nawil ronojel.
Currently Selected:
Ecl 2: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
