Neh 13
13
Ri xeruchojmirisaj ri Nehemías
1Chupan ri q'ij ri' xsik'ix ri wuj richin ri rupixa' ri Jehová ri ya'on kan chire ri Moisés, y xkil k'a chi tz'ibatel kan chupan ri wuj ri' chi ri aj-Amón y ri aj-Moab kan man jun bey ruk'amon chi ye'ok ta qawinaq. 2Kere' xban chike, roma rije' ojer kan man xekik'ul ta ri qate-qatata' rik'in kiway-kuk'ya'. Pa ruk'exel ri' xa xkitoj ri Balaam richin ta chi xroyoj ri itzel pa kiwi'. Jak'a ri qa-Dios xa xuya' urtisanik pa kiwi' ri qate-qatata' y man ja ta ri etzelal. 3Toq ri winaqi' xkak'axaj ri nubij ri pixa', jari' toq xekelesaj-el chikikojol konojel ri kixolon-apo-ki' kik'in ri xa man e kiwinaq ta.
4Pa nabey chire ronojel re', ri sacerdote Eliasib xcha'ox kan richin xok aj-raqen pa ruwi' ri akuchi yeyak-wi ronojel ri sipanik ri niya'ox chire ri Dios. Y ri Eliasib xa junan kiwech rik'in ri Tobías. 5Y roma ri' xuya' chire jun chike ri jay richin ri rachoch ri Dios richin nik'oje' chiri'. Jak'a ri jay ri' xa richin niyak ri sipanik, ri pom, ri samajibel richin pa rachoch ri Dios, ri jun chire ri lajuj chire ri jalajoj ruwech ixin, ri vino, ri aceite, y ronojel ri bitajineq chi niya'ox chike ri levita, ri bixanela' y ri chajinela'. Chiri' chuqa' niyak-wi ri sipanik ri kichin ri sacerdote.
6Y toq ri Eliasib xuben re' yin in maneq pa Jerusalem, roma k'o chi xitzolin pa Babilonia chupan ri juna' juwineq kablajuj chire ri q'atbel-tzij richin ri Artajerjes pa ruwi' ri Babilonia. Y jun q'ij yin xink'utuj chik utzil chire ri rey richin tuya' q'ij chuwe, 7richin yitzolin chik pe pa Jerusalem. Y toq xinoqaqa jari' toq xinnabej ri nimalej etzelal ri rubanon ri Eliasib, chi xuben ri xrajo' ri Tobías. Y xujem jun chike ri jay ri ek'o chuwa-jay chire ri rachoch ri qa-Dios, y xuya' chire. 8Roma ri' kan janila k'a xyakatej woyowal y xink'aqala-el ronojel ri k'o chupan ri jay ri'. 9Y xinbij chi tich'ajch'ojirisex jebel ri jay ri', y keya'ox jun bey chik pa kik'ojelibal ri samajibel richin ri rachoch ri Dios, y chuqa' ri sipanik y ri pom.
10Y xinnabej chuqa' chi ri bixanela' y ri ch'aqa' chik levita ri xe'ilin, xa xe'animej-el y xebe chubanik kitiko'n, roma man xya'ox ta chik ri juba' chire ronojel chike. 11Y janila k'a xench'olij ri aj-raqen pa kiwi' ri winaqi' y xink'utuj chike chi achike roma kimalin kan ri kisamaj. Y xenmol k'a jun bey chik ri xe'animej-el y xenyala' jun bey chik pa taq kisamaj.
12Y k'ari' konojel ri nuwinaq xkiya' chik ri jun chire ri lajuj chire ri jalajoj ruwech ixin, ri vino y ri aceite chupan ri yakonabel richin ri Dios. 13Y xenya' k'a pa kiwi' ri e chajiy ri jay ri', ri sacerdote Selemías, ri tz'ibanel Sadoc y ri levita Pedaías. Y ri xe'ilin kichin ja ri Hanán ruk'ajol ri Zacur, y rumam ri Matanías. Jari' xinya' richin yeruto' re achi'a' re'. Y kan xinya' re samaj re' chike, roma kan nikiben ri nikibij. Y ja rije' ri yetalun ri nik'atzin chike ri kachibil.
14Y xich'on rik'in ri Dios y xinbij chire: Nu-Dios yin, toqaqa k'a chi'ak'u'x ronojel re xinben y kan tajoyowaj nuwech roma ri xinben pan awachoch y xatinsamajij, xicha'.
15Y yin xintz'et chuqa' chi ek'o nuwinaq ri yesamej chupan ri q'ij richin uxlanenri'il. Ch'aqa' yepitz'on uva rik'in kaqen, ch'aqa' ye'eran trigo ri banon pa boraj, y ch'aqa' nikibanala' kejqa'n ri kibur rik'in tzeqaj uva, rik'in vino, rik'in wíkix. Y ronojel re' nikik'en-pe richin nikik'ayij pa Jerusalem. Y roma ri' kan janila k'a xench'olij, y xinbij chike richin man chik tikiben kere' chupan ri q'ij richin uxlanenri'il. 16Chuqa' ek'o winaqi' ri e aj-Tiro ri ek'o pa Jerusalem ri yekik'ayij ker y ronojel ruwech k'ayij chike ri qawinaq chupan ri q'ij richin uxlanen. 17Y xench'olij ri e aj-raqen richin ri Judá y xinbij chike: ¿Achike k'a roma niben rix re jun itzel banobel re' y nixolq'otij ruwi' ri q'ij richin uxlanen? 18Keri' xkiben ri qate-qatata', y roma ri' ri Dios xuya' ri ruk'ayewal pa kiwi' y chuqa' pa ruwi' ri qatinamit. Y man rik'in ri', rix kan niwoyoj más ruk'ayewal pa ruwi' ri qatinamit Israel, roma nixolq'otij ruwi' ri q'ij richin uxlanen, xicha'.
19Y xbanatej k'a toq ri q'ij niqaqa yan qa y ri rumujal napon yan akuchi k'o-wi ri ruchi' ri tinamit Jerusalem, jari' toq nitiker-qa ri q'ij richin uxlanen. Jari' toq xinbij chike ri chajinela' chi titz'apex ri ruchi' ri tz'aq, y xinbij chi man nijaq ta, k'a toq xtik'o na ri q'ij richin uxlanen. Y xenya' pa taq ruchi' ri tz'aq jujun chike ri nusamajela' aj-labal richin chi man jun ejqa'n nikusex-apo chupan ri q'ij ri'. 20Y ka'i-oxi' mul ri k'ayinela' man xe'ok ta y xek'oje' kan chirij ri Jerusalem. 21Y xench'olij y xinbij chike: ¿Achike roma yixk'oje' kan chiri'? Wi xtiben chik jun bey kela', k'ari' xkixinya' pa cárcel, xicha'. Y kan jari' man jun bey chik k'a xepe chupan ri q'ij richin uxlanen. 22Y xinbij chike ri levita chi tikich'ajch'ojirisaj-ki' y kepe richin nikichajij ri ruchi' ri tz'aq richin nichajix ri q'ij richin uxlanen.
Xich'on rik'in ri Dios y xinbij: Nu-Dios toqaqa k'a chi'ak'u'x ronojel re xinben, y tajoyowaj nuwech rik'in ri nimalej awutzil, xicha'.
23Y chuqa' xintz'et chupan ri q'ij ri', chi ek'o nuwinaq israelita ri xek'ule' kik'in ixoqi' aj-Asdod, aj-Amón y aj-Moab. 24Y ri nik'aj chike ri kalk'ual ri winaqi' ri' jalajoj ch'abel xech'on, pa ch'abel Asdod y ch'aqa' chik ch'abel richin ch'aqa' chik tinamit, y man xetikir ta xech'on pa qach'abel roj. 25Y xench'olij rije', y xinbij chike chi nipe etzelanik pa kiwi'. Y keri' chuqa' xench'ey jujun chike rije', y xink'uq ri rusumal-kiwi'. Y keri' chuqa' xinben chike richin tikiya' kitzij chuwech ri Jehová Dios richin man yek'ule' ta chik ri kimi'al, ni ri kik'ajol kik'in ri aj juk'an chik tinamit. 26Ja mak re' ri xuben ri Salomón ri rey pa ruwi' ri ruwach'ulew Israel, stape' chuwech ri ruwach'ulew man jun chik rey ri xk'oje' achi'el rija', y ri Dios kan janila xrajo' y xuben chire chi xok rey pa ruwi' chijun Israel. Ja ri ixoqi' aj juk'an chik tinamit xebanon chire richin chi xmakun. 27Roma ri' kan man xtiqakoch' ta chi rije', kan janila yemakun chuwech ri Dios, roma yek'ule' kik'in ri ixoqi' ri man e qawinaq ta.
28Y jun chike ri ralk'ual ri Joiadá ruk'ajol ri nimalej sacerdote Eliasib okineq ruji' ri Sambalat aj-Horón. Y roma ri' xinwoqotaj-el re wawe'. 29Roma ri' xich'on rik'in ri Dios y kere' xinbij: Nata' yin, man tamestaj k'a ri itzel taq banobel ri xekiben chawech ri sacerdote, richin xkiben chi maneq rejqalen ri kisamaj, y xkiben chi man ch'ajch'oj ta ri jikibel-tzij ri kibanon ri sacerdote y ri levita, xicha'.
30Y keri' yin xinchojmirisaj ri xkiyoj kan ri man e qawinaq ta, y xenya' chik jun bey ri sacerdote y ri levita pa taq kitzobaj richin xkiben ri ilinik. 31Chuqa' yin xinbij ri q'ij ri k'o chi nikik'en-pe ri sipanik richin ri si', y chuqa' xinbij chi k'atzinel nikik'en-pe ri nabey ruwech taq kitiko'n. Y roma ri' toq xich'on rik'in ri Dios y xinbij: Nata' yin, kinoqaqa k'a chi'ak'u'x y tajoyowaj nuwech, keri' xinbij chire ri nu-Dios.
Currently Selected:
Neh 13: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
