Lev 22
22
1Ri Jehová xch'on chik rik'in ri Moisés y xubij chire: 2Tabij chire ri Aarón y chike ri e ruk'ajol: Kan tiya' rejqalen ri sipanik ri nikisuj ri iwinaq, richin keri' man niyoq' ta ri nubi'; yin Jehová ri yibin. 3Chuqa' tabij chike rije': Xabachike chike ri iwijatzul ri ek'o wakami y ri xkepe chiwech-apo, wi xtijel-apo rik'in ri sipanik ri sujun chuwe yin Jehová, koma ri iwinaq, y ri sacerdote ri' xa man ch'ajch'oj ta, kan xtelesex k'a el chinuwech yin; yin Jehová ri yibin. 4-5Jun sacerdote nok man ch'ajch'oj ta wi k'o ta yabil ri nutaluj-ri' chirij, o ri nel ta ri achi'el ya' chupan ri rukowil, o xtuchop jun ch'akulaj kamineq, o jun wineq ri man ch'ajch'oj ta, o jun chikop ri man ch'ajch'oj ta. Roma ri' man nutej ta ri sipanik ri e jachon chuwe k'a toq xtich'ajch'ojir na. 6-7Ri sacerdote ri xtichapo jun chike ronojel re', kan xtok man ch'ajch'oj ta. K'o chi natin richin utz nutej ri sipanik ri', ri e jachon chuwe. K'a toq niqaq'ij-qa, k'ari' xtich'ajch'ojir, y k'ari' utz nutej ri sipanik ri e jachon chuwe, roma nuya'on q'ij chire richin chi jari' nutej. 8Man nitej ri ti'ij richin jun chikop ri xken ruyon o ri xkamisex roma jun k'uxunel chikop, roma rik'in re' xa kan niben chi kan man ix ch'ajch'oj ta. Yin Jehová ri yibin. 9Kan tiyaka' k'a pan iwánima ri pixa' ri nuya'on chiwe, richin keri' man yixqaqa ta pa mak, y richin man yixken ta roma niben chi man jun rejqalen ri pixa' ri'; yin Jehová ri in ch'arayon iwichin.
10Xaxe ri aj pan iwachoch xketijo ri sipanik ri e jachon chuwe yin, y man tikitej ri man aj pan iwachoch ta, achi'el ri jun ta q'ejelonel richin ri sacerdote, o jun aj-ik'. 11Jak'a wi k'o ta jun sacerdote nuloq' ta jun rusamajel, ri samajel ri' kan utz nutej ri sipanik ri', chuqa' ri rusamajel ri alaxineq pa rachoch utz nutej. 12Wi k'o ta jun imi'al ri k'ulan rik'in jun ri man sacerdote ta, man niya' q'ij richin nutej ri sipanik ri'. 13Jak'a wi k'o jun chike ri imi'al ri nitzolin pan iwachoch roma xmalkanej kan o roma rujachon-ri' rik'in rachijil, y man xk'oje' ta ral, y xa nuben achi'el toq k'a xten na, chire rija' ninya' q'ij richin nutej ri sipanik ri'. Jak'a ri man aj pan iwachoch ta man tikitej. 14Wi k'o ta jun wineq ri man ya'on ta q'ij chire richin nutej ri sipanik ri', y man retaman ta chi xa ch'aron chiwe rix, y toq nunabej, k'o chi nuya' ruk'exel chiwe rix, y pa ruwi' ri', nuya' jun chire ri ro' chire ri rajel. 15Rix ri ix sacerdote man tiya' k'a q'ij chi ri iwinaq nikiben chi maneq rejqalen ri sipanik ri', ri nikisuj chuwe. 16Keri' man tiya' q'ij richin rije' nikitej ri sipanik, richin man nikejqalej ri tojbalil mak, roma kan ja yin Jehová ri in ch'arayon ri sipanik ri', xcha'.
Ri k'atzinel chike ri chikopi' richin yesuj
17Ri Jehová xch'on chik jun bey rik'in ri Moisés y xubij chire: 18Kere' tabij chire ri Aarón y chike ri ralk'ual y chuqa' chike ri iwinaq israelita: Jare' ri ruchojmilal ri xtiben wi niwajo' ta nisuj jun chikop chinuwech roma xalex-pe pan iwánima, o roma ri ibin chi niben, richin niporoj chinuwech yin. Re chojmilal re' kan xtiban iwik'in rix y kik'in ri man iwinaq ta ri ek'o chi'ikojol. 19Richin nink'ul chiwech ri isipanik, k'o chi nisuj jun chike ri achij wákix, jun achij karne'l, o jun achij tzuntzun ri kan e tz'aqet. 20Jak'a man tisuj jun chikop chuwe ri man tz'aqet ta, roma wi keri' man xtink'ul ta chiwech.
21Keri' chuqa' wi nisuj jun kamelabel richin jun sipanik richin niq'alajirisaj chi nijunamatej-iwech wik'in, roma ri ibin chi niben, o roma xalex-pe pan iwánima, k'o chi nisuj jun wákix o jun karne'l o jun tzuntzun ri kan e tz'aqet richin kan xtink'ul chiwech. 22Man tisuj chinuwech jun chikop moy, jetz' raqen, maneq jun ruq'a', nipujan rij, k'o ri yabil sarna chirij, o k'o sal chirij. Ronojel re' kan man tisuj richin niporoj chinuwech yin. 23Wi nalex-pe pan iwánima jun sipanik, ninya' k'a q'ij chiwe richin nisuj jun chikop xotoxik. Jak'a wi niwajo' nisuj jun sipanik roma ibin chi niben, kan man ninya' ta k'a q'ij richin nisuj ri chikop ri', roma man xtink'ul ta chiwech. 24Chuqa' man tisuj chinuwech yin jun chikop ri xa man tz'aqet ta ri rukowil. Re' kan man tisuj stape' pa taq itinamit. 25Man tik'ul ri chikop ri' chuwi-kiq'a' ri man e iwinaq ta richin nisuj chinuwech yin. Wi xtisuj, man xtink'ul ta chiwech roma man tz'aqet ta, xcha'.
26Ri Jehová xch'on chik rik'in ri Moisés y xubij chire: 27Toq nalex jun ti iwákix, jun ti ikarne'l, o jun ti itzuntzun, k'o chi nik'oje' rik'in ri rute' wuqu' q'ij richin nitz'uman. Jak'a toq nuchop-el ruwaqxaq q'ij kan utz chik richin niporoj chinuwech. 28Ri chikop ri k'o ralaj, man nikamisaj ta pa jun q'ij junan rik'in ri alaj. 29Y toq nisuj jun sipanik richin matioxinik chinuwech yin, kan tibana' k'a pa ruchojmilal richin kan xtink'ul chiwech. 30Chuqa' kan titija' ronojel ri ti'ij chupan ri q'ij ri', y man tiyek kan richin ri jun chik q'ij. Yin Jehová ri yibin.
31Kan tiyaka' k'a pan iwánima ri pixa' richin jantape' ri nuya'on chiwe, y kan titaqej. Yin Jehová ri yibin. 32Man tiben chi niyoq'otej ri nubi' yin, richin keri' kan xtinimirisex k'a nuq'ij yin iwoma rix, ja yin Jehová ri in ch'arayon iwichin. 33Yin xinelesan-pe iwichin chupan ri ruwach'ulew Egipto richin chi xinok i-Dios. Yin Jehová ri yibin, xcha'.
Currently Selected:
Lev 22: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
