Lev 23
23
Ri nimaq'ij richin nikiya' ruq'ij ri Dios
1Ri Jehová xch'on chik rik'in ri Moisés y xubij chire chi 2kere' tubij chike ri ruwinaq: Ja ruchojmilal re' pa ruwi' ri nimaq'ij ri niben chuwe yin, toq rix nimol-iwi' richin niya' nuq'ij yin, y ri q'ij ri' kan nuch'aron yin.
3Waqi' q'ij k'a xtiben isamaj rix, jak'a ri pa ruwuq q'ij kan man jun samaj ri niben, roma re' kan q'ij richin uxlanen y kan xtiben jun molojri'il richin niya' nuq'ij yin; y xabakuchi k'a ixk'o-wi kan xtichajij k'a.
Ri nimaq'ij richin ri Solberi'il y ri kaxlan-wey ri maneq ch'amilej-q'or rik'in
4Jare' ri rucholajen ri q'ij ri nuch'aron yin, richin yixnimaq'ijun richin niya' nuq'ij yin: 5Chupan ri q'ij kajlajuj chire ri nabey ik' toq niqaq'ij-qa, jari' toq nitiker-qa ri nimaq'ij richin ri Solbelri'il. Y ri nimaq'ij ri' niben richin niya' nuq'ij. 6Y chupan ri q'ij wolajuj, xtichop-el richin ninimaq'ijuj ri kaxlan-wey ri maneq ch'amilej-q'or rik'in, richin niya' nuq'ij yin. Y wuqu' k'a q'ij nitej ri kaxlan-wey ri'. 7Ri nabey q'ij richin ri nimaq'ij ri', xtiben k'a jun molojri'il richin niya' nuq'ij yin, y kan man jun samaj tiben. 8Chupan ri wuqu' q'ij ri' xtiporoj sipanik chinuwech yin, y ri ruk'isibel q'ij kan xtiben jun molojri'il richin niya' nuq'ij yin. Y kan man tiben isamaj, xcha'.
Ri sipanik richin nabey ruwech tiko'n
9Ri Jehová xch'on chik rik'in ri Moisés y xubij chire: 10Kere' k'a tabij chike ri awinaq: Toq rix xixok yan chupan ri ruwach'ulew ri xtinya' chiwe richin niwichinaj kan, y toq xtiq'et k'a ri jalajoj ruwech ixin, k'o chi nik'en-pe ri nabey q'etaj chire ri sacerdote. 11Y ri sacerdote xtusiloj k'a ri q'etaj ri' chinuwech yin, richin chi nink'ul chiwech. Y re' niben chupan ri q'ij chirij ri q'ij richin uxlanenri'il. 12Chupan ri q'ij ri', toq nisiloj ri q'etaj, ja chuqa' ri' nisuj jun achij karne'l ri k'o jun rujuna', y kan tz'aqet, richin niporox chinuwech. 13Chuqa' k'o chi nik'en-pe k'ej chayun ri más jebel, ri más juba' kaji' libra, y ri xolon aceite rik'in, richin niporox chinuwech. Y re sipanik re', jun sipanik poron richin janila nijubulin chinuwech yin. Y rik'in ri sipanik ri' nik'en-pe jun litro vino. 14Pa nabey, k'o chi nisuj ri sipanik ri', y k'ari' utz niben kaxlan-wey chire o niwotz'otz'ij pa q'aq' richin nitej. Chuqa' utz nitej choj keri' toq isujun chik ri q'etaj. Re ruchojmilal re' kan jun pixa' richin jantape' ri nuya'on chiwe rix, y xabakuchi ta ixk'o-wi.
Ri nimaq'ij richin Pentecostés
15Chupan ri q'ij domingo toq nik'uaj ri q'etaj ri', richin jun sipanik richin nisilox chinuwech, jak'a q'ij ri' toq xtichop-el rajlaxik wuqu' semana ri nel chi tzij kawineq lajuj q'ij. 16Toq xtz'aqet yan ri wuqu' semana chire ri q'ij domingo, k'o chi nisuj chik jun bey ri k'ak'a' jalajoj ruwech ixin richin sipanik chinuwech yin. 17Rix y ri aj pan iwachoch, k'o chi nik'uaj-el ri sipanik ri' richin nisuj chinuwech; ka'i' kaxlan-wey nima'q, y chikijujunal nikusaj kaji' libra k'ej chayun ri más jebel, y ri kaxlan-wey ri' banon rik'in ch'amilej-q'or. 18Junan k'a rik'in ri kaxlan-wey ye'ik'uaj-el chuqa' wuqu' nima-alaj achija' taq karne'l ri k'o jun kijuna' y kan e tz'aqet, jun alaj achij wákix y ka'i' alaj taq karne'l richin yeporox achi'el ri yeqa' chinuwech yin; pa ruwi' chik re sipanik re' niya' chik ri sipanik richin trigo y ri vino. 19Chuqa' nisuj jun tzuntzun richin kuyubel-mak, y ka'i' nima-alaji' achija' karne'l ri k'o jun kijuna' richin jun sipanik richin uxlanibel. 20Ri sacerdote xkesuju ri chikopi' richin jun sipanik silon chinuwech yin, junan kik'in ri kaxlan-wey richin ri nabey taq ruwech tiko'n y ri ka'i' achija' taq karne'l. Re' kan xtijach k'a chinuwech yin y nok richin ri sacerdote. 21Chupan k'a ri q'ij ri', rix kan xtiben k'a jun nimaq'ij richin niya' nuq'ij y kan man xtiben ta k'a samaj achi'el nikiben ri samajela' ri e yuqul pa samaj, re' kan jun pixa' ri nuya'on chiwe richin q'asen, kan xtikiben ri iwijatzul xabakuchi ek'o-wi. 22Toq napon ri q'ij richin nik'ol ri tiko'n man k'a tikanoj-pe ronojel y man k'a tipich'olij-pe ri xk'oje' kan, roma re' kan tiya' kan chike ri man jun k'o kik'in y chike ri man e iwinaq ta, yin Jehová, ri Dios iwichin rix ri yibin, xcha'.
Ri nimaq'ij richin trompeta
23Xch'on chik ri Jehová rik'in ri Moisés y xubij chire chi 24tubij chike ri ruwinaq: Ri nabey q'ij richin ri ruwuq ik' k'o chi yixuxlan y kan xkixnimaq'ijun richin natabel wichin, y toq xtixupux ri trompeta, jari' toq xtimol-iwi' richin niya' nuq'ij. 25Kan man jun isamaj tiben chupan ri q'ij ri', y kan xtisujula' k'a sipanik poron chinuwech yin, xcha'.
Ri q'ij richin nink'en chik kiwech
26Xch'on chik ri Jehová rik'in ri Moisés y xubij chire: 27Ri lajuj q'ij chire ri ruwuq ik', ja q'ij ri' richin nink'en chik iwech, y k'o k'a chi niben jun molojri'il richin niya' nuq'ij y niporoj jun sipanik chinuwech. Nichajij k'a iwi' y man yixwa' ta chupan ri q'ij ri'. 28Chuqa' man jun isamaj tiben, roma ri' kan jun q'ij richin nink'en chik iwech. 29Wi k'o ta jun wineq ri man nuchajij ta ri' y niwa' chupan ri q'ij ri' kan xtelesex k'a el chi'ikojol. 30Xabachike k'a wineq ri nuben ri rusamaj chupan ri q'ij ri' kan xtinwelesaj k'a el ri ruk'aslen. 31Kan man jun k'a isamaj xtiben chupan ri q'ij ri': Y re' kan jun pixa' ri nuya'on richin q'asen chiwe rix y chike ri iwijatzul, y kan xtichajij k'a xabakuchi ta ixk'o-wi. 32Re' kan q'ij richin uxlanen chiwe rix: Xtichajij k'a iwi' y man yixwa' ta toq nik'is-qa ri q'ij beleje' y nibetane' tiqaq'ij chire ri lajuj q'ij, xcha' ri Jehová.
Ri nimaq'ij richin taq jay e banon rik'in ruq'a-che'
33Xch'on chik ri Jehová rik'in ri Moisés y xubij chire chi 34tubij chike ri ruwinaq: Ri q'ij wolajuj chire ri ik' wuqu' ja q'ij ri' richin yixuxlan y niya' nuq'ij yin, y niben jun nimaq'ij kichin ri taq jay e banon rik'in ruq'a-che'. Wuqu' k'a q'ij xtinimaq'ijuj chinuwech yin. 35Ri nabey q'ij richin ri nimaq'ij ri' kan xtimol-iwi' richin niya' nuq'ij y kan man jun k'a isamaj xtiben. 36Chi wuqu' k'a q'ij richin ri nimaq'ij ri' xtiporoj k'a sipanik chinuwech yin. Y chupan k'a ri ruk'isibel q'ij, xtimol chik iwi' y xtiporoj jun chik sipanik chinuwech yin. Re' kan jun molojri'il richin niya' nuq'ij y roma ri' kan man jun isamaj xtiben chupan ri q'ij ri'.
37Jare' k'a ri rucholajen ri nimaq'ij ri' toq niya' nuq'ij yin. Kan k'o chi ye'iben molojri'il richin yesuj ri sipanik ri yeporox: Ri kamelabel ri niporox, ri sipanik ri jalajoj ruwech ixin, ri ch'aqa' chik kamelabel y ri sipanik richin vino. Ronojel re' xtisuj pa ruq'ijul. 38Pa ruwi' ronojel ri sipanik ri' k'o chi nisuj ri sipanik richin ri q'ij richin uxlanibel, ri sipanik roma ri ibin chi niben y ri sipanik richin matioxinik ri nalex-pe pan iwánima richin niya' chuwe.
39Toq ninimaq'ijuj ri taq jay e banon rik'in ruq'a-che' chire ri q'ij wolajuj chire ri ik' wuqu', toq xik'ol yan ri itiko'n, kan xkixnimaq'ijun k'a wuqu' q'ij richin niya' nuq'ij. Ri nabey q'ij y ri ruk'isibel q'ij, re' q'ij richin uxlanen. 40Ri nabey q'ij richin ri nimaq'ij ri' xtik'uaj ruq'a' taq che' ri ek'o ruwech, y chuqa' xtik'uaj ruq'a' palma, ruq'a' ri che' ri k'o kixaq, y ri ruq'a' ri skab ri nik'oje' chuchi' raqen-ya'. Y xkixnimaq'ijun k'a wuqu' q'ij chinuwech yin. 41Ronojel k'a juna' chupan ri ruwuq ik' xkixnimaq'ijun wuqu' q'ij richin niya' nuq'ij. Y kan jare' ri pixa' ri nuya'on chiwe rix y chike ri iwijatzul richin q'asen. 42Chi wuqu' k'a q'ij ri' chi'iwonojel rix xkixk'oje' chupan ri taq jay ri xke'iben rik'in ri ruq'a-che'. Y ri iwijatzul chuqa' xkek'oje' wuqu' q'ij pa taq jay ri e banon rik'in ruq'a-che', 43richin xtoqaqa chikik'u'x chi rix xixk'oje' pa taq jay ri e banon rik'in ruq'a-che' toq xixinwelesaj-pe pan Egipto. Yin Jehová ri i-Dios ri yibin, xcha'.
44Kan keri' xubij ri Moisés chike ri ruwinaq israelita pa ruwi' ri nimaq'ij richin nikiya' ruq'ij ri Jehová.
Currently Selected:
Lev 23: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
