Deut 6
6
Ri nimalej pixa'
1Ja ronojel pixa' re' ri xuya' ri Jehová ri qa-Dios chuwe, richin xixintijoj, richin jari' ri nitaqej chupan ri ruwach'ulew ri xkixapon-wi ri kan xtok iwichin. 2Tinimaj k'a ronojel ri pixa' ri ninbij chiwe rix, chike ri iwalk'ual y ri iwiy-imam richin chi niya' ruq'ij ri Jehová ri qa-Dios, y keri' k'iy k'a juna' xkixk'ase' chuwech re ruwach'ulew. 3Roma ri' rix nuwinaq israelita tiwak'axaj, y kan tiya' k'a pan iwánima re pixa' re' richin utz xkixbe, y keri' kan xkixwinaqir chupan ri ruwach'ulew ri akuchi nik'ase' ronojel ruwech tiko'n, achi'el rusujun ri Jehová ri qa-Dios, ri chuqa' ki-Dios ri qati't-qamama'.
4Tiwak'axaj k'a rix nuwinaq: Ri Jehová ri qa-Dios kan xaxe rija' ri k'o, y man jun chik achi'el rija'.
5Kan tiwajo' k'a ri Jehová ri qa-Dios rik'in ronojel iwánima y rik'in ronojel ik'u'x, chupan chijun ri ik'aslen.
6Kan tiya' k'a pan iwánima ronojel ri ch'abel ri xinbij chiwe wakami; 7y kan tikamuluj chike ri iwalk'ual y kan ke'itijoj k'a jantape', pa taq iwachoch, pa taq bey, toq yixkotz'e-qa y toq yixyakatej-el.
8Kan tixima' chirij ri iq'a' re ruchojmilal re' y keri' chuqa' tixima-el nik'aj iwech richin jun retal. 9Y kan titz'ibaj k'a chuwech ri che' richin ri ruchi' taq iwachoch.
Ri Moisés nunataj chi kan tinimex rutzij ri Dios
10Toq ri Jehová ri qa-Dios, xtuya' ri ruwach'ulew ri rujikiban kan chike ri qati't-qamama' Abraham, ri Isaac y ri Jacob, y ri xujikiba' chi nuya' chiwe jun nimalej ruwach'ulew ri ek'o jebel taq tinamit chupan ri man rix ta ix yakayon-q'anej. 11Xujikiba' chuqa' chi ri iwachoch nojineq rik'in beyomel ri man rix ta ix samajiyon, y ek'o pozo ri man rix ta ix k'otoyon, ek'o uva y olivo ri man rix ta ix tikiyon. Toq jebel chik ix wayneq 12man timestaj k'a ri Jehová ri xixelesan-pe pa ruwach'ulew Egipto, ri akuchi xixxime' pa samaj. 13Kan tiya' k'a ruq'ij ri Jehová ri qa-Dios y kan tisamajij xaxe rija'. Toq rix niya' itzij, tibana' kan xaxe pa rubi' rija'. 14Man ke'itzeqelibej ch'aqa' chik dios ri nikiya' kiq'ij ri ch'aqa' chik tinamit ri ek'o-pe chi'inaqaj, 15roma ri Jehová ri qa-Dios ri k'o iwik'in rix, kan jun Dios ri kan man jun chik achi'el rija' y kan k'o chi'ikojol. Roma ri' man tiyek royowal, roma wi xtiyek royowal, kan xkixruk'is chuwech re ruwach'ulew.
16Y man titejtobej ri Jehová ri qa-Dios, achi'el xiben chire pa Masá. 17Titaqej k'a y kan tibana' ronojel ri pixa' ri ruya'on chiqe ri Jehová ri qa-Dios. 18Tibana' k'a ronojel pa ruchojmilal chuwech ri Jehová ri qa-Dios y kan utz k'a xkixbe, richin keri' kan ronojel k'a utz xtel chiwech toq xkixok-apo chupan ri ruwach'ulew ri rusujun y rujikiban chi nuya' chike ri qati't-qamama'. 19Y keri' xkerelesaj-el chiwech ri e etzelanel iwichin achi'el ri rubin kan.
20Y toq k'o jun q'ij ri iwalk'ual xtikik'utuj chiwe chi achike nel chi tzij ronojel re pixa' re', ri xubij ri Jehová ri qa-Dios. 21Rix xtibij chike: Roj xojxime' pa samaj kik'in ri aj-Egipto, jak'a ri Jehová xojrelesaj-pe chiri' rik'in ri nimalej ruchuq'a'. 22Roj xqatz'et ronojel ri nima'q taq rubanobal ri xeruben chiri' pan Egipto, y xuben chike chi xebaybot konojel ri winaqi' y chuqa' ri rey y konojel ri aj pa rachoch. 23Jak'a roj xojrelesaj-pe chiri' y xojruk'en-pe chupan re ruwach'ulew ri akuchi xujikiba' kan chike ri qati't-qamama'. 24Chirij ri' ri Jehová xubij chiqe chi k'o chi niqataqej ronojel ri pixa' ri ya'on chire ri tinamit y kan niqaya' ruq'ij richin keri' utz xqojbiyin. Keri' chuqa' rija' xqojruchajij achi'el rubanon qik'in k'a re q'ij re'. 25Wi roj niqataqej rik'in ronojel qánima ronojel ri pixa' ri ya'on chiqe, rija' kan xtikikot qik'in, xkixcha' chike.
Jun tinamit ch'aron richin ri Jehová
(Ex 34:11-17)
Currently Selected:
Deut 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
