Sal 42
42
Ri wánima kan nichaqchi'in chire ri ruch'abel ri Dios*f41*
1Achi'el ri masat nrajo' nril jun raqen-ya' richin nuqum ruya',
keri' k'a yatinkanoj rat, nu-Dios yin.
2Kan yatinkanoj k'a rat k'aslik Dios.
¿K'a janipe' kami xkitikir xkibe chupan ri awachoch richin ninya' aq'ij?
3Kan chi paq'ij chi chaq'a' k'a yinoq' chawech rat.
Ri woq'ej jari' ri nuway.
Jak'a ri winaqi' chaq palik nikibij chuwe: ¿Akuchi k'a k'o-wi ri a-Dios richin yaruto'?
4Toq noqaqa chinuk'u'x ronojel re', kan achike na k'a nuben ri wánima.
Noqaqa k'a chinuk'u'x ri ojer toq in beneq kik'in ri tzobaj winaqi',
y yenk'uaj k'a chupan ri awachoch.
Y qonojel kan yojnimaq'ijun k'a,
y ri qabix kan richin k'a kikoten y matioxinik.
5¿Achike roma yimayamo' yan qa?
¿Achike roma janila yibison?
Yin kan nukuquban nuk'u'x rik'in ri Dios,
y kan beneq ruwech xtinya' ruq'ij,
roma rija' nukolonel y nu-Dios yin.
6Ink'o wawe' akuchi nitiker-wi-el ri raqen-ya' Jordán, pa juyu' Hermón y ri Misar.
Janila yibison, y roma ri' kan janila yatinquqa' rat.
7Nak'axatej k'a ri ya' ri nichoxin-pe y nik'oxoman chupan ri nimalej taq siwan,
ri janila chi ya' ri nateq-pe rat Jehová, kan xik'o pa nuwi' yin.
8Ri paq'ij ri Jehová xtuya' rutzil pa nuwi',
richin keri' ri chi'aq'a', yin kan xtinbixaj ri rubi' rija',
y kan yich'on k'a rik'in ri Dios ri rajaw ri nuk'aslen.
9Xtink'utuj chire achike roma in rumalin kan,
y achike roma chaq yibison roma ri q'axo'n ri nikiben chuwe ri e etzelanel wichin.
10Ri q'axo'n ri nikiya' chuwe ri e etzelanel wichin
kan k'a chupan ri nubaqil napon-wi.
Ronojel q'ij nikik'utula' chuwe akuchi k'o-wi ri nu-Dios.
11¿Achike roma yimayamo' yan qa?
¿Achike roma janila yibison?
Yin kan ninkuquba' nuk'u'x rik'in ri Dios,
y xtapon ri q'ij chi yin xtinya' chik ruq'ij.
roma ja rija' nukolotajik y nu-Dios yin.
Currently Selected:
Sal 42: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
