Isa 66
66
Ri qitzij ruya'ik ruq'ij ri Dios
1Ri Jehová nubij: Ri nutz'uyubal k'o wawe' chikaj,
y ri rupalibal ri waqen, ja ri ruwach'ulew.
¿Akuchi kami nich'ob rix richin nipaba-q'anej jun wachoch?
¿Akuchi kami nich'ob niben-wi jun k'ojelibel richin yinuxlan juba'?
2Ja yin ri xibanon ronojel re banobel re',
y keri' xbanatej.
Ja yin Jehová ri yibin.
Jak'a yin kan utz xtintz'et ri wineq ri ruqasan-ri',
ri nibison ránima toq nimakun,
y ri kan nuk'en rukiy ri nuch'abel.
3Ek'o winaqi' ri nikisuj jun bóyix chuwe,
y k'ari' nibekikamisaj kan jun kiwinaq.
Rije' nikisuj jun karne'l chuwe,
y k'ari' nikisuj jun tz'i' chire ri ki-dios.
Nikisuj jalajoj kiwech trigo chuwe,
y k'ari' nikisuj ri rukik'el jun aq chire ri dios ri'.
Nikisuj pom chuwe yin,
y k'ari' nikiya' chik ruq'ij jun wachibel.
Ri winaqi' ri' xa kan chikijujunal xkicha' ri achike xkiben,
y kan janila xkajo' ri kan ninwetzelaj yin.
4Roma ri' yin chuqa' kan xtinya' ri ruk'ayewal pa kiwi' rije'.
Kan xtinya' pa kiwi' ri achoq chuwech janila nikixibij-ki'.
Yin kan xenwoyoj, jak'a man jun xk'uluban-pe ri nuch'abel.
Xich'on kik'in, jak'a man jun xak'axan wichin.
Xa xkiben ri etzelal chinuwech,
y xkicha' ri man niqa' ta chinuwech yin.
5Kan tiwak'axaj ri nuch'abel yin Jehová,
rix ri kan iya'on nuq'ij.
Kan ek'o iwach'alal ri kan itzel nikina' chiwe,
roma rix in itzeqeliben yin.
Rije' nikibij chiwe chi yin nink'ut ri nuk'ojlen,
y chi rije' nikajo' richin yixkitz'et rik'in kikoten.
Man rik'in ri' rije' xkek'ixbitej, nicha' ri Dios.
6¿Niwak'axaj rix ri niq'ajan ri peteneq pa tinamit?
¿Niwak'axaj achi'el kich'abel winaqi' ri pa rachoch ri Dios?
Jari' ri ruch'abel ri Jehová.
Jare' noruya' rutojbalil-mak pa kiwi' ri e etzelanel richin.
7¿Iwak'axan kami rix chi xalex jun ak'ual toq ri rute' man jani tuna' q'axo'n?
8¿Achike kami chiwe rix rak'axan re banobel re'?
¿Achike kami chiwe rix tz'eteyon re jun na'oj re'?
¿Nitz'ukutej kami jun ajawaren pa jun q'ij?
¿Nitz'ukutej kami jun tzobaj winaqi' richin jun ruwach'ulew pa jun ti ramaj?
Jak'a ri Sión xe'alex taq ral toq man jani tunabej ri ruq'axo'n.
9Ja ri Jehová ri nibanon richin nitz'ukutej-q'anej ri ak'ual rik'in ri rute'.
¿Achi'el ta k'a toq man ta xtuya' q'ij richin nalex ri ak'ual?
10Roma ri' kixkikot k'a rik'in ri tinamit Jerusalem,
janipe' chiwe rix yixajowan yixkikot rik'in.
Kan kixnimaq'ijun k'a rix iwonojel ri ixk'o pa bis roma rija'.
11Y ri tinamit ri' kan xkixrutzuq y xtukuquba' ik'u'x,
k'a ja toq jebel ninoj ri ipan,
kan achi'el k'a nuben jun te'ej kik'in ri taq ral.
Y keri' rix kan jebel k'a xtik'oje' pa ruk'iyal iwik'in.
12Yin Jehová ninjikiba' nutzij chi xtibanatej,
roma kan xtinteq-pe uxlanibel-k'u'x pan iwi',
y xtuben achi'el jun nimalej raqen-ya'.
Chuqa' ri beyomel kichin ch'aqa' chik winaqi' xtoqaqa pa ruk'iyal,
achi'el nibulbu'x jun raqen-ya'.
Y rix kan jebel k'a xkixchajix y xkixtzuq roma ri Jerusalem.
13Achi'el nuben jun te'ej toq nukuquba' ruk'u'x ri ti ral,
keri' xtinben yin iwik'in rix,
y chiri' pa Jerusalem kan xtiwil kuqubabel-k'u'x.
14Toq rix xtitz'et ronojel re',
ri iwánima kan janila xtikikot.
Ri iwuchuq'a' kan xtik'iy achi'el nijotayin chi'anin ri q'ayis.
Yin kan xkixinwurtisaj rix,
jak'a pa kiwi' ri e etzelanel wichin kan ja ri woyowalen ri xtiqaqa pa kiwi'.
15Roma xkinapon pa runik'ajal jun surkum,
rik'in nu-carruaje ri banon rik'in q'aq' richin ninwelesaj woyowal.
Y xtinya' rutojbalil-mak pa kiwi' ri e etzelanel wichin.
16Y rik'in q'aq' y espada xtinq'et-tzij pa kiwi' konojel winaqi',
y kan e k'iy k'a ri xkenkamisaj.
17Roma konojel ri kijachon-ki' richin nikiben ri etzelal ri pa taq kiqejoj, y kan kitzeqeliben jun dios ri k'o pa kinik'ajal, ri nikitej ri rutijul aq, y ch'aqa' chik ri kan man utz ta achi'el ri ch'oy; konojel winaqi' re' kan xke'elesex-el junan y xkek'is. Yin Jehová ri yibin. 18Roma ri itzel taq kibanobal y ri kich'obonik, kan xtapon jun q'ij richin xkenmol konojel tzobaj winaqi' richin ri ruwach'ulew. Y rije' xkepe richin nokitz'eta' ri nuk'ojlen. 19Y re' jun retal chike rije'. Y k'ari' kan xkenteq jujun chike ri man xeken ta kik'in ri ch'aqa' chik winaqi' richin ri ruwach'ulew. Kan xkenteq k'a el pa ruwach'ulew Tarsis, Fut, Libia, Lidia, ri akuchi yetikir nikikusaj ri ch'ab; chiri' pa Tubal, Grecia y ri ch'aqa' chik ruwach'ulew ri ek'o nej chuchi' ri palou, ri man jun bey kak'axan ri nubi' yin, ni man jun bey kitz'eton ri nuk'ojlemal richin chi nikiq'alajirisaj ri ruwaq'ijaj ri k'o wik'in. Y ri taqonela' ri' xkebe richin xtikiq'alajirisaj ronojel re'. 20Y chirij ronojel re' xkekimol konojel ri iwinaq ri kitalun-ki' chupan ch'aqa' chik ruwach'ulew, y xkekik'en-pe richin jun sipanik chuwe yin. Rije' kan xkekik'en-pe chikij kiej, pa carruaje, chikij kowilej taq kiej y chikij camello. Y xkekik'en-pe pa nujuyu' ri k'o pa Jerusalem. Yin Jehová ri yibin. Ronojel re' kan achi'el nikiben ri iwinaq israelita toq nikik'en-pe pa wachoch ri kisipanik richin jalajoj ruwech ixin pa taq ch'ajch'oj k'ojelibel.
21Y chikikojol ri xketzolin-pe, yin xkencha' jujun sacerdote y jujun levita. Y rije' xkebanon nusamaj yin. Yin Jehová ri yibin.
22Kan xkek'oje' richin q'asen ri iwijatzul y ri ibi', achi'el ri k'ak'a' kaj y ri k'ak'a' ruwach'ulew ri xtinben yin, ri kan beneq ruwech e k'ak'a' chinuwech yin. Yin Jehová ri yibin. 23Xtibanatej k'a chi ronojel ik' y q'ij richin uxlanen, kan konojel k'a winaqi' richin chijun ruwach'ulew xkepe richin nokiya' nuq'ij. Yin Jehová ri yibin. 24Chirij re' xke'el-el richin xtikitz'et konojel winaqi' ri xeken roma xeyakatej chuwij yin. Y ri jut ri xkek'oje' chikij ri kich'akul man jun bey xkeken, y ri q'aq' ri achoq chupan xkebe-wi ri kaminaqi' ri' kan man jun bey xtichup. Y toq xtikitz'et konojel ri winaqi', kan xtimulun kik'u'x chirij. Yin Jehová ri yibin.
Currently Selected:
Isa 66: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.