Sal 50
50
Ri qitzij rubanik richin niqaya' ruq'ij ri Dios*f48*
1Ri Jehová ri k'o ruq'ij chikiwech ch'aqa' chik dios nich'on,
yeroyoj k'a konojel winaqi' richin chijun ruwach'ulew,
nitiker-pe pa relebel-q'ij y napon k'a pa qajbel-q'ij.
2Ri Dios, rik'in ri rusaqil nuk'ut chi rija' kan k'o chiri' pa tinamit Sión,
chupan ri tinamit ri kan jebel nitzu'un.
3Ri qa-Dios nipe k'a rik'in nimalej rutzijol.
Chuwech rija' peteneq jun q'aq' ri kan nuk'is ronojel.
Y pa runik'ajal jun nimalej kaq'iq', chiri' peteneq-wi rija',
4Rija' xkeroyoj k'a ri kaj y ri ruwach'ulew,
xkeroyoj richin tikitz'eta' toq xtuq'et-tzij pa ruwi' ri rutinamit.
5Ri Dios xtuteq rubixik chi tikimolo-ki' ri winaqi' ri e ruch'aron rija',
ri xkiben jikibel-tzij rik'in rija' toq xkisuj kamelabel.
6K'ari' ri kaj xtuq'alajirisaj k'a ri ruchojmilal richin rija',
roma kan ja ri Dios ri qitzij q'atoy-tzij.
7Rija' nubij chiqe: Tiwak'axaj k'a nuwinaq yin, roma kan xkibech'on iwik'in.
Tiwak'axaj k'a israelita, roma xtinbenq'alajirisaj ri ibanobal.
Ja yin ri in Dios, ri i-Dios rix.
8Man yixinch'olij ta roma ri isipanik,
ni man roma ta ri chikopi' ri ye'iporoj jumul, ri jantape' ek'o chinuwech yin.
9Man nink'utuj ta k'a chiwe ri achija' taq wákix,
ni ta ri taq tzuntzun ri ek'o iwik'in,
10roma xa kan ja yin ri in rajaw konojel ri chikopi' ri ek'o pa k'echelaj;
keri' chuqa' konojel ri jalajoj kiwech taq chikopi' ri ek'o pa taq q'ayis.
11Kan wetaman k'a kiwech konojel ri aj-xik' taq chikopi' ri e richin pa juyu'.
Konojel k'a ri yebiyaj chuwech ri ruwach'ulew kan e wichin yin.
12Wi ta yin yinum, man ta ninbij chawe rat,
roma kan wichin yin ri ruwach'ulew y ronojel ri k'o chuwech.
13Yin kan man nintej ta rutijul ri bóyix,
ni man ninqum ta kikik'el ri tzuntzun.
14Ri abix richin matioxinik, jari' ta ri sipanik chire ri Dios.
Kan tabana' k'a ronojel ri asujun chire ri nimalej Dios.
15Y kan kinawoyoj k'a chupan ri q'ij richin tijoj-poqonal.
Y yin kan xkatinkol y rat kan xtaya' nuq'ij.
16Jak'a chike ri e banoy etzelal, kere' k'a ninbij:
Rix man ruk'amon ta chi ninatala' ri nupixa',
ni man ruk'amon ta ninataj ri nujikibel-tzij.
17Rat xa nawetzelaj ri ruchojmilal ri ninya' yin.
Xa naben chire ri nuch'abel chi kan man jun rejqalen.
18Wi natz'et jun eleq'om, kan chi'anin nawachibilaj-el.
Kan junan k'a awech naben-el kik'in ri nikiben ixoqinik.
19Kan ruyon k'a itzel taq ch'abel ri nabila',
y kan xaxe q'oloj ri nabanala'.
20Ach'obon k'a richin yach'on itzel chirij ri awach'alal.
Natz'uk tzij chirij ri xa junan ate' rik'in.
21Ja ronojel re' ri abanobal y yin kan man jun nubin.
Roma ri', rat kan ach'obon k'a chi yin in junan awik'in rat.
Wakami k'a xkatinch'olij, y xtinq'alajirisaj chawe ronojel ri abanobal.
22Chi'iwonojel ri imestan kan ri Dios, tiq'ax k'a chiwech wakami;
man xa xkixink'ajij y kan man jun k'a xkixkolon pa nuq'a'.
23Ri sipanik ri niqa' chinuwech, ja ri matioxinik ri nipe pan iwánima.
Y wi rix choj xkixbiyin chinuwech yin, kan xkixinkol k'a.
Currently Selected:
Sal 50: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
