Sal 58
58
Ruk'utuxik ri rutojbalil mak pa kiwi' ri e banoy etzelal*f56*
1Rix nima'q taq achi'a', ¿kan qitzij kami chi rix niq'et-tzij pa ruchojmilal?
¿Kan qitzij kami chi kan choj ri ibanobal?
2Xa man keri' ta, xa kan pa taq iwánima nalex-pe ri etzelal.
Xa kan ich'obon chik k'a achike chi etzelal ri xtibebana' pa qaruwach'ulew.
3Rix ri ix banoy etzelal kan pan isanti'il k'a xich'er yan iwi'.
Kan xaxe k'a toq xixalex, xich'er kan iwi' richin ri tz'ukuj-tzij.
4Ri ich'abel rix achi'el ri kamisanel ya' ri nel pa ruchi' ri kumetz,
kan achi'el ri kumetz ri nuben chi man nrak'axaj ta,
5ri kan man nrak'axaj ta ri ruch'abel ri aj-itz,
stape' kan jun aj-itz ri kan jebel nuben richin nuqasaj-ruq'ij ri kumetz.
6Nu-Dios yin, tawulaj-el key ri e banoy etzelal,
tawulaj-el key ri kan achi'el koj nikiben chuwij.
7Kan ta k'a xtaben chike chi xkek'is-qa achi'el nuben ri ya' toq nibiyin-el.
Toq nikik'eq ri kokoj taq ch'ab, kan ta k'a xtaq'ej chikiwech.
8Kan ta k'a xkek'is rije' achi'el ri chikop ri nibix pur chire, ri eqal-eqal nik'is-qa.
Man ta k'a xtikitz'et ri saqil, achi'el jun ak'ual ri kamineq xalex.
9Ke'ak'uqu-el achi'el ri k'ix ri man jani k'o ruk'ixal,
ke'ak'uqu-el rik'in ri awoyowal, achi'el xa ta juwi' k'ix ri nik'uq-el roma ri surkum.
10Ri kan choj kik'aslen kan xkekikot k'a toq xtikitz'et re'.
Kan xtimu'e' k'a ri kaqen chupan ri kikik'el ri aj-maki'.
11K'ari' xtikibij ri choj kik'aslen:
Qitzij na wi kan k'o nuch'ek ri jun ri kan choj ruk'aslen;
kan qitzij na wi chi k'o jun Dios ri niq'aton-tzij pa ruwi' ri ruwach'ulew, xkecha'.
Currently Selected:
Sal 58: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
