Ex 5
5
Ri Moisés y ri Aarón xebe rik'in ri rey
1Y k'ari' ri Moisés y ri Aarón xe'apon chuwech ri rey y xkibij chire: Ri Jehová ri Dios richin ri Israel, kere' ri rubin-pe: Taya' q'ij chire ri nutinamit richin niberubana' jun nimaq'ij chuwe yin ri pa tz'iran ruwach'ulew, chayineq-pe, xecha' rije'.
2Jak'a ri rey xubij: ¿Achike chi Dios ri Jehová richin chi ninwak'axaj ri nubij y ninya' q'ij chire ri tinamit Israel richin nibe? Yin man wetaman ta ruwech ri Jehová, ni man xtinya' ta q'ij richin ri tinamit nibe, xcha' chike.
3Y rije' xkibij: Ri Dios ri richin ri tinamit Israel xuk'ut-ri' chiqawech; roma ri' nik'atzin chi roj yojbiyin oxi' q'ij k'a pa tz'iran ruwach'ulew y chiri' nibeqasuju' kamelabel chuwech ri Jehová ri qa-Dios. Roma wi man xtiqaben ta re', rik'in juba' xqojrukamisaj rik'in jun nimalej yabil, o yojken chi espada, xecha' chire.
4Jak'a ri rey xubij chike: Rix Moisés y Aarón ¿Achike roma toq niben chike ri iwinaq richin rije' nikipaba' ri kisamaj? Y rix tibana' ri isamaj ri k'o chi niben, xcha'. 5Y chuqa' xubij chike: Titzu' la iwinaq janila xewinaqir re wawe' pan Egipto. Y rix kan niwajo' richin man yesamej ta, xcha' chike. 6Y chupan ri q'ij ri', ri rey xubij chike ri achi'a' ri e pa'el pa kiwi' ri aj-raqen ri ek'o pa kiwi' ri israelita ri e yuqul pa samaj: 7Wakami k'a man niya' ta chik ri páxa chike ri winaqi', richin nikiya' chupan ri ch'abeq achi'el ri banon-pe chike. Wakami xa kan ja rije' xkebekanon. 8Y man tiqasaj ri rajlabal ri xan. Xa tikibana' achi'el ri kibanon-pe ronojel q'ij. Roma xa yalan kiq'oral, roma ri' yesik'in richin nibekisuju' kamelabel chire ri ki-Dios. 9Tinimirisaj k'a ri ilinri'il pa kiwi' richin nibe kik'u'x rik'in ri kisamaj y man tikak'axaj ri tz'ukun-tzij ri niban chikiwech, xcha' ri rey.
10K'ari' xebe k'a ri aj-raqen aj-Egipto kik'in ri e aj-raqen ri ek'o pa kiwi' ri kiwinaq israelita ri e yuqul pa samaj y rije' xkibij chike ri kiwinaq: Ri rey kere' nubij: Yin man ninya' ta chik ri páxa chiwe. 11Wakami k'a ja rix ri xkixkanon y akuchi na xtiwil-wi, y man rik'in ri' man ninqasaj ta ri rajlabal ri xan ri k'o chi niben, nicha' ri rey, xecha' rije'.
12Y roma ri' ri israelita xkitaluj k'a ki' chijun ruwach'ulew Egipto chukanoxik q'ayis ri nikikusaj pa ruk'exel ri páxa. 13Ri aj-Egipto ri e pa'el pa kiwi' ri aj-raqen chikikojol ri israelita yekipararej, y nikibij k'a chike: K'o chi niben ri rajlabal ri xan, achi'el ri niben pa jun q'ij toq k'a niya'ox na ri páxa chiwe, xecha'. 14Y toq man xetikir ta xkiben, kan janila k'a xech'ay ri caporal koma ri aj-raqen ri e ruya'on ri rey, y xkik'utuj k'a chike: ¿Achike roma man xijech ta ronojel ri xan richin iwir y chuqa' re wakami man xijech ta achi'el ri ibanon-pe?, xecha' chike.
15Jari' toq xebe ri e aj-raqen israelita rik'in ri rey y xkibij chire: ¿Achike roma naben chiqe, richin niqatej poqon roj ri oj asamajela' 16richin man niya'ox ta chik ri páxa chiqe? ¿Achike roma nibix chi tiqabana', achi'el ri qabanon-pe ronojel q'ij? ¿Y chuqa' achike roma kan janila k'a yojch'ay, y chire re' ja ri winaqi' awichin rat ri k'o kimak?, xecha' chire.
17Jak'a ri rey xubij: Rix ix q'ori', ja', kan janila ix q'ori'. Roma ri' nibila' chi nibesuju' kamelabel chire ri Jehová. 18Kixbiyin, kixbesamej, y kan man xtiya'ox ta ri páxa chiwe y k'o chi nijech ri rajlabal ri xan, ri q'aton pan iwi', xcha' ri rey chike.
19Jari' toq ri e aj-raqen chikikojol ri israelita, xkina' chi ek'o pa latz', toq xbix chike chi man niqasex ta ruwi' ri rajlabal ri xan ri q'aton pa kiwi' richin chi nikijech. 20Y toq xe'el-pe rik'in ri rey, jari' toq xkik'ul-ki' kik'in ri Moisés y ri Aarón; e koyoben-apo. 21Y ri aj-raqen ri' xkibij chike ri Moisés y ri Aarón: Ja ri Jehová xtuq'et-tzij pan iwi', roma ri yixajin chubanik roma ja rix ri k'o imak chi ri rey y ri e rusamajela', man yojqa' ta chik chikiwech, y kan jak'a rix ri xixbanon chi xkichop ri ki-espada richin yojkikamisaj, xecha'.
Ri Moisés nich'on rik'in ri Jehová
22Toq xkak'axaj re', jari' toq ri Moisés xbech'on rik'in ri Jehová y xubij: Ajaw, ¿achike roma janila ye'aya' pa tijoj-poqonal re tinamit re'? ¿Roma re' toq xinateq-pe? 23Roma xa kan xaxe toq xibe rik'in ri rey, richin yich'on pan abi' rat, kan jari' k'a toq xunimirisaj ri tijoj-poqonal pa qawi' roj ri oj atinamit y rat k'a man jani oj akolon ta el, xcha'.
Currently Selected:
Ex 5: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
