Sal 135
135
Ri nima'q taq rubanobal ri Jehová
1Kan tibixaj k'a ri rubi' ri Jehová.
Rix ri ix rusamajel, kan tinimirisaj k'a ri ruq'ij;
2chi'iwonojel ri ixk'o pa rachoch rija',
ri ixk'o chuwa-jay chire ri rachoch ri qa-Dios.
3Tinimirisaj ruq'ij ri Jehová, roma rija' kan janila utz.
Tiyala' k'a bix chire ri rubi', roma rija' kan janila jebel,
4roma rija' kan ja ri e rijatzul kan ri Jacob ri xerucha'.
Xucha' k'a ri tinamit Israel richin xok richin.
5Kan wetaman k'a chi ri Jehová kan janila nim.
Ri qajaw roj kan más nim chikiwech ri ch'aqa' chik dios.
6Ronojel ri nrajo' nuben ri Jehová, kan nuben.
Keri' nuben chikaj y chuwach'ulew,
chupan ri nimalej taq palou, y k'a chupan-qa ri ruxe'.
7Nuben chi nibeyakatej-pe ri sutz' k'a janila nej chire ri ruwach'ulew.
Nuya-pe ri koqolajay richin nipe ri job,
y ri kaq'iq' yerelesaj-pe ri akuchi e yakel-wi.
8Ja rija' xbanon chi xeken konojel ri nabey taq al alaboni' pan Egipto.
Xtiker-el kik'in ri winaqi' k'a kik'in ri nabey taq achija' taq awej.
9Rija' kan xuben meyel taq banobel chupan ri ruwach'ulew Egipto.
Pa kiwi' k'a ri ki-rey y ri e rusamajela' xuben-wi ronojel re'.
10Xeruk'is k'a e k'iy winaqi' ri man nikitzeqelibej ta rija'.
Xerukamisaj k'a rey ri kan k'o kuchuq'a'.
11Xukamisaj k'a ri Sehón rey kichin ri winaqi' amorreo,
ri Og rey richin ri ruwach'ulew Basán,
y konojel k'a ri rey ri xek'oje' chupan ri ruwach'ulew Canaán.
12Ri kiruwach'ulew konojel re winaqi' re', xusipaj k'a.
Xuya' k'a chire ri tinamit Israel richin xrichinaj kan.
13Nimalej Jehová, ri abi' rat kan richin q'asen.
Ri natabel awichin rat, kan xtikinataj k'a ri chi wiq chi tanaj winaqi' ri xkepe.
14Roma rat kan naq'et k'a tzij pa ruwi' ri atinamit.
Kan najoyowaj k'a qawech roj ri oj asamajela'.
15Ri kiwachibel ri ki-dios ri ch'aqa' chik winaqi' xa rik'in saqipueq y q'anapueq e banon-wi.
Y xa ja ri winaqi' e banayon kichin.
16K'o kichi', jak'a man yech'on ta;
K'o kitzubal, jak'a man yetzu'un ta;
17K'o kak'axabal, jak'a man ye'ak'ex ta.
Y xa maneq uxla' kik'in.
18Kan e achi'el k'a rije', e keri' ri winaqi' ri yebanon kichin,
e keri' chuqa' ri nikikuquba' kik'u'x kik'in.
19Nuwinaq israelita, kan tinimirisaj k'a ruq'ij ri Jehová;
chuqa' rix sacerdote, kan tinimirisaj k'a ruq'ij.
20Rix ri ch'aqa' chik ix rijatzul kan ri Leví, kan tinimirisaj ruq'ij ri Jehová.
chi'iwonojel ri k'o rukiy ri Jehová chiwech, kan tinimirisaj k'a ruq'ij.
21Kan k'a chupan k'a ri juyu' Sión tinimirisex ruq'ij ri Jehová.
Tinimirisex ruq'ij k'a chupan ri Jerusalem.
Kan tinimirisex k'a ruq'ij.
Currently Selected:
Sal 135: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
