Núm 31
31
Ri tinamit Israel nuben oyowal kik'in ri aj-Madián
1Ri Jehová xch'on chik rik'in ri Moisés y xubij chire: 2Rokik k'a at k'es na rat, tabana' ruk'exel chike ri aj-Madián, pa kibi' ri awinaq israelita, xcha'.
3K'ari' ri Moisés xch'on kik'in ri ruwinaq y xubij chike: Ri Jehová nubij chi tibana' ichojmil roma jujun chiwe rix xkixbe pa labal kik'in ri aj-Madián, roma rija' nrajo' chi tibana' ruk'exel chike. 4Xke'acha' k'a el e 1,000 achi'a' pa jujun tzobaj richin ri tinamit Israel, richin chi xkebe pan oyowal, xcha'.
5Kere' k'a xban-el chike ri achi'a' ri' e 1,000 pa jujun tzobaj. Y ri kajlabal konojel e 12,000, 6k'ari' ri Moisés xeruteq-el chupan ri labal kachibilan ri Finees, ri ruk'ajol ri sacerdote Eleazar. Y rija' xuk'uaj-el jujun chike ri samajibel richin ri rachoch ri Dios y chuqa' ri trompeta.
7Y xkiben oyowal kik'in ri aj-Madián, achi'el xubij ri Jehová chire ri Moisés, y xekikamisaj k'a kan konojel ri achi'a' ri ek'o chiri'. 8Y chikikojol k'a ri' xekikamisaj kan e wo'o' rey richin ri Madián: Ri Eví, ri Réquem, ri Sur, ri Hur y ri Reba. Chuqa' xkikamisaj kan chi espada ri Balaam, ruk'ajol ri Beor. 9Y ri israelita xekik'uaj k'a el ri ixoqi' aj-Madián y chuqa' ri ak'uala', y konojel ri kawej, y xkijokola-el ronojel ri kibeyomel; 10y xkiyala' kan ruq'aq'al ri kitinamit, ri kokoj tinamit y ri kachoch. 11Y ronojel ri k'o rejqalen xkimej kan chuwi-kiq'a' ri etzelanel kichin y xekik'en-pe ri winaqi' y ri kawej. 12Xekik'en-pe chikiwech ri Moisés y ri sacerdote Eleazar y chuqa' chikiwech ri kiwinaq israelita ri akuchi ek'o-wi-qa pa taq'aj richin ri Moab ri k'o chuchi' ri raqen-ya' Jordán ri k'o chuwech-apo ri Jericó.
13Y xel k'a pe ri Moisés, ri sacerdote Eleazar y konojel ri e aj-raqen pa kiwi' ri tinamit Israel, richin xekik'ul k'a chirij-el ri akuchi ek'o-wi-qa. 14Y toq rije' xe'apon, ri Moisés xyakatej janila royowal chikij ri e aj-raqen pa kiwi' ri aj-labal ri xetzolej-pe. 15K'ari' xubij chike: ¿Achike roma man xe'ikamisaj ta kan konojel ixoqi'? 16Roma rije' xa xkitzeqelibej ri itzel pixabanik ri xuya' ri Balaam richin xe'ok jun tzaqibel kichin ri achi'a' israelita, toq xa xkijel kan ri kibey chiri' pa Baal-peor. Y roma ri' ri Jehová ojer kan xuya-pe ruk'ayewal pa kiwi' ri qati't-qamama'. 17Wakami k'a ke'ikamisaj konojel ri taq alaboni' chikikojol ri ak'uala'. Chuqa' ke'ikamisaj konojel ri ixoqi'. 18Jak'a konojel ri xtani' ri ek'o chikikojol ri ixoqi', rije' man ye'ikamisaj ta, xa kan ke'ok iwixjayilal rix.
19Xabachike k'a chiwe rix wi xukamisaj ta jun wineq o xuchop ta jun kamineq, ruk'amon tel-el re akuchi ojk'o-wi-qa, y pa rox q'ij nuch'ajch'ojirisaj-ri'. Keri' pa ruwuq q'ij xkixtzolin-pe ri akuchi ojk'o-wi-qa. 20Keri' chuqa' tich'ajch'ojirisaj ronojel ri itziaq ri xik'uaj-el pan oyowal: Ronojel ri e banon rik'in tz'um, ronojel ri e banon rik'in rusale'y tzuntzun, y ronojel ri e banon rik'in che', xcha' ri Moisés.
Ri israelita nikich'ajch'ojirisaj ri xkik'en-pe
21K'ari' ri sacerdote Eleazar xubij chike ri aj-labal ri e tzolejineq-pe pan oyowal: Ri Jehová xubij chire ri Moisés chi jare' ri ruchojmilal richin nich'ajch'ojirisaj ri xe'ik'en-pe. 22Ronojel k'a ri e banon rik'in q'anapueq, saqipueq, q'enq'oj-pueq y jalajoj kiwech pueq. 23y ronojel ri nukoch' niq'ax pa q'aq', k'o chi nik'owisaj pa q'aq' y k'ari' nich'ej rik'in chik ya'. Jak'a ri ch'aqa' chik ri xa man yekoch'on ta ri yeq'ax pa q'aq', xaxe k'a rik'in ya' xtich'ajch'ojirisaj-wi. 24Y chirij ri ruwuq q'ij, k'ari' xtich'ej ri itziaq y keri' kan ix ch'ajch'oj chik. K'ari' ruk'amon chik yixok chupan ri akuchi ojk'o-wi-qa, xubij ri Jehová, xcha' ri Eleazar.
Ri israelita nikich'er ri xkik'en-pe pa labal
25Y ri Jehová xch'on chik rik'in ri Moisés, y xubij chire: 26Rik'in ruto'onik ri sacerdote Eleazar y ri e aj-raqen ri ek'o pa ruwi' ri tinamit, ke'iwajlaj ri winaqi' y ri kawej ri xkik'en-pe pa ruwach'ulew Madián. 27Y xtich'er k'a pa nik'aj. Nik'aj xtich'er kan richin xtiya' chike ri aj-labal ri xebe pan oyowal, y nik'aj chik xtich'er kan richin xtiya' chike ri ch'aqa' chik iwinaq. 28Chirij re' tich'ara' kan juba' richin xtiya' chuwe yin Jehová. Chire ri xtikichinaj kan ri aj-labal, xtik'en k'a kan jun chire ri e 500 chike ri winaqi' y ri nima'q y kokoj taq kawej. 29Re juba' re' xtaya' chire ri sacerdote Eleazar, kan achi'el xa ta chuwe yin naya-wi. 30Y ri nik'aj chik kichin ri awinaq, k'o chi tich'ara' kan juba' richin xtiya' chike ri e levita ri yechajin ri wachoch banon rik'in tzieq. Xtik'en k'a kan jun chire ri e kawineq lajuj chike ri winaqi' y ri nima'q y kokoj taq kawej, xcha'.
31Kan keri' xkiben ri Moisés y ri sacerdote Eleazar achi'el ri xubij ri Jehová chike. 32Ri xkik'en-pe ri aj-labal chuwi-kiq'a' ri etzelanel kichin e 675,000 karne'l y tzuntzun, 33e 72,000 wákix 34y e 61,000 bur. 35Y jak'a ri xtani', konojel rije' e 32,000.
36-40Ri nik'aj xya'ox chike ri achi'a' ri xebe pan oyowal, y ri kajlabal e 337,500 karne'l y tzuntzun, e 36,000 wákix, e 30,500 bur y 16,000 xtani'. Y ri xeya'ox chire ri Jehová e 675 karne'l y tzuntzun, oxk'al kablajuj wákix, oxk'al jun bur y e juwineq kablajuj xtani'. 41K'ari' ri Moisés xujech re sipanik re' chire ri Jehová, y kan xjach pa ruq'a' ri Eleazar, achi'el rubin kan ri Jehová chire.
42-47Ri nik'aj xya'ox chire ri tinamit, y ri kajlabal e 337,500 karne'l y tzuntzun, e 36,000 wákix, e 30,500 bur y 16,000 xtani'. Y ri xeya'ox chike ri e levita ri yechajin ri rachoch ri Dios e 675 karne'l y tzuntzun, oxk'al kablajuj wákix, oxk'al jun bur y e juwineq kablajuj xtani'. Y ronojel re' xban achi'el ri xubij ri Jehová.
48Chirij re' ri e aj-raqen pa kiwi' ri aj-labal, xepe k'a rik'in ri Moisés, 49y xkibij chire: Qajaw, xeqajlaj ri aj-labal ri ek'o pa qaq'a' y qonojel k'a ojk'o y man jun xken kan chiqe.
50Wakami k'a jare' qak'amon-pe chiqajujunal jun sipanik chire ri Jehová. Ja ri jalajoj ruwech taq wiqobel e banon rik'in q'anapueq. Y wakami niqasuj chire ri Jehová richin matioxinik, xecha'.
51K'ari' ri Moisés y ri sacerdote Eleazar xekik'ul k'a kan ri jalajoj ruwech wiqobel banon rik'in q'anapueq. 52Ri ralal ri q'anapueq ri xkisuj-apo ri e aj-raqen pa kiwi' ri aj-labal, más juba' kaji' quintal. 53Re sipanik re' man ja ta ri aj-labal ri xeya'on-apo, stape' rije' kan k'o xkimej-pe chuwi-kiq'a' ri etzelanel kichin. 54Keri' ri Moisés y ri sacerdote Eleazar xkik'ul kan ri q'anapueq chuwi-kiq'a' ri e aj-raqen pa kiwi' ri aj-labal; ronojel k'a re' xkik'uaj pa rachoch ri Dios, richin jun natabel kichin ri winaqi' israelita chuwech ri Jehová.
Ri tzobaj richin ri Rubén y ri Gad xkichinaj kan kiruwach'ulew
(Deut 3:12-22)
Currently Selected:
Núm 31: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
