Deut 16
16
1Toq napon ri ik' Abib kan tibana' ri nimaq'ij richin natabel toq ri Jehová xuya' ri Solbelri'il, richin niya' ruq'ij-ruk'ojlen rija', roma chupan jun aq'a' chire ri ik' ri' jari' toq rija' xojrelesaj-pe pan Egipto. 2Chupan k'a ri nimaq'ij ri', xtikamisaj k'a wákix y karne'l richin nitej chiri' akuchi rucha'on-wi ri Jehová richin niya' ruq'ij.
3Ri ti chikop ri' nitej rik'in kaxlan-wey ri maneq ch'amilej-q'or rik'in. Wuqu' k'a q'ij nitej ri kaxlan-wey keri'. Re' nuk'exewachuj ri tijoj-poqonal, roma kan chi'anin k'o chi xojel-pe pan Egipto. Keri', kan chijun k'a ik'aslen toqaqa chi'ik'u'x ri q'ij toq xojel-pe pan Egipto. 4Chupan ri wuqu' q'ij ri' man tik'oje' ch'amilej-q'or iwik'in chupan chijun ri iruwach'ulew. Chuqa' chire ri ti'ij ri xtitej chupan ri tiqaq'ij ri', man jun nik'oje' kan richin ri jun chik q'ij. 5Y man tikamisaj ri chikop ri' chupan xabachike tinamit, 6xa kan xaxe ri akuchi rucha'on-wi ri Jehová ri qa-Dios, richin niya' ruq'ij-ruk'ojlen. Chiri' k'o chi nikamisaj ri chikop ri' toq niqaq'ij-qa, roma jari' toq xojel-pe pan Egipto. 7Ri ti'ij ri' xtisa' y nitej ri akuchi rucha'on-wi ri Jehová ri qa-Dios, y ri jun chik q'ij jari' yixtzolin pa taq iwachoch. 8Waqi' q'ij nitej ri kaxlan-wey ri maneq ch'amilej-q'or rik'in, y pa ruwuq q'ij nimol-iwi' y yixuxlan richin niya' ruq'ij-ruk'ojlen ri Jehová ri qa-Dios; ri q'ij ri' kan man jun achike samaj niben.
Ri nimaq'ij richin Pentecostés
9Toq q'axineq chik wuqu' semana chire ri q'ij toq nichap ri q'atoj trigo, 10jari' toq k'o chi ninimaq'ijuj ri semana richin niya' ruq'ij-ruk'ojlen ri Jehová ri qa-Dios. Y xtik'uaj k'a apo ri sipanik ri janipe' k'a nalex-pe pan iwánima, ri achi'el k'a ri urtisanik ri ruya'on ri Jehová ri qa-Dios pan iwi'. 11Kan xkixnimaq'ijun k'a chuwech ri Jehová ri qa-Dios ri chiri' ri akuchi ruch'aron-wi rija', richin niya'ox ruq'ij, junan kik'in ri iwalk'ual, ri isamajela', ri levita ri xkek'oje' pan itinamit, ri winaqi' ri man e iwinaq ta, ri meba'i' y ri malkani' ri xkek'oje' chi'ikojol pa taq itinamit. 12Toqaqa k'a chi'ik'u'x chi roj chuqa' xojxime' pa samaj chupan ri ruwach'ulew Egipto, roma ri', kan tibana' k'a ronojel re ninbij chiwe wakami.
Ri nimaq'ij richin taq jay ri banon rik'in ruq'a' taq che'
13Y toq xiyitz' yan ri ruya'al ri uva y xiq'et yan ri trigo, jari' toq xkixnimaq'ijun wuqu' q'ij richin ri taq jay banon rik'in ruq'a' taq che'. 14Y kan kixkikot k'a chupan ri nimaq'ij, toq yixuxlan y niya' ruq'ij ri Dios; rix, ri iwalk'ual, ri isamajela', ri e levita, ri winaqi' ri man e iwinaq ta, ri meba'i' y ri malkani' ri ek'o chupan ri iruwach'ulew. 15Wuqu' k'a q'ij xkixnimaq'ijun richin niya' ruq'ij-ruk'ojlen ri Jehová ri qa-Dios chiri' akuchi rucha'on-wi rija', roma kan xtuya' urtisanik pan iwi' rik'in ronojel ri itiko'n y pa ruwi' ronojel ri samaj ri xtiben. Kan xkixnimaq'ijun rik'in janila kikoten.
16Konojel ri achi'a' k'o chi ye'apon oxi' mul pa jun juna', chuwech ri Jehová chiri' akuchi rucha'on-wi rija'; chupan ri nimaq'ij richin ri kaxlan-wey ri maneq ch'amilej-q'or rik'in, ri nimaq'ij richin ri Pentecostés y ri nimaq'ij richin ri taq jay banon rik'in ruq'a' taq che', y man jun tapon chuwech ri Jehová ri qa-Dios ri man jun ruk'uan-el. 17Chi'ijujunal xtik'uaj-apo ri isipanik achi'el ri urtisanik ri ruya'on ri Jehová ri qa-Dios pan iwi'.
Ri ruchojmilal ri nikik'uaj ri to'onela'
18Kan ke'ikanola' k'a to'onela' y samajela' richin ri tinamit, richin nikiq'et-tzij pa ruwi' chijun ri ruwach'ulew ri xtibeya'ox chiwe chi'ijujunal ri tzobaj, richin keri' yixbiyin rik'in ruchojmilal. 19Kan tibana' ronojel pa ruchojmilal. Man tiben chi niya' chire jun ri xa man ruk'amon ta richin nuk'ul, y man tiben chi man niya' ta chire jun ri ruk'amon richin nuk'ul. Man tirayij chi yixpuaqix. Roma wi keri' niben xa nuben chiwe richin nutz'apej runaq'-iwech richin niben pa ruchojmilal y ri iq'atbel-tzij xa nuben chi ja ri e choj yeqaqa kan chuxe'. 20Ja ri ruchojmilal, y kan xaxe ri ruchojmilal ri k'o chi nitzeqelibej, richin yixk'ase' y xtiwichinaj ri ruwach'ulew ri xtiberuya' ri Jehová ri qa-Dios chiwe.
21Chunaqaj ri akuchi ibanon-wi ri porobel richin ri Jehová ri qa-Dios, man jun che' titik-qa richin niya' ruq'ij ri ixoq-dios Asera. 22Man jun wachibel paban tiben rik'in abej richin niya' ruq'ij, roma re' kan nretzelaj ri Jehová ri qa-Dios.
Currently Selected:
Deut 16: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
