Ez 28

Ri xtibanatej rik'in ri rey richin ri ruwach'ulew Tiro

1Ri Jehová xch'on chik wik'in y xubij chuwe: 2Rat Ezequiel, taya' re jun rutzijol re' chire ri rey richin Tiro y kere' tabij:

Rat kan janila xanimirisaj-awi',

y nach'ob chi at achi'el jun dios,

y ri awajawaren ja ri palou.

Jak'a stape' nana-awi' chi ri anojibal achi'el runojibal ri Dios,

rat xa man at jun dios ta, xa at jun xabachike achin.

3¿Más kami at nowineq rat chuwech ri Daniel?

¿Kan awetaman kami rat ronojel ri e ewatel?

4Xach'ob chi rik'in ri ana'oj y ri anojibal kan xamol k'iy abeyomel,

y kan anojisan ri ak'ojelibal rik'in saqipueq y q'anapueq,

5y chi rik'in ri anojibal kan janila xnimer ri ak'ayij.

Roma ri' xach'ob chi xabeyomer janila y ri abeyomel xbe más pa jotol.

Y roma ri' xanimirisaj-awi'.

6Roma ri' tawak'axaj k'a ri nubij ri Jehová:

Roma rat kan xana' awi' chi ri anojibal achi'el runojibal jun dios,

7jak'a ri Dios xtuben chi xkeyakatej-pe chawij ri man e awinaq ta,

winaqi' ri kan k'o janila ketzelal.

Xtikelesaj k'a ki-espada chawij richin xkatkich'ek.

Y keri' ronojel ri k'o awik'in y ri ana'oj, kan xtikelesaj chawe.

8Toq xkaken, xkabe k'a pa jul richin muqbel,

y kan keri' k'a xkaken pan awajawaren pa runik'ajal ri ya'.

9Y chupan ri q'ij ri', ¿xkatikir kami rat xtapaba-awi' chikiwech ri yekamisan awichin?

¿Y xkatikir kami xtabij chi rat kan at jun dios?

Ni, rat xa at jun achin y man at jun dios ta,

y roma ri' xa kan atk'o chik pa ruq'a' ri nikamisan awichin.

10Xkaken k'a achi'el yeken ri winaqi' ri man e richin ta ri Dios,

y xkaken pa kiq'a' ri man e awinaq ta.

Jare' k'a ri rutzijol ri ruya'on-pe ri Jehová chawe.

Bix richin bis pa ruwi' ri rey richin Tiro

11Ri Jehová xch'on chik wik'in y xubij chuwe: 12Rat Ezequiel, tabixaj k'a re jun bix re' ri ruk'amon-pe bis, pa ruwi' ri rey richin Tiro y tabij jare' ri ninbij yin Jehová:

Kan qitzij na wi chi rat kan at utz chikiwech ch'aqa' chik,

y kan at nojineq rik'in nojibel,

y rat xaben chire ri awajawaren chi kan jebel ok.

13Kan qitzij wi chi achi'el xa ta xak'oje' pa qejoj ri kan nik'ases.

Chuqa' kan xawiq-awi' rik'in k'iy jalajoj ruwech jebelej taq abej.

Ri akuchi xak'oje-wi, k'o chuqa' k'iy q'anapueq,

y ronojel re' kan e banon chik kutzil toq rat xatz'ukutej-pe.

14Rat atk'o k'a chupan ri juyu' richin ri a-dios.*f8*

Y rat nachajij ri juyu' ri' achi'el nuben jun querubín,

y yabiyajilan pa runik'ajal ri abej ri ek'o pa q'aq',*f9*

achi'el nuben jun chike ri a-dios.

15Ri pa rutikeribel kan choj ri abanon-pe kan ja toq xatz'ukutej-pe,

k'a toq xamakun y xilitej ri itzel chawij.

16Kan janila xbe pa jotol ri ak'ayij,

y richin man nibe-qa pa xulan, rat janila xamakun y xaben kamik.

Roma ri' ri Dios xarelesaj-pe pa juyu' ri akuchi at ruya'on-wi.

Y wakami xa man jun nachajij,

y man yabiyaj ta chik chukojol ri abej ri ek'o pa q'aq'.

17Roma kan at jebel ok, rat kan xanimirisaj-awi'.

Roma ri awajawaren kan janila jebel, ri animirisanen xuben chawe chi xa xkik'is ri na'oj ri k'o awik'in.

Roma ri' ri Dios kan xuqasaj aq'ij k'a pan ulew,

y konojel k'a ri rey yetze'en chawij

18Ri amak kan xik'o yan ruwi',

y ri ak'ayij kan man pa ruchojmilal ta xaben chire.

Roma ri' xaben chi xaqasaj kiq'ij ri a-dios.

Roma ri' xinben chi xtzijitej jun q'aq' chi'ikojol rix richin chi xixruk'is.

Y wakami konojel ri winaqi' xkitz'et chi ri awajawaren xa xok kan chaj.

19Konojel ri winaqi' kichin ri ch'aqa' ruwach'ulew janila nikimey.

Kan xak'is y kan man jun bey chik xkayakatej-q'anej.

Ri xtibebanatej pa ruwi' ri ruwach'ulew Sidón.

20Ri Jehová xch'on chik jun bey wik'in y xubij chuwe: 21Rat Ezequiel, katzu'un kela' pa nima-tinamit Sidón, y taya' re jun rutzijol re' pa nubi' yin. 22Yin Jehová kan xkiyakatej k'a chirij ri nima-tinamit Sidón, richin xtiya'ox nuq'ij-nuk'ojlen. Richin keri' konojel winaqi' kan xtiketamaj k'a chi ja yin Jehová ink'o pa ruwi' ronojel. K'ari' xtinq'et-tzij pa ruwi' y kan xtinq'alajirisaj chuwech ri nuch'ajch'ojil. 23Xtinteq k'a pe yabilal pa ruwi' ri tinamit y chuqa' oyowal richin xtibiyin kik' pa taq bey; y konojel ri xkeken xkepunupuxin kan pa taq bey. K'ari' konojel xtiketamaj chi ja yin Jehová ri ink'o pa ruwi' ronojel. 24Richin keri', ri winaqi' israelita kan man jun bey chik xtiberutija' poqon pa kiq'a' ch'aqa' chik ruwach'ulew ri ek'o chunaqaj. Man jun bey chik xtikiben achi'el k'ix ri chaq yekineq ri nuwinaq israelita. K'ari' xtiketamaj chi ja yin Jehová ri ink'o pa ruwi' ronojel. 25Roma toq xtapon ri q'ij chi yin xkenmol ri nuwinaq israelita ri e talutajineq pa taq ch'aqa' chik ruwach'ulew; jari' toq xtiq'alajin chikiwech ri ch'aqa' chik ruwach'ulew chi kan in ch'ajch'oj-wi. Y roma ri' ri nuwinaq israelita kan xkebek'oje' k'a pa ruwach'ulew, ri xinya' chire ri nusamajel Jacob. 26Chiri' k'a xkebek'oje-wi rik'in uxlanibel-k'u'x, xtikipabala' k'a q'anej kachoch y xtikitikila' k'a qa uva, rokik yin ninya' rutojbalil-mak pa kiwi' ri ruwach'ulew ri ek'o chikinaqaj ri xa e etzelanel kichin. K'ari' ri israelita xtiketamaj chi ja yin Jehová ri ki-Dios.

Currently Selected:

Ez 28: KQC

Highlight

Compare

Copy