Lev 7
7
Ri jujun chik ruchojmilal pa ruwi' ruk'exel ri sachineq
1Y jare' ri ruchojmilal ri kamelabel ri k'o chi nibe pa ruwi' ri ruk'exel ri sachineq; y re' kan ch'aron xaxe chuwe yin. 2Xtiqupix k'a ri ruqul ri chikop ri akuchi yekamisex-wi ri kamelabel ri yeporox jumul, y ri rukik'el xtikaq'ux chi kaji' ruwech ri porobel y pa taq ruxikin. 3Y ronojel k'a ri ruq'anal ri chikop xtisuj chuwe yin: Ri rujey, y ronojel ri q'en ri k'o chirij ri rupan, 4ri q'en ri k'o chikij ri ka'i' rukinaq', ri q'en ri k'o chirij ri tzan-racheq y ri q'en ri k'o chirij ri rusase'. 5K'ari' ri sacerdote xtuporoj ronojel re' pa ruwi' ri porobel. Re' jare' ri kamelabel ri poron chinuwech yin, k'o chi nibe pa ruwi' ri ruk'exel ri sachineq. 6Re jun kamelabel re' kan janila rejqalen, y roma ri' xaxe ri sacerdote y ri achi'a' ri e kach'alal-ki' ri utz yetijo.
7Kan achi'el k'a ruchojmilal ri jujun chike ri kamelabel ri nisuj richin kuyubel-mak, kan keri' chuqa' ri ruchojmilal ri kamelabel ri nisuj roma jun ch'a'oj. Ri ruch'akul ri chikop ri nisuj pa ruwi' ri porobel kan nok k'a richin ri sacerdote ri nisuju-apo ri kamelabel. 8Y chuqa' ri rutz'umal ri chikop ri niporox jumul kan nok kan richin rija'. 9Keri' chuqa' nikiben rik'in ri sipanik ri banon rik'in k'ej ri niban rik'in jalajoj ruwech ixin ri nichaq'arisex pan horno o pa jun lik'ilik bojo'y o pa jun xot. Kan nok k'a kan richin rija'. 10Jak'a ri sipanik ri man yechaq'arisex ta, ri yeban rik'in k'ej xolon aceite rik'in o ri choj chaqi'j, re' nok kichin ri e ruk'ajol ri Aarón, y rije' nikich'er k'a chikiwech.
Ri jujun chik ruchojmilal richin ri sipanik richin nijunamatej-ruwech rik'in ri Dios
11Jare' k'a ri kichojmilal richin ri sipanik ri yesuj richin nijunamatej-ruwech wik'in: 12Wi ta jun wineq nusuj jun chikop richin kamelabel richin chi nimatioxin, kan k'o chuqa' chi yeruk'en-pe kaxlan-wey ri maneq ch'amilej-q'or rik'in. Ri rubanik ri jun ruwech kaxlan-wey; ponon y xolon aceite rik'in, y ri jun chik ruwech; tz'ajin y yuquyik rubanik y su'un aceite chuwech, y ri jun chik; pim rubanik y jebel aceite k'o rik'in. 13Y pa ruwi' ronojel re' rija' xtuk'en-pe kaxlan-wey ri k'o ch'amilej-q'or rik'in. 14Y rija' xtuk'en k'a jujun kaxlan-wey chike ri oxi' ruwech ri maneq ch'amilej-q'or rik'in y chuqa' xtuk'en jun chire ri k'o ch'amilej-q'or rik'in, y jare' ri xtisuj chuwe yin y xtiq'ax kan chire ri sacerdote ri nichikan ri kik' chi kaji' ruwech ri porobel y pa taq ruxikin.
15Y ri ch'aqa' chik ti'ij ri richin ri kamelabel ri nisuj richin nikiq'alajirisaj chi nijunamatej-kiwech wik'in, ri ti'ij ri' utz chi nikitej chupan ri q'ij ri' y man jun tikiya' kan richin jun chik q'ij. 16Jak'a ri kamelabel ri rusujun chi nuben o jun kamelabel richin ri nalex-pe pa ránima jun wineq, utz nitij ri ti'ij chupan ri q'ij toq nisuj, y wi man nik'is ta, utz nitij ri jun chik q'ij. 17Y wi ta ri ti'ij ri' man nik'is ta y napon k'a pa rox q'ij, ri ti'ij ri' k'o chi niporox. 18Y wi ta ek'o ri yetijo ri pa rox q'ij, ri kamelabel ri xisuj kan man xtink'awomaj ta y man jun chik xtuq'ajuj, roma ri ti'ij ri' kan chuwirineq chik chinuwech yin, y ri xtitijo ja rija' ri xtejqalen ri mak. 19Jak'a ri ti'ij ri kan utz richin nitij, xa rik'in ninaq juba' roma xabachike ri man ch'ajch'oj ta, kan man utz ta chik k'a richin nitij; xa k'o chi niporox.
Xabachike k'a wineq ri kan ch'ajch'oj chinuwech yin, kan utz k'a chi nutej ri ti'ij ri utz richin nitij. 20Jak'a ri wineq ri xa man ch'ajch'oj ta, y nutej ri ti'ij richin ri sipanik ri', rija' nimakun. Y roma ri' k'o chi telesex-el chikikojol ri ruwinaq. 21Keri' k'a wi jun wineq nuchop ta xabachike ri man ch'ajch'oj ta kichin winaqi' o kichin chikopi', o nuchop ta chik jun ri man ch'ajch'oj ta, rija' kan man ch'ajch'oj ta chik k'a. Y nimakun wi nutej juba' chire ri ti'ij ri', y roma ri' re wineq re' kan k'o chi telesex-el chikikojol ri ruwinaq, xcha' ri Jehová.
Ri ruchojmilal pa ruwi' ri ruq'anal y ri rukik'el ri chikop
22Y ri Jehová xubij k'a chire ri Moisés chi kere' 23tubij chike ri ruwinaq: Man titej ri ruq'anal ri wákix, ni ruq'anal ri karne'l y ni ri ruq'anal ri tzuntzun. 24Keri' chuqa' man titej ri ruq'anal jun chikop ri xkamisex roma jun k'uxunel chikop o ruq'anal jun chikop ri xuk'uluwachij xabachike kamik. Jak'a ri q'en ri' utz richin nikusaj richin ch'aqa' chik rukusaxik. 25Roma ri' wi k'o jun nitijo ruq'anal jun chikop ri kan utz richin kamelabel ri niporox chinuwech yin, ri xtibanon keri' kan telesex-el chikikojol ri ruwinaq. 26Chuqa' man jun titijo o tiqumun kikik'el ri aj-xik' taq chikopi' y kikik'el konojel ri ch'aqa' chik chikopi'. Re' jun ruchojmilal xabakuchi ta ixk'o-wi. 27Roma ri' wi k'o ta jun wineq ri nitijo o nuqum kik', kan k'o chi telesex k'a el chikikojol ri ruwinaq, xcha' ri Jehová.
Ri ti'ij ri kan nok kichin ri sacerdote
28Xch'on chik jun bey ri Jehová rik'in ri Moisés y xubij chi 29tubij chike ri ruwinaq: Wi k'o jun wineq ri nrajo' nuk'en-pe jun kamelabel richin nuq'alajirisaj chi nijunamatej-ruwech wik'in, k'o chi kan ja rija' ri xtik'amon-pe ri xtusuj chuwe. 30Y rija' xtuk'en-pe pa ruq'a' ri ruq'anal y ri ti'ij richin ri ruwa-ruk'u'x ri chikop richin xtusuj chinuwech. Y re sipanik re' kan xtusiloj pa ruq'a' achi'el niban chire ri ch'aqa' chik kamelabel ri nisilox chinuwech. 31Y xeri' ri sacerdote xtuben chi xtik'at ri q'en ri' pa ruwi' ri porobel, jak'a ri ti'ij richin ri ruwa-ruk'u'x ri chikop xtok richin ri Aarón y kichin ri e ruk'ajol. 32-33Y ri ra' ri chikop ri k'o pa rijkiq'a', ri richin ri kamelabel ri nuq'alajirisaj chi nijunamatej-iwech wik'in, re' xtiya' chire ri sacerdote ri nisuju ri kik' y ri ruq'anal ri chikop; y ri' xtuk'ul k'a kan richin nok richin rija', richin jun to'onik chire. 34Ri ra' ri nik'en-pe chire ri sacerdote y ri ruwa-ruk'u'x ri nisiloj chinuwech, ri ti'ij ri' ri nubin chik chi ninya' chike ri Aarón y ri e ruk'ajol. Re' kan nok k'a pixa' richin jantape' pa ruwi' ri tinamit, xcha' ri Dios. 35Ri ti'ij ri nel-pe chire ri kamelabel ri niporox, kan jari' ri xjach pa kiq'a' ri Aarón y ri e ruk'ajol, y re' xuchop chupan ri q'ij toq rije' xe'ok chupan ri samaj richin sacerdote. 36Chupan ri q'ij ri' ri Jehová xuya' ri pixa' ri' pa kiwi' ri qawinaq, y xubij k'a chike ri kan k'o chi nikiya' chike ri sacerdote richin yekito', chi kan keri' tikibana-apo ri winaqi' ri chi sol chi sol ri yebe-apo.
37Kere' ri kibanik ri kichojmilal ri kamelabel ri yeporox chijun ri taq chikopi', ri sipanik richin jalajoj ruwech ixin, ri kamelabel richin nikuyutej mak, ri kamelabel roma jun ch'a'oj, ri sipanik richin nikijech-ki' pa rusamaj ri Dios y ri sipanik richin nuq'alajirisaj chi junamatajineq-ruwech rik'in. 38Jare' ri ruchojmilal ri xuya' ri Jehová chire ri Moisés pa ruwi' ri juyu' Sinaí pa tz'iran ruwach'ulew, ri q'ij toq ri Moisés xuya' ri pixa' chike ri ruwinaq israelita richin tikik'uaj-apo ri kisipanik chire ri Jehová.
Currently Selected:
Lev 7: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
