Sal 76
76
Ri Dios richin ch'akonik*f74*
1Ri Dios kan janila etaman ruwech chupan ri ruwach'ulew Judá;
ri rubi' rija' kan nimirisan k'a chupan chijun ruwach'ulew Israel.
2Ri rachoch, kan pa Jerusalem k'o-wi,
rija' kan chiri' pa juyu' Sión k'es-wi.
3Chiri' k'a xeruq'ej-wi ri kokoj raqen ch'ab ri kan yekamisan,
xeruq'ej chuqa' ri tobel, ri espada y ronojel ruwech kamisabel.
4Nimalej Dios, rat kan nim k'a ri aq'ij-ak'ojlen.
Ri ak'ojlemal kan más k'a nim ke chuwech ri juyu' ri kan ek'o richin q'asen.
5Ri achi'a' ri kan man nikixibij ta ki', xa kan xelesex k'a ronojel chike;
xa xepunupuxin kan, y man jun bey chik xkeyakatej-el,
ri kiq'a' ri achi'a' ri', xa kan xetuqutu' k'a qa.
6Rik'in ri ach'olinik rat Jehová,
kan xek'is k'a ri ki-carruaje y ri kikiej.
7Kan xaxe wi k'a rat ri k'o akiy
¿Achike ta k'a wineq xtitikir xtupaba-ri' chawech toq awoyowal?
8Kan k'a chila' chikaj xaya-wi-pe ri ruchojmilal,
y konojel ri winaqi' chuwech re ruwach'ulew kan xkixibij-ki', y kan jun k'a xek'oje-wi.
9Kere' k'a xbanatej toq rat nimalej Dios xayakatej richin xaq'et-tzij,
richin chi xe'akol konojel ri xetz'ilox.
10Kan qitzij wi chi chupan ri royowal ri wineq, xa kan ninimer ri utzilej atzijol rat.
Kan ja rat xkaqasan ruwi' ronojel ri ch'aqa' chik oyowalen.
11Jak'a roj kan xtiqaya' ri xtiqasuj chire ri Jehová;
konojel ri ek'o chunaqaj, tikik'ama-pe sipanik chire ri kan k'o-wi rukiy.
12Ja ri Jehová nelesan kik'aslen ri aj-raqen;
kan nuben chike ri rey chi nik'oje' rukiy rija' chikiwech.
Currently Selected:
Sal 76: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
