Ez 27
27
Bix richin bis roma ri ruwach'ulew Tiro
1Ri Jehová xch'on chik jun bey wik'in y xubij chuwe: 2Rat Ezequiel, tabixaj k'a re jun bix re' richin bis pa ruwi' ri Tiro:
3Ri tinamit Tiro k'o chuchi' ri palou.
Rija' banoy k'ayij y loq'oj kik'in konojel ruwach'ulew ri ek'o chuchi' ri palou.
Ri Dios nubij chi rija' nuch'ob chi jebel ok,
4roma ri ruwinaq yeloq'on y yek'ayin kik'in ri ek'o chuchi' ri palou.
Ri Tiro kan jebel ok achi'el jun jebelej barco.
5Rik'in k'isis ri peteneq pa juyu' Hermón, xban ri ruwech ri barco.
Richin xban ri che' ri nipa'e' pa runik'ajal, xk'amer-pe jebelej tiox-che', ri peteneq pa Líbano.
6Richin xkiben ri taq che' ri ninimo ri barco, xkik'en-pe ri jebelej paten-che', ri nipe pa Basán.
Richin xkiben ri rupan, xkik'en-pe jebelej tz'alem k'isis,
ri nipe pa ruwach'ulew Chipre.
Y chukojol ri tz'alem ri', xekiyala' retz'aba'l ri e banon rik'in ri rey tix.
7Richin xban ri tzieq richin kaq'iq' ri ninimo-el ri barco,
xukusex ri jebelej tzieq lino, ri banon-pe pan Egipto.
Y ri jun chik jebelej tzieq keq y raxroj nitzu'un ri niya'on muj, k'amon-pe pa ruwach'ulew Elisá, ri k'o pa runik'ajal ya'.
8Ri achi'a' ri yesilon ri taq che' ri ninimo richin ri barco, kan e nowineq taq achi'a',
re achi'a' re' yepe pa tinamit Sidón y pa tinamit Arfad.
Ri ye'uk'uan richin ri barco, ja ri e nowineq taq achi'a', aj-Tiro. 9Y ri yechojmirisan richin, kan e nowineq taq achi'a', ri yepe pa tinamit Guebal.
Y konojel winaqi' ri k'o ki-barco ye'apon pa Tiro richin yek'ayin y yeloq'on.
10Richin nikichajij ri ruwach'ulew yepe jebelej taq aj-labal,
achi'a' aj-Persia, aj-Lidia y aj-Libia.
Ri rutobal ruwa-kik'u'x y ri rutobal-kijolon kan janila e jebel ok,
re' kan xe'ok wiqobel richin ri tz'aq richin xnimer ruq'ij ri tinamit Tiro.
11Ri yechajin ri tinamit xepe pan Arfad,
rije' yek'oje' pa ruwi' chijun ri tz'aq richin yechajin.
Chuqa' pa taq jay kichin chajinela' ri ek'o pa ruwi' ri tz'aq, xek'oje-wi ri achi'a' aj-Gamad,
ri kitobal rije' chuqa' xe'ok wiqobel richin ri tz'aq,
ronojel re' richin xnimer ruq'ij ri tinamit Tiro.
12Ri Tiro kan pa ruk'iyal k'a k'ayij k'o rik'in,
roma ri' ri ruwach'ulew Tarsis noloq'on-el rik'in.
Y ri nikik'en-pe richin nikik'ayij kan chire rija',
ja ri saqipueq, ri q'eqapueq, ri estaño y ri chajipueq.
13Chuqa' ri winaqi' aj-Grecia, ri aj-Tubal y ri aj-Mésec yepe richin ye'oloq'on-el rik'in.
Y ri nikitojbej kan chire ja ri winaqi' ri e ximil pa samaj kik'in y samajibel ri e banon rik'in q'enq'oj-pueq.
14Ri winaqi' aj-Bet-togarmá yepe richin ye'oloq'on-el rik'in,
rije' nikiya' kan ri kikiej e richin samaj y kiej e richin labal y ri kowilej taq kiej.
15Chuqa' ri winaqi' aj-Rodas y ch'aqa' chik tinamit ri ek'o chuchi' ri palou yepe richin ye'oloq'on rik'in,
nikitojbej kan chire rik'in rey tix y chuqa' yekiya' kan che' q'eq.
16Ri winaqi' aj-Edom ye'oloq'on chuqa' rik'in,
roma kan janila k'iy k'o rik'in.
Y rije' nikitojbej kan chire rik'in jalajoj y jebelej taq abej,
tzieq keq, tzieq ri e tz'ison ruwech y tzieq banon rik'in lino.
17Y chuqa' ri winaqi' aj-Judá y ri aj-Israel yepe rik'in richin ye'oloq'on;
nikik'en-pe trigo ri nipe pa tinamit Minit.
Chuqa' nikik'en-pe kab ri nikiya' ri taq chikopi', aceite richin olivo y jalajoj kiwech aq'om y rik'in ri' nikitojbej kan.
18Ri winaqi' richin Damasco chuqa' ye'oloq'on rik'in, roma chiri' kan ronojel k'o pa ruk'iyal.
Chuqa' nikik'en-pe vino ri niban pa tinamit Helbón,
y nikik'ayij lana ri niban pa tinamit Sahar.
19Ri winaqi' aj-Vedán y ri aj-Uzal ri k'o pa ruwach'ulew Javán ye'oloq'on-el rik'in.
Ronojel ri nikik'uaj-el nikitoj kan rik'in vino, q'eqapueq ri jebel samajin, canela y ch'aqa' chik mololen aq'om.
20Ri winaqi' aj-Dedán nikiben chuqa' loq'oj rik'in,
y nikitojbej kan rik'in xalma richin kiej.
21Ri winaqi' aj-Arabia y ri e aj-raqen pa ruwi' ri tinamit Quedar chuqa' ye'oloq'on rik'in.
Y rije' nikitojbej kan rik'in jalajoj kiwech ri kokoj taq awej.
22Ri loq'onela' richin ri tinamit Sabá y ri Raamá ye'oloq'on chuqa' rik'in.
Y nikitojbej kan rik'in jubulej taq aq'om, jebelej taq abej y q'anapueq.
23Chuqa' ri winaqi' aj-Harán, ri aj-Cané, ri aj-Edén, ri aj-Sabá, ri aj-Asiria y ri aj-Media ye'oloq'on rik'in. 24Y rije' nikitojbej kan rik'in jebelej taq tzieq keq,
tzieq ri tz'ison ruwech, tzieq ri niya'ox chupan jun jay, y kolo' ri e jebel e pach'un.
25Ri nimalej taq barco e richin ri tinamit Tarsis jari' ri niq'axan-pe ri ejqa'n richin ri Tiro.
Ri tinamit Tiro janila beyomel k'o rik'in.
Rija' kan achi'el jun nimalej barco ri k'o pa ya'.
26Y ri ruk'ayij xkik'uaj-el pa taq ronojel ruwach'ulew,
achi'el nikiben ri yenimo ri barco.
Jak'a ri Dios xtuya-pe jun kaq'iq' re kere' pa relebel-q'ij richin xtik'is ri Tiro.
27Kan ronojel re' xtik'is; ri rubeyomel, ri ruk'ayij, ri ruloq'oj,
konojel ri yesamajin richin ri barco,
ri k'ayinela', ri aj-labal y konojel ri ch'aqa' chik, kan junan k'a xkebe chuxe' ri ya'.
28Y toq ri e samajela' richin ri barco nikireq kichi' roma yeken yan,
konojel ri winaqi' ri ek'o chuchi' ri ya', kan xtipe k'a xibinri'il y bis kik'in.
29Konojel ri yenimo ri barco xkeqaqa kan chupan.
Y konojel ri yesamej rik'in ri barco xa kan xaxe chik e pa'el-apo chuchi' ri ya'.
30Kan xkesik'in k'a roma ri Tiro,
y xtikireq k'a kichi' rik'in janila q'axo'n.
Y roma ri' xtikiyala' k'a ulew pa kijolon y xtikibolqotila-ki' pa chaj.
31Y roma ri xbanatej chupan ri tinamit ri' rije' xtikijososej-el ri rusumal-kiwi',
xtikikusaj tzieq richin bis,
y kan xke'oq' rik'in janila q'axo'n.
32Y xtikiben k'a jun bix richin bis pa ruwi' ri Tiro,
y ri xtibanon, kan xtuben rik'in janila q'axo'n.
Y jare' k'a ri bix ri xtikibixaj rije':
Ri Tiro, ojer kan ja rija' ri más jebel chikiwech ri ch'aqa' chik ruwach'ulew,
jak'a re wakami k'o pa runik'ajal ri ya' y man jun nitikir nuben.
33Ojer kan toq noqaqa-el ri ruk'ayij chuchi' ri palou,
kan xuben chike ri ch'aqa' chik winaqi' richin xekikot.
Janila e k'iy rey ri xebeyomer kan, roma ri rubeyomel rija'.
34Wakami xa kan xwuluwu' y xbe chuxe' ri ya'.
Y chuqa' kan xbe-qa k'a chuxe' ri ya' ronojel ri k'o rik'in,
y konojel ri winaqi' kan xebe-qa chuxe' ri ya' junan rik'in ri beyomel ri'.
35Konojel k'a ri winaqi' richin ri ch'aqa' chik ruwach'ulew ri ek'o chuchi' ri ya', kan xtikimey y xtikixibij-ki',
y ri ki-rey kan xkebaybot roma xibinri'il,
y xtijalatej k'a kiwech roma xibinri'il.
36Ri loq'onela' richin ri ch'aqa' chik ruwach'ulew kan xkixibij k'a ki',
ri winaqi' kan xkik'en rukiy roma xkitz'et ri xuk'uluwachij ri Tiro.
Y pa ruk'isibel, ri Tiro xa kan xapon k'a pa jun wululen,
y kan man jun bey chik xtiyakatej-q'anej, xkecha'.
Currently Selected:
Ez 27: KQC
Highlight
Share
Compare
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
