Pro 10
10
Ri utz y ri itzel k'aslen
1Ja ch'aqa' chik etamabel-tzij re' ri e rutz'iban kan ri rey Salomón:
Jun alk'ualaxel ri k'o runa'oj kan jun kikoten chike ri rute-rutata'.
Jak'a ri alk'ualaxel ri xa maneq runa'oj, xa jun bis chike rije'.
2Ri beyomel ri xa man choj ta ruch'akik, man kan ta k'iy utzil nuk'en-pe,
jak'a ri chojilej k'aslen, nikolon chuwech ri kamik.
3Ri Jehová kan man nuya' ta q'ij chi ri choj ruk'aslen nutej wayjal,
jak'a ri aj-maki' kan man nuya' ta chike ri janila nikajo'.
4Ri kan man yeruya' ta ri ruq'a-raqen pa samaj, xa meba'il nuk'en-pe chire;
jak'a ri ruq'a-raqen ri samajel, kan nikik'en-pe beyomel chire.
5Roma ri' ri wineq ri kan k'o k'a ruwech rutiko'n ri nuk'ol, kan xnojin-wi jebel;
jak'a ri xa man xnojin ta jebel, xa niwer rokik ri ch'aqa' chik nikik'ol ruwech kitiko'n.
6Pa ruwi' ri wineq choj ruk'aslen, kan urtisanik k'a ri niqaqa-pe,
jak'a ri pa ruchi' ri wineq aj-mak, xa ch'abel richin oyowal xtuk'en-pe.
7Ri natabel kichin ri winaqi' choj kik'aslen, kan rik'in kikoten yenatex;
jak'a ri winaqi' ri xa itzel kik'aslen, xa man yenatex ta chik.
8Ri wineq ri kan k'o na'oj rik'in, kan nrak'axaj y nuben k'a ri nibix chire;
jak'a ri wineq ri yerubila' tzij ch'obon man ch'obon, nipe ruk'ayewal chirij.
9Ri wineq ri kan choj yerubanala', kan kuqul k'a ruk'u'x neleyaj.
jak'a ri xa nuchop yerubanala' itzel taq banobel, kan xtibek'is chupan ri itzel ri yerubanala'.
10Ri wineq ri man nuq'alajirisaj ta ri qitzij, xa jun tz'ukuy richin oyowal;
y chuqa' ri wineq ri xa maneq runa'oj ri nich'on, xa yerunim y yerutzeq ri ch'aqa' chik.
11Kan achi'el alaxibel-ya' richin k'aslen, ri ruch'abel ri wineq ri choj ruk'aslen;
jak'a ri kich'abel ri winaqi' ri itzel kibanobal, xa ruyon oyowal nikik'en-pe.
12Ri etzelanik k'iy ruwech oyowal yeruyek-pe.
Jak'a ri ajowabel nitikir nukuy ronojel ruwech mak.
13Pa ruchi' jun wineq etamanel, chiri' ye'el-wi-pe ri ch'abel richin na'oj,
jak'a ri xa maneq na'oj rik'in, xa ch'ayikil ri niqaqa chirij.
14Ri winaqi' ri kan k'o kina'oj, kan nikiyek k'a jebel ri etamabel.
Jak'a ri xa maneq na'oj kik'in, ri kich'abel kan chi'anin yekibanala' ch'a'oj.
15Ri rubeyomel ri beyom, kan junan rik'in jun tinamit ri k'o tz'aq chirij,
jak'a ri wineq ri man jun k'o rik'in, man jun rutobal, xa ja ri rumeba'il ri nitzaqo richin.
16Ri wineq ri choj ruk'aslen, ri ruch'akoj ja ri k'aslen,
jak'a ri man choj ta ruk'aslen, ri nuch'ek xa ruyon rutojbalil-mak.
17Kan bey k'a richin k'aslen ruk'uan ri wineq ri kan nuben ri pixa' ri k'utun chuwech,
jak'a ri xa man niqa' ta chuwech ri ch'olinik, xa xtisach rik'in ri ruk'aslen.
18Ri nrewaj chi itzel nuna' chire jun chik wineq, xa ka'i' rupalej,
ri kan chi'anin nuq'alajirisaj-apo ri nuna', xa maneq runa'oj.
19Toq kan janila k'iy ch'owen niban, kan yebitej chuqa' ri man ruk'amon ta,
jak'a ri kan nitikir nuq'et-ri', kan k'o-wi runa'oj.
20Ri rejqalen ri ruch'abel ri wineq ri kan choj ruk'aslen, kan achi'el rejqalen ri ch'ajch'ojilej saqipueq;
jak'a ri ch'abel ri yepe pa ránima ri wineq ri itzel rubanobal, xa kan maneq ok rejqalen.
21Ri ruch'abel ri wineq ri choj ruk'aslen, kan k'o utz nuk'en-pe chike ri winaqi';
jak'a ri wineq ri xa maneq ok runa'oj, ni rija' man nitikir ta nuto-ri' y pa kamik napon-wi.
22Ri urtisanik richin ri Dios, kan nuk'en-pe beyomel chike ri winaqi';
y ri winaqi' xa man rik'in ta k'a tijoj-poqonal toq nikiq'i-q'anej ri'.
Ri wineq ri k'o rukiy ri Dios chuwech y ri wineq banoy etzelal
23Ri kikoten chuwech jun wineq ri xa maneq runa'oj, ja ri nuch'ob nuben etzelal,
jak'a chuwech jun achin ri utz ruch'obonik, kan jun kikoten ri na'oj.
24Ri wineq banoy etzelal kan nuk'uluwachij k'a ri nuxibij ri' chuwech,
jak'a ri wineq choj ruk'aslen kan nuk'ul-wi ri janila rurayiben.
25Roma ri' toq nipe ruk'ayewal chirij ri banoy etzelal, jari' ri nuk'uan-el richin,
jak'a ri wineq ri choj ruk'aslen, kan ja ri Dios ri kow nichapo richin.
26Ri vinagre nuben chire ri eyaj chi nijuch'uch',
ri sib nuben chike ri runaq'-wachaj chi nibiyin-pe ya' chupan,
keri' k'a nikiben ri winaqi' q'ori' chike ri ek'o pa kiwi'.
27Ri wineq ri k'o rukiy ri Dios chuwech, nukochij más q'ij ruk'aslen,
jak'a ri e banoy richin ri etzelal, ri Dios xa nuqupij chi'anin ri kijuna' chuwech re ruwach'ulew.
28Ri oyobenik ri nuben jun wineq ri kan choj ruk'aslen, kan k'o ruk'ojlen.
jak'a ri oyobenik ri nikiben ri winaqi' ri yebanon etzelal, xa man jun nuk'en-pe chike.
29Ri Dios kan yeruto' k'a konojel ri winaqi' ri kan tz'aqet ri kik'aslen,
y yeruk'is k'a konojel ri winaqi' ri yebanon etzelal.
30Ri wineq ri kan choj ri ruk'aslen, kan man jun bey xtisilon-el ri akuchi k'o-wi,
jak'a ri winaqi' ri yebanon etzelal man xkeyaloj ta el chuwech re ruwach'ulew.
31Ri ruch'abel ri wineq, ri choj ruk'aslen, kan ruyon k'a na'oj ri nuq'alajirisaj,
jak'a ri kich'abel ri e banoy etzelal, xa xtiq'at.
32Pa ruchi' ri wineq ri choj ruk'aslen, ruyon utzilej taq ch'obonik ri ye'el-pe,
jak'a pa ruchi' ri wineq banoy etzelal, ruyon yoq'onik ri ye'el-pe.
Currently Selected:
Pro 10: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
