Ex 6
6
1Jari' toq ri Jehová Dios xubij chire ri Moisés: Wakami xtabetz'eta' ri xtinbenbana' rik'in ri rey, rik'in ri wuchuq'a' yin. Rija' xtuya-el q'ij chiwe y xkixroqotaj-el chupan ri rutinamit, xcha' ri Jehová.
Ri Jehová Dios nroyoj ri Moisés jun bey chik
2Ri Dios xch'on chik jun bey rik'in ri Moisés y xubij chire: JA YIN RI JEHOVÁ. 3Jak'a yin ri' ri xink'ut-wi' chuwech ri Abraham, ri Isaac y ri Jacob, y xink'ut-wi' chikiwech achi'el RI DIOS RI NITIKIR NUBEN RONOJEL; y man jun bey xketamaj ta nuwech rik'in ri nubi' Jehová. 4Chuqa' xinjikiba' chike chi ninya' ri ruwach'ulew richin ri Canaán chike, ri akuchi xeq'ax yan juba'. 5Keri' chuqa' yin xinwak'axaj ri kijiloj ri awinaq israelita, ri e yuqul pa samaj kik'in ri aj-Egipto y roma ri' xoqaqa chinuk'u'x ri nujikiban chike ri iwati't-imama'. 6Wakami k'a kabiyin y tabebij chike ri awinaq: Ja yin Jehová, y ja yin xkinelesan-el iwichin chuxe' ri kowilej taq samaj y xkixtotej k'a el chuwech ri ilinri'il, y rik'in ri nimalej wuchuq'a', yin xtinq'et-tzij pa kiwi' rik'in nima'q taq ruk'ayewal. 7Y xkixok k'a nutinamit y yin xkinok i-Dios, y xtiwetamaj k'a chi ja yin Jehová ri i-Dios ri xixelesan-pe chuxe' ri kowilej taq samaj pan Egipto. 8Xkixink'uaj chupan ri ruwach'ulew ri nusujun-pe chike ri Abraham, ri Isaac y ri Jacob, Y YIN RI JEHOVÁ xtinya' k'a kan chiwe rix, richin xtiwichinaj, kacha' chike, xcha' ri Jehová.
9Ronojel k'a ri xubij ri Jehová, xutzijoj k'a ri Moisés chike ri ruwinaq. Jak'a rije' xa man xkak'axaj ta roma xa kimalin chik kik'u'x roma ri ilinri'il. 10Chirij re', ri Jehová xch'on chik rik'in ri Moisés y xubij chire: 11Kabiyin chik k'a jun bey rik'in ri rey richin ri Egipto y tabij chire chi tuya' q'ij chiwe richin chi yixel-el chupan re ruwach'ulew, xcha' ri Jehová.
12Jak'a ri Moisés xubij chire ri Jehová: Man yinkak'axaj ta na ri nuwinaq israelita, k'atala' chik k'a ri rey, roma yin xa man nel ta ok nuch'abel, xcha'.
13Y ri Jehová xch'on kik'in ri Moisés y ri Aarón y xubij chike ri achike ruk'amon richin nikiben ri winaqi' israelita y ri ruk'amon chi nuben ri rey richin ri ruwach'ulew Egipto, roma rije' k'o chi yekelesaj-pe ri winaqi' chiri'.
Ri kibi' ri kati't-kimama' ri Moisés y ri Aarón
14Jere' k'a ri e tata'aj kichin ri tzobaj winaqi', kichin ri e rijatzul kan ri Israel. Ri e ruk'ajol ri Rubén, ri nabey ruk'ajol ri Israel: Je ri Hanoc, ri Falú, ri Hesrón y ri Carmí. Jere' ri tzobaj winaqi' ri xetz'ukutej-pe kik'in ri e rijatzul kan ri Rubén.
15Ri e ruk'ajol kan ri Simeón: Ja ri Jemuel, ri Jamín, ri Óhad, ri Jaquín, ri Sóhar y ri jun chik ruk'ajol ja ri Saúl, ri ral kan ri jun ixoq aj-Canaán. Jere' ri tzobaj winaqi' ri xetz'ukutej-pe kik'in ri e rijatzul kan ri Simeón.
16Y jere' ri kibi' k'a chikijujunal ri e ruk'ajol ri Leví ri nitiker-pe rik'in ri nimalaxel k'a rik'in ri chaq'laxel. Y ri' ja ri Guersón, ri Quehat y ri Merarí. Y ri Leví xk'ase' k'a 137 juna'. 17Jare' ri ruchojmilal ri tzobaj winaqi' kichin ri e ruk'ajol ri Guersón: Ja ri Libní, y ri Simí. 18Jere' ri kibi' chikijujunal ri e ruk'ajol ri Quehat, ri Amram, ri Ishar, ri Hebrón y ri Uziel. Y ri Quehat, xk'ase' k'a 133 juna'. 19Y ri e ruk'ajol ri Merarí ja ri Mahli y ri Musí. Jere' ri tzobaj winaqi' ri xetz'ukutej-pe kik'in ri e riy-rumam kan ri Leví, ri nitiker-pe rik'in ri nimalaxel k'a rik'in ri chaq'laxel.
20Ri Amram xk'ule' rik'in ri ruch'utite', ri rubini'an Jocabed y jare' ri kite' ri Aarón y ri Moisés. Y ri Amram xk'ase' 137 juna'.
21Y ri e ruk'ajol ri Ishar, ja ri Coré, ri Néfeg y ri Zicrí. 22Ri e ruk'ajol ri Uziel, ja ri Misael, ri Elsafán y ri Sitrí.
23Y ri Aarón xk'ule' rik'in ri Eliseba rumi'al ri Aminadab, rana' ri Nahasón. Y xek'oje' k'a e kaji' kalk'ual y re' xkibini'aj: Nadab, Abihú, Eleazar y ri Itamar.
24Y ri e ruk'ajol ri Coré, ja ri Asir, ri Elcaná y ri Abiasaf. Jere' ri tzobaj winaqi' ri xetz'ukutej-pe kik'in ri e rijatzul kan ri Coré.
25Y ri Eleazar, jun chike ri ruk'ajol ri Aarón, xk'ule' rik'in jun chike ri rumi'al ri Futiel, y xk'oje' jun kalk'ual ri xubini'aj Finees. Jere' k'a ri e tata'aj kichin ri tzobaj winaqi', kichin ri e rijatzul kan ri Leví.
26Jare' k'a ri Moisés y ri Aarón ri xch'on ri Dios kik'in y xubij chike chi tikelesaj ri tinamit Israel pan Egipto, y pa taq tzobaj k'a kekinuk'u' richin yekelesaj-el. 27Kan ja rije' k'a ri xech'on rik'in ri rey richin Egipto, richin chi yekelesaj-pe ri e rijatzul kan ri Israel ri chiri'.
Ri Moisés y ri Aarón kan e rusamajela-wi ri Dios
28Ri q'ij toq ri Jehová Dios xch'on rik'in ri Moisés pan Egipto, 29xubij chire: Ja yin Jehová; tabij k'a chire ri rey richin ri Egipto ronojel ri ninbij yin chawe, xcha'.
30Jak'a ri Moisés xubij chire ri Jehová: ¿Achi'el ta k'a toq yirak'axaj ri rey, toq xa man nel ta ok nuch'abel?, xcha'.
Currently Selected:
Ex 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
