Deut 15
15
Ri juna' richin nikuyutej ri k'as
1Toq rix k'o niya' pa qajik chike ri iwinaq, pa ronojel wuqu' juna' k'o chi nikuy ri man tzolin ta chiwe. 2Re kuyubel re' kere' ri rubanik: Konojel k'a ri winaqi' ri k'o kiya'on pa qajik chike ri kiwinaq kan xtikikuy k'a ri k'as ri'. Man chaq tik'utux, roma ja juna' ri' ri rubin ri Jehová chi nikuyutej ri k'as. 3Ri man e iwinaq ta kan utz nik'utuj chike chi nikitoj ri kik'as xabachike juna', jak'a chike ri iwinaq rix, man tik'utuj ri k'as ri' chupan ri juna' ri'. 4Ri Jehová kan pa ruk'iyal k'a ri urtisanik ri xtuya' pan iwi' chupan ri ruwach'ulew ri xtuya' chiwe richin niwichinaj. Man jun wineq ri xtik'oje' chi'ikojol rix ri man jun k'o ta rik'in 5wi kan jantape' ninimaj rutzij ri Jehová ri qa-Dios y nitaqej ronojel re pixa' re ninbij chiwe re q'ij re'. 6Roma ri Jehová ri qa-Dios kan xtuya' urtisanik pan iwi', achi'el ri rusujun chiwe. Rix kan k'o k'a xtiya' pa qajik chike ri ch'aqa' chik ruwach'ulew; jak'a rix man jun tiqej chike rije'. Rix kan xtiq'et k'a tzij pa kiwi' e k'iy ruwach'ulew, jak'a rix kan man jun chik xtiq'aton-tzij pan iwi'.
7Wi k'o ta jun chike ri iwinaq ri kan man jun k'o rik'in, ri k'o chupan ri tinamit ri xtuya' ri Jehová ri qa-Dios chiwe, rix kan man tikowirisaj ri iwánima richin nito'. Xa kan tiya' k'a ri k'atzinel chire; 8tijoyowaj ruwech y tiya' pa qajik chire ri nuk'utuj chiwe. 9Man tiya' q'ij chi nipe itzel taq ch'obonik iwik'in y nibij: Xa noqaqa yan ri juna' wuqu' toq nikuyutej ronojel k'as, yixcha-qa. Y roma ri' xa kan itzel chik k'a xtitz'et y man jun niya' chire. Man k'a tiben keri', roma rija' xa xtisujun-q'anej chuwech ri Jehová y rix kan xtiban chiwe chi kan ix aj-mak. 10Kan tiya' k'a ri nik'atzin chire rik'in ronojel ri iwánima, y man tiben k'ek'el rik'in. Roma re utzilej banobel re' ri Jehová ri qa-Dios xtuya' urtisanik pan iwi' rik'in ronojel ri ye'iben. 11Chupan ri ruwach'ulew kan jantape' xkek'oje' ri winaqi' ri man jun k'o kik'in, y roma ri' yin ninbij chiwe richin kan ta xtijoyowaj kiwech y xke'ito' ri iwinaq ri k'o nik'atzin chike.
Ri pixa' pa kiwi' ri loq'on taq samajela'
(Ex 21:1-11)
12Wi k'o ta jun qawinaq nuk'ayij-ri' iwik'in, stape' achin o ixoq, yixrilij k'a waqi' juna', y ri jun chik juna' niya-el q'ij chire richin nibe y nitotej-el. 13Toq nibij chire richin nibe, man tiya' q'ij chire richin nibe choj keri' y man jun nuk'uaj-el. 14Man tiben k'ek'el rik'in, xa kan xtiya-el rukarne'l, ru-trigo y ru-vino richin keri' xtich'er chiwech ri rusipan ri Jehová ri qa-Dios chiwe. 15Man timestaj chi roj chuqa' xojxime' pa samaj chiri' pan Egipto, y ri Jehová ri qa-Dios xojrelesaj-pe chiri'. Roma ri' wakami ninbij re jun ruchojmilal re' chiwe.
16Wi ta ri isamajel nubij chi man nrajo' ta yixruya' kan, roma kan xuk'en ruwech iwik'in roma kan ipoqonan. 17Chuwech ri che' ri k'o chire ri ruchi' ri jay rik'in jun ch'ich' ri is-is rutza'n xtikiwop k'a ri ruxikin, y jare' nok retal chi re wineq re' xok isamajel richin jantape'.
18Man itzel tina' toq nitotej jun isamajel ri yuqul pa samaj iwik'in, roma waqi' juna' xixrilij, y xaxe xiya' ri nik'aj chire ri rajel ri nuch'ek jun samajel ri nisamej chi q'ij. Wi xtiben keri' ri Jehová ri qa-Dios xtuya' urtisanik pan iwi'.
Ri nabey taq achija' kal ri chikopi'
19Kan xke'ich'er k'a chire ri Jehová ri qa-Dios, ri nabey taq achija' kal ri iwawej. Man tikusaj chupan ri isamaj rix ri chikop ri', ni man tisokaj ri rusumal richin nikusaj rix. 20Re taq chikopi' re' jare' ri ye'itej ronojel juna', junan xke'itej rix y ri e aj pan iwachoch, chuwech ri Jehová ri qa-Dios chiri' ri akuchi rucha'on-wi rija'. 21Wi ri ti chikop moy, o jetz', o k'o ri man tz'aqet ta chire, re ti chikop re', man tisuj richin kamelabel chuwech ri Jehová ri qa-Dios. 22Re' kan utz k'a nitej chi'iwonojel, chupan ri iwachoch, stape' ix ch'ajch'oj o man ix ch'ajch'oj ta achi'el nubij ri pixa'. Utz nitej achi'el xa ta jun masat. 23Xaxe k'a man titej ri rukik'el ri ti chikop ri', xa kan titixa' pan ulew achi'el nitix ri ya'.
Ri nimaq'ij richin natabel ri Solbelri'il
(Ex 12:1-20)
Currently Selected:
Deut 15: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
