Isa 65
65
Ri rutojbalil mak pa kiwi' ri e yakatajineq chirij ri Dios
1Ri Jehová nubij: Ja ri man jun kik'utun chuwe,
chikiwech rije' xtink'ut-wi-wi'.
Ri kan man jun bey in kikanon ta,
ja rije' ri xke'ilon wichin.
Y ja ri tinamit ri man jun bey kinatan ta nubi',
chike k'a rije' xtinbij chi jare' ink'o wawe'.
2Ronojel k'a q'ij xinya' ri nuq'a' pa kiwi' ri nutinamit ri man e nimey ta tzij,
ri xa e beneq pa jun bey ri man utz ta,
ri xa ja ri nikich'ob rije' ri nikiben.
3Re winaqi' re' kan jantape' xkiyek woyowal,
roma kan yekisuj kamelabel ri chiri' pa taq kiqejoj,
y chuqa' pa ruwi' porobel ri banon rik'in xan nikiporoj ri pom.
4Kan ek'o k'a chiri' chikikojol ri jul richin muqbel,
y nikik'owisaj aq'a' ri chiri'.
Chuqa' kan nikitej ti'ij richin aq,
y chupan ri kibojo'y k'o ruya'al q'utun ri man ch'ajch'oj ta.
5Y nikibij chike ch'aqa' chik kiwinaq:
Kixk'oje' chiri' ri akuchi ixk'o-wi.
Man kixjel-pe qik'in, roma roj kan más oj loq'olej chiwech rix, yecha'.
Re winaqi' re' kan e achi'el q'aq' ri chijun q'ij yebuqun;
y kan man utz ta nuben chuwe, roma xa e achi'el sib.
6Y ronojel re' kan chinuwech yin xtz'ibatej-wi kan.
Y yin kan man xtinq'etej ta ri nuq'a',
jak'a kan xtinya' rajel ruk'exel chike,
7roma ri kimak rije' y chuqa' roma ri kimak ri kite-kitata'.
Rije' kan xekiporola' pom pa ruwi' taq juyu',
y ri chiri' kojol taq juyu' xeyakatej chuwij.
Yin kan xtinya' rutojbalil ri mak pa kiwi'.
Ri Jehová kan nusuj ri urtisanik
8Yin Jehová ri yibin.
Toq ri uva ri man jani kewux, y janila kiya'al,
ri winaqi' man nikajo' ta nikichoy ri juwi-uva,
roma k'a nikiwux na kan ri uva.
Keri' chuqa' xtinben yin roma ri wajowabal pa kiwi' ri nusamajela':
Y roma ri' man xkenk'is ta el konojel.
9Jak'a kan xtinben chi xkek'oje' kan rijatzul ri Jacob,
y kan xtinben chi xkek'oje' kan winaqi' chiri' pa Judá,
ri xkek'ase' chiri' pa taq nujuyu'.
Ri xencha' kan yin, kan xtikichinaj kan ri ruwach'ulew ri',
y ri nusamajela' kan chiri' xkek'oje-wi kan.
10Ri taq'aj richin ri Sarón kan xtinoj rik'in tzobaj kokoj taq awej,
chuqa' ri taq'aj richin Acor, chiri' xkeyuq'ux-wi nima'q taq awej
kichin ri tinamit ri xkinkikanoj yin.
11Jak'a rix xa xinimalij kan yin Jehová,
y kan ximestaj kan ri juyu' ri kan wichin yin.
Chuqa' nisuj q'utun chikiwech ri Gad y ri Miní.*f13*
12Roma ri' kan nink'en-pe ruk'ayewal pan iwi'.
Kan xtinben chiwe richin xkixkamisex rik'in espada.
Yin xixinwoyoj, jak'a rix man xiniwak'axaj ta.
Xich'on iwik'in, jak'a man xiya' ta ixikin richin xiniwak'axaj.
Xa xiben ri man niqa' ta chinuwech yin,
y xicha' ri man utz ta nintz'et yin.
13Roma ri' yin Jehová kere' ninbij:
Ri nusamajela' kan jebel k'a xkewa-xke'uk'ya',
jak'a rix ri ix aj-maki' man jun xtiwil.
Rije' kan jantape' k'a xkekikot,
jak'a rix kan xkixk'ixbitej.
14Rije' xkebixan rik'in janila kikoten,
jak'a rix kan xkixoq'
y xtireq ichi' roma bis y q'axo'n.
15Yin xtinben chiwe chi rix xkixken,
y ri nusamajela' kan xtikikusaj ri ibi' rix richin nikoyoj itzel.
Jak'a rije' xtinya' jun k'ak'a' kibi'.
16Xabachike k'a iwinaq israelita ri nuk'utuj urtisanik,
kan chuwe k'a yin ri in qitzij Dios ri xtuk'utuj-wi.
Y xabachike k'a iwinaq ri nujikiba-rutzij,
kan chinuwech k'a yin ri in qitzij Jehová xtujikiba-wi.
Y ronojel itzel banobel ri xkiben, yin kan xtinmestaj.
Xa kan man xtintz'et ta chik.
Ri k'ak'a' kaj y ri k'ak'a' ruwach'ulew
17Titz'eta' k'a; yin kan xtinben jun chik k'ak'a' kaj,
y jun chik k'ak'a' ruwach'ulew.
Ronojel ri q'axo'n xa xkemestex,
y kan man xtinatex ta chik.
18Kan jantape' k'a xkixkikot,
y kan jantape' k'a kikoten xtik'oje' iwik'in roma ri xtinbenbana',
roma yin kan xtinbenbana' jun k'ak'a' Jerusalem ri kan xtik'ases.
Y xkenya' winaqi' ri chiri' ri janila xkekikot.
19Chuqa' yin kan xkikikot roma ri Jerusalem,
y xkikikot koma ri nuwinaq.
Y chiri' man jun bey chik xtak'axatej oq'ej,
ni raqoj-chi'ij richin bis.
20Chiri' man jun ak'ual xtiken.
Chuqa' ri rijita'q taq winaqi' man yeken ta toq man jani nitz'aqet ri kijuna'.
Jun wineq niken toq k'o wok'al rujuna',
re wineq re' kan k'a janila ak'ual niken.
Y toq jun wineq niken y man jani titz'aqet wok'al rujuna',
re' oyon etzelanik pa ruwi'.
21Ri winaqi' kan xtikipabala' chik el jun bey ri kachoch,
y kan xkek'oje' chupan.
Xtikitik-qa uva y xtikitej ri ruwech.
22Man xtibanatej ta chi ja ri ch'aqa' winaqi' yepaban-q'anej ri jay,
y xa ch'aqa' chik yek'oje' kan chupan.
Chuqa' man xtibanatej ta chi ja ri ch'aqa' winaqi' nikiben-qa ri kitiko'n,
y xa ch'aqa' chik yetijo ri ruwech.
Ri nuwinaq kan xkeyaloj xkek'ase-el, achi'el nik'ase' jun che'.
Rije' kan xtikitej ronojel ri nikisamajij-qa.
23Man xkesamej ta chaq keri'.
Chuqa' ri ak'uala' ri xke'alex, man xtipe ta ruk'ayewal pa kiwi',
roma rije' y ri e kijatzul kan nuya'on urtisanik pa kiwi'.
24Kan k'a man jani k'a kinkoyoj-pe rije',
toq yin kan xtink'uluba' yan qa ri kich'abel.
Kan k'a man jani ketane-qa richin yech'on wik'in,
yin kan xkenwak'axaj yan.
25Ri utiw y ri karne'l kan xkewa' junan;
ri koj kan xtikitej q'os achi'el ri bóyix.
Jak'a ri kumetz kan k'a xtikibeq' na ri poqolaj.
Jak'a man xkekiti' ta chik winaqi' chiri' pa Sión,
y man jun chik ch'a'oj xtikiben, nicha' ri Jehová.
Currently Selected:
Isa 65: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.