Sal 33
33
Bix richin nel utzilej rutzijol ri Dios
1Kixkikot k'a rik'in ri Jehová rix ri choj ik'aslen.
Ri kibix ri kan e tz'aqet chuwech ri Dios kan jebel-wi.
2Tiya' ruq'ij ri Jehová rik'in ri arpa.
Kixbixan rik'in ri q'ojom rubini'an salterio.
3Tibixaj k'a rubi' rija' rik'in k'ak'a' taq bix.
Kan kixq'ojoman k'a rik'in etamabel,
kixbixan rik'in kikoten.
4Roma ri ruch'abel ri Jehová kan choj-wi.
Ronojel ri rusamaj, kan nuk'ut chiqawech, chi rija' kan nuben-wi ri nubij.
5Rija' kan niqa' k'a chuwech chi kan xaxe ta ri ruchojmilal nibanatej.
Y re ruwach'ulew kan nojineq k'a chire ri rajowabal ri man k'isel ta.
6Rik'in ri ruch'abel ri Jehová xbanatej ri kaj.
Xeruben k'a konojel ri xmotza' xaxe rik'in ri ruxla'.
7Ja rija' xmolon ruchi' ri ya' richin xuya' pa taq kik'ojelibal.
Xumol ruchi' ri ya' richin xuya' pa taq yakbel-ya'.
8Tik'oje' k'a rukiy ri Jehová chiwech chupan chijun ri ruwach'ulew.
Tiya' ruq'ij rix winaqi' ri ixk'o chuwech re ruwach'ulew.
9Roma kan xaxe k'a toq xubij rija' jari' toq xbanatej.
Achi'el xubij rija' keri' xk'oje' kan ronojel.
10Ri Jehová kan nuben chi man jun rejqalen ri kich'obonik ri ajawaren.
Rija' nuben chi nibe pa xulan ri kich'obonik ri winaqi' ri man nikitzeqelibej ta rija'.
11Jak'a ri ruch'obonik ri Jehová kan keri' wi xtibanatej richin jantape'.
12Jebel ruwa-kiq'ij ri winaqi' chi ja ri Jehová ri ki-Dios,
ri tinamit ri xucha' richin xok richin.
13Ri Jehová nitzu'un k'a pe k'a chikaj richin yerutz'et-pe ri winaqi'.
14Kan k'a akuchi k'o-wi rija' yerutz'et-pe.
Yerutzu-pe konojel ri ek'o chuwech re ruwach'ulew.
15Ja rija' ri xbanon ri kánima,
kan jak'a chuqa' rija' nitz'eton ronojel ri nikiben.
16Ri rey man ronojel ta mul yech'akon, stape' ek'o e k'iy aj-labal kik'in.
Jun aj-labal man nich'akon ta xa roma janila ruchuq'a'.
17Jun wineq man ruk'amon ta nukuquba' ruk'u'x rik'in ri rukiej richin nukol-ri'.
Stape' ri kiej ri' janila ruchuq'a' kan man nitikir ta nukol ri rajaw.
18Jak'a ri Jehová kan yeruchajij ri k'o rukiy ri Dios chikiwech.
Yeruchajij ri nikikuquba' kik'u'x rik'in ri rajowabal ri man k'isel ta.
19Kan yerukol k'a chuwech ri kamik;
kan ruya'on k'a kik'aslen, stape' k'o wayjal.
20Ri qánima roj kan kuqul k'a ruk'u'x rik'in ri Jehová.
Kan xaxe rija' ri nito'on qichin, y rik'in rija' niqato-wi-qi'.
21Roma ri' rik'in k'a rija' xtikikot ri qánima,
roma kan qakuquban qak'u'x rik'in rija'.
22Tabana' utzil Jehová, taya' ri awajowabal ri man k'isel ta pa qawi',
roma roj kan qoyoben pan aq'a' rat.
Currently Selected:
Sal 33: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
