Sal 99
99
Ri Jehová ja rija' ri rey
1Ri Jehová ja rija' ri rey.
Roma ri' kan tik'oje' k'a rukiy rija' chikiwech ri tzobaj winaqi' richin ri ruwach'ulew.
Rija' kan tz'uyul k'a chikikojol ri querubín richin nuq'et-tzij.
Y roma ri' chijun ri ruwach'ulew kan nisilon.
2Ri Jehová k'o nimalej ruchuq'a' chupan ri tinamit Sión.
Chuqa' keri' rubanon pa kiwi' ri ch'aqa' chik tinamit.
3Kan tibixex k'a ri rubi' roma rija' kan janila nim y kan k'o rukiy.
Kan man jun chik k'o achi'el rija'.
4Ri rey kan niqa' chuwech ri ruchojmilal.
Kan ja rija' ri yoyon re ruchojmilal re' pan Israel.
Kan xuben k'a ri ruchojmilal y ri q'atoj-tzij pa kiwi' ri winaqi' israelita.
5Tinimirisaj ruq'ij ri Jehová ri qa-Dios.
Kan tixuku-timeja-iwi' chuwech, roma kan xaxe-wi rija' ri loq'olej.
6Ri Moisés y ri Aarón kan jeri' ri xe'ok ru-sacerdote,
Ri Samuel jari' ri nich'on pa kiwi' ri winaqi' rik'in rija'.
Rije' kan xech'on k'a rik'in ri Jehová, y rija' kan xerak'axaj k'a pe.
7Chupan k'a jun sutz' pa'el chikaj xch'on kik'in.
Ri pixa' ri xuya' rija' chike, kan jari' ri xkitaqej.
8Jehová ri at qa-Dios roj, rat kan xak'uluba' k'a pe ri kich'abel.
Rat kan xatok k'a chike rije', jun Dios ri kan kuyunel,
stape' xaya' tijoj-poqonal pa kiwi' rije' roma ri kimak.
9Tinimirisaj ruq'ij ri Jehová ri qa-Dios.
Tiqasaj k'a iwi' chuwech rija',
roma ri Jehová ri qa-Dios roj kan loq'olej-wi.
Currently Selected:
Sal 99: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
