Lev 6
6
1Xch'on chik jun bey ri Jehová rik'in ri Moisés, y xubij chire: 2Wi k'o ta jun wineq ri kan nujikiba' rutzij chikiwech ri winaqi' y chinuwech yin, chi man rubanon ta jun q'oloj y xa kan rubanon, re wineq re' kan aj-mak-wi. Roma rik'in juba' xa man rutzolin ta ri uxqanen kan pa ruq'a', o rik'in juba' neleq' rik'in ri ruwinaq; o rik'in juba' xa rubanon-qa richin chire, ri xa man richin ta. 3O rik'in juba' ja rija' xilo ri rusachon jun chik wineq y man rubin ta chi rik'in rija' k'o-wi. Y xabachike k'a ri xtibanon kere', kan nimakun-wi. 4Wi ta k'o jun wineq nuben jun chike re mak re', k'o chi nutzolij ri ruk'amon-qa. 5-6Toq nretamaj chi rija' aj-mak, k'o chi nutzolij ruk'exel chire ri rajaw y pa ruwi' ri', k'o chi nuya-el jun chire ri ro' chire ri rajel ri ruk'amon-qa. Y chuqa' k'o chi nuk'en-pe rik'in ri sacerdote jun achij karne'l ri kan tz'aqet o nuk'en-pe ri rajel. Y xtusuj k'a chuqa' chuwe yin jun kamelabel, ri k'o chi nibe pa ruwi' ri nutzolij chire ri wineq ri k'uluyun ri ch'a'oj. 7Y keri' xtuben ri sacerdote, y yin xtink'en chik ruwech ri wineq. Y kan jari' k'a xtikuyutej ri rumak ri aj-mak ri', xcha' ri Jehová.
Ri ruchojmilal ri kamelabel ri niporox jumul
8Ri Jehová xch'on chik jun bey rik'in ri Moisés y xubij chi 9tubij chire ri Aarón y chike ri e rijatzul chi jare' ri ruchojmilal re kamelabel: Ri chikop richin kamelabel ri niporox jumul k'o chi nik'oje' kan jun aq'a' pa ruwi' ri porobel, y tikitz'eta' richin man nichup-qa ri q'aq' chuxe'. 10Y ri nimaq'a' ri sacerdote k'o chi nukusaj-el ri rutziaq y chuqa' ri rupan rutziaq ri e banon rik'in lino, y k'ari' xtujok-el ri ruchajul ri chikop y xtumol chiri' chunaqaj ri porobel. 11Y toq rubanon chik ri rusamaj ri' nujel kan ri rutziaq y k'ari' nuk'uaj-el ri chaj chuchi-el ri akuchi ek'o-wi-qa, ri cha'on richin chi chiri' niya'ox-wi. 12Ri q'aq' ri nik'at pa ruwi' ri porobel man jun bey tichup. Y ronojel k'a nimaq'a' ri sacerdote k'o chi nuya' si' pa ruwi' ri racheq-q'aq'. Pa ruwi' ri' xtuya-wi ri poron chikop y pa ruwi' chuqa' ri' xtuya-wi ri q'en richin ri sipanik richin nijunamatej-ruwech wik'in. 13Ri q'aq' richin ri porobel k'o chi kan jantape' nik'at y man jun bey tichup.
Ri jujun chik ruchojmilal ri sipanik ri richin jalajoj ruwech ixin
14Jare' k'a ri ruchojmilal ri sipanik ri richin ri jalajoj ruwech ixin: Jun k'a chike ri e sacerdote ri e rijatzul ri Aarón ri xtisuju chinuwech yin, chuwech-apo ri porobel. 15Y k'ari' xtuchop jun moq' chire ri k'ej ri xolon aceite rik'in y ri jun chuyaj pom ri k'o pa ruwi' ri k'ej. K'ari' nuporoj pa ruwi' ri porobel; jari' ri retal richin ronojel. Y re' jun sipanik poron richin nijubulin chinuwech yin Jehová. 16Y ri k'ej ri nik'oje' kan chire ri sipanik ri man xporox ta, niban kaxlan-wey chire, xaxe k'a man niya' ta ch'amilej-q'or rik'in, y jari' ri nikitej ri Aarón y ri e ruk'ajol; y k'o chi nikitej ri chiri' chuwa-jay richin ri wachoch ri akuchi cha'on-wi. 17Ri sipanik ri' kan ch'aron chuwe yin, junan rik'in ri kamelabel ri niporox richin kuyubel-mak y chuqa' ri kamelabel toq k'o jun ri nitzolix ri ruk'exel. Re' kan ch'aron chuwe yin roma niya' ronojel chuwe richin niporox. Jak'a re juba' ri man xporox ta, re' ninya' chike ri e ruk'ajol ri Aarón richin nok kichin, y kan jantape' xtiban keri'. 18Konojel k'a ri achi'a' ri e rijatzul ri Aarón kan utz xtikitej, y xaxe rije' k'o kiq'a' chire. Y xabachike k'a ri xtichapo, kan k'o k'a ri nuk'en-pe chire. Y re' kan jun pixa' richin jantape' ri ninya' kan chiwe, xcha' ri Jehová.
19Xch'on chik jun bey ri Jehová Dios rik'in ri Moisés y xubij: 20Toq k'o jun chike ri achi'a' ri e rijatzul ri Aarón nok nimalej sacerdote, xtuk'uaj k'a ka'i' libra rik'in nik'aj chayun k'ej; ri nik'aj chire ri k'ej xtusuj nimaq'a' y ri nik'aj chik xtusuj ri tiqaq'ij. Re' xtuben toq nusuj ri sipanik poron, kan achi'el ri ruchojmilal. 21Ri k'ej kan k'o chi nuxol aceite rik'in y nuchaq'arisaj pa xot. K'ari' k'o chi nuwech' y xtusuj richin jun sipanik richin jalajoj ruwech ixin, richin nijubulin chinuwech yin. 22Ronojel ri sipanik ri' kan xtiporox k'a. Kere' k'a xtuben ri achin ri xtok nimalej sacerdote pa ruk'exel ri Aarón. Re' kan jun pixa' ri ninya' chire ri tinamit, richin xtikiben ri e rijatzul ri Aarón richin jantape'. 23Ri sipanik richin jalajoj ruwech ixin, ri kan richin jun sacerdote, ri nusuj chuwe yin, kan xkeruporoj jumul y man jun xketijo, xcha' ri Jehová.
Ri jujun chik ruchojmilal pa ruwi' ri kamelabel richin ri mak
24Ri Jehová xch'on chik rik'in ri Moisés y xubij chi 25tubij chire ri Aarón y chike ri e ruk'ajol ri rubanik ri kamelabel richin nikuyutej ri mak. Re sipanik re' kan ch'aron xaxe chuwe yin, y roma ri' toq nisuj ri sipanik ri', kan niqupix k'a ri ruqul ri chikop ri akuchi yekamisex-wi ri chikopi' richin kamelabel ri kan yeporox jumul. 26Jak'a ri sacerdote ri nisamajin ri porobel, utz nuk'en ti'ij chire ri sipanik ri' richin nutej. Y re' xtutej ri akuchi cha'on-wi chire ri ruwa-jay richin ri wachoch. 27Y wi k'o ta jun chik nichapo ri ruch'akul ri chikop, kan k'o k'a ri man utz ta nuk'en-pe chire. Y wi k'o jun nitzopin ri kik' chirij ri rutziaq, k'o chi xtuch'ej ri akuchi cha'on-wi. 28Ri bojo'y banon rik'in ulew ri akuchi nitzak-wi ri ti'ij richin ri sipanik, kan jumul tipaxix y wi ri bojo'y banon rik'in q'enq'oj-pueq k'o chi xtijuq jebel y xtich'aj kan. 29Re jun kamelabel re' kan janila rejqalen, y kan xaxe ri sacerdote y ri achi'a' ri e kach'alal-ki' ri utz yetijo. 30Jak'a ri kamelabel richin kuyubel-mak ri kan nuk'uex-apo ri rukik'el ri pa wachoch, ri richin nink'en chik ruwech ri wineq, re ti'ij re' man jun xtitijo, xa kan xtiporox k'a ronojel.
Currently Selected:
Lev 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
