2 Sam 3
3
1Jak'a ri labal chikikojol ri e ka'i' tzobaj ri' xa man xtane' ta qa, xa kan más k'a xnimer. Y ri David y ri ruwinaq más nik'oje-el kuchuq'a', jak'a ri e ruwinaq kan ri Saúl xa xemayamo-qa.
Ri ralk'ual ri David ri xe'alex pan Hebrón
(1 Crón 3:1-4)
2Ri David xe'alex k'a e waqi' ruk'ajol ri chiri' pan Hebrón. Ja kibi' re': Ri nabey rubini'an Amnón ral ri Ahinóam ri aj-Jezreel. 3Ri ruka'n rubini'an Quilab, ral ri Abigail ri rixjayil kan ri Nabal aj-Carmel. Ri rox rubini'an Absalón, ral ri Maacá ri rumi'al ri Talmai, ri rey richin ri ruwach'ulew Guesur. 4Ri rukaj rubini'an Adonías, ral ri Haguit. Ri ro' rubini'an Sefatías, ral ri Abital. 5Ri ruwaq rubini'an Itream, ral ri Eglá. Jare' ri ralk'ual ri David ri xek'oje' ri chiri' pan Hebrón.
Ri Abner xjunamatej-ruwech rik'in ri David
6Rokik najin ri labal chikikojol ri ka'i' tzobaj, ri Abner kan más k'a xk'oje-el ruchuq'a'. 7Toq k'a k'es na ri Saúl, xk'oje' k'a jun ru-concubina*f3* rubini'an Rispá, rumi'al ri Aiá. Y jun q'ij ri Is-bóset xuk'utuj chire ri Abner ri achike roma xk'oje' rik'in ri ru-concubina kan ri ánima rutata'.
8Roma ri' ri Abner xyakatej royowal, y xubij chire: Rat nach'ob chi yin xa in achi'el jun tz'i', jun ri xa xpiskolin chiwij, richin xq'ax kik'in ri aj-Judá. Man keri' ta, roma yin janila in utz nubanon rik'in ronojel ri richin kan ri atata', kik'in ri e rach'alal y ri e rachibil kan. Pa ruwi' ri' rat man at nujachon ta pa ruq'a' ri David. Y wakami naq'abaj-pe chuwij richin ximakun rik'in ri jun ixoq ri'. 9Jak'a re wakami, yin kan ja ta k'a ri Jehová ri xtiya'on-pe ruk'ayewal pa nuwi' wi man xkiq'ax ta rik'in ri David, roma ri Jehová kan rik'in jikibel-tzij rusujun ri q'atbel-tzij pa ruq'a' rija'. 10Wakami yin xa xtinq'axaj k'a ri q'atbel-tzij richin kan ri Saúl pa ruq'a' ri David richin xtok pa ruq'a' rija' ri q'atbel-tzij richin chijun ri ruwach'ulew Israel y ri Judá, ri nitiker-pe pa Dan y napon k'a pa Beerseba, xcha' 11Y ri Is-bóset kan man jun chik xtikir xubij chire ri Abner, roma kan janila nuxibij-ri' chuwech.
12K'ari' ri Abner xeruteq-el achi'a' uk'uey rutzijol k'a rik'in ri rey David, y xubij-el: Rat awetaman achoq pa ruq'a' k'o-wi chijun ri ruwach'ulew. Roma ri' tijunamatej k'a qawech, y yin xkatinto' richin konojel nuwinaq israelita xkeq'ax kan awik'in rat, xcha'.
13Y ri David xubij-el chi kan utz xrak'axaj ri taqon-el rubixik chire, xaxe k'a xuchilabej-el chire ri Abner chi toq xtapon rik'in, k'o chi ruk'uan-el ri Mical ri rumi'al kan ri Saúl richin nitikir nibech'on rik'in ri David. 14Chirij ri' ri David xeruteq chik el uk'uey rutzijol k'a rik'in ri Is-bóset, y xubij-el chi tutaqa-pe ri Mical ri rixjayil, roma jari' ri xuch'ek toq xerukamisaj ri e wok'al aj-Filistea.
15K'ari' ri Is-bóset ek'o k'a xeruteq richin xbekik'ama-pe ri Mical chuwech ri rachijil ri rubini'an Paltiel ruk'ajol ri Lais. 16Jak'a ri Paltiel kan xutzeqelibej-el ri rixjayil, y janila k'a noq' beneq xapon k'a pa tinamit Bahurim. Y ri Abner xubij chire chi titzolej kan chirachoch. Y ri Paltiel kan xtzolin kan.
17K'ari' ri Abner xch'on kik'in ri aj-raqen richin ri ruwach'ulew Israel, y xubij chike: Rix kan iwajowan-pe chi ja ta ri David nok ta kan rey pa qawi'. 18Wakami k'a, kan keri' xtibanatej, roma ri Jehová xch'on yan rik'in ri David y xubij chire chi k'a ja rija' xtikolon ri tinamit Israel pa kiq'a' ri aj-Filistea y pa kiq'a' konojel ri e etzelanel qichin, xcha' chike.
19Chuqa' xch'on kik'in konojel ri winaqi' aj-Benjamín. Y k'ari' xbe pan Hebrón rik'in ri David richin xberubij chire ri achike nikich'ob ri benjamita y ri ch'aqa' chik israelita. 20Y ri Abner xapon k'a rik'in ri David chiri' pan Hebrón, y e rachibilan-el e juwineq achi'a'. Y ri David xuben k'a jun nimalej wa'in roma xapon ri Abner. 21Chirij ri' ri Abner xubij chire ri David: Yin jare' xkiyakatej-el y xkibe richin xkenmol-pe awik'in konojel ri qawinaq israelita, richin nikijikiba' kitzij awik'in richin keri', xke'ok pan aq'a' y xkaq'aton-tzij pa kiwi' kan achi'el ri arayibel rat, xcha'.
K'ari' ri David xujech-el ri Abner y rija' xtzolin-el rik'in uxlanibel-k'u'x.
Ri Joab xukamisaj ri Abner
22Ri Abner k'a jun nima-ko'ol k'a tel-el rik'in ri David rik'in uxlanibel-k'u'x, y jari' toq ri Joab y ri aj-labal xetzolej-pe pan oyowal y kik'amon-pe ri k'o rejqalen ri xkimej-pe chuwi-kiq'a' ri etzelanel kichin. 23Y xtzijox k'a apo chire ri Joab chi ri Abner xapon rik'in ri David y chi ri David xuya-el q'ij richin chi xtzolin-el rik'in uxlanibel-k'u'x. 24K'ari' ri Joab xpe rik'in ri rey David y xubij chire: ¿Achike k'a re xaben-el rat? roma ri Abner xpe awik'in. ¿Y achike roma toq xaya' q'ij chire richin xtzolin na el? 25Man awetaman ta k'a chi ri Abner xpe awik'in xaxe richin yaruq'ol y richin yatorunachaj toq yatel y yatok, y richin nretamaj ronojel ri achike naben, xcha'.
26Y xaxe k'a xubij kan keri', ri Joab xel-pe rik'in ri rey, y xeruteq-el ri rusamajela' chirij ri Abner. Y xbekiq'i' k'a rik'in ri pozo richin ri Sira y xkiben chire chi xtzolin pan Hebrón. Y ri David man xunabej ta ri'. 27Y toq ri Abner xapon chik pan Hebrón, jari' toq ri Joab xuk'uaj-el chuchi' ri tinamit richin nitzijon rik'in pa ruyonil. Jari' toq xuchuq'ij chirupan. Y ri Abner xken kan chiri'. Y keri' ri Joab xuben ruk'exel chire roma xukamisaj ri Asael ri rach'alal. 28Jak'a toq ri David xunabej ri xuben ri Joab, xubij chi rija' y ri ruq'atbal-tzij kan maneq kimak chuwech ri Jehová, roma ri rukamik ri Abner. 29Y xubij chuqa': Ri Joab y ri e aj pa rachoch kan xtikejqalej k'a re mak re'. Kan jantape' ta k'a xtikiq'axaj yabil, sokotajik ri jantape' xtipujan, ruyabilal ri ch'akulaj, q'ajtajik, kamik rik'in espada o wayjal, xcha'. 30Keri' xubij ri David roma ri Joab y ri Abisai xkikamisaj ri Abner, stape' ri Abner xa pan oyowal xukamisaj ri Asael ri kach'alal, ri chiri' pa Gabaón.
31Chirij ri' ri David xubij chire ri Joab y ri ruwinaq, chi richin nibekimuqu' kan ri Abner, rije' k'o chi nikiretz ri kitziaq chikij, tikikusaj tzieq richin bis, y ke'ik'o-el chuwech ri kamineq. Y ri rey David chirij k'a ri kamineq xbe-wi. 32Keri' rumuqik ri Abner xbanatej pan Hebrón. Ri David kan janila xoq' chuchi' ri jul, y chijun tinamit xkoq'ej chuqa'. 33Y chiri' ri David xubixaj k'a re jun bix re':
¿Kan ruk'amon kami chi keri' rubanik ri rukamik ri Abner?
Rija' xa xken k'a achi'el niken jun kamisanel.
34Stape' xa man ximon ta ri ruq'a-raqen,
xken k'a pa kiq'a' ri e kamisanel, xcha'.
Y konojel k'a ri winaqi' xe'oq' chik q'anej jun bey. 35Chirij re' ri winaqi' ri' xbekisuju' ruway ri David roma xa xqaq'ij yan. Jak'a ri David xuya' rutzij y xubij chi ri Dios kan xtuya' ta k'a ruk'ayewal pa ruwi' rija' wi k'o xtutej chupan ri q'ij ri'. 36Y konojel k'a ri ek'o-apo chiri' kan xqa' chikiwech ri xubij y ronojel ri xuben rija'. 37Keri' chupan ri q'ij ri', konojel ri winaqi' aj chiri' y ri ch'aqa' chik israelita xq'ax chikiwech chi man ja ta ri rey xbin chi tikamisex ri Abner.
38K'ari' ri David xch'on kik'in ri e aj-raqen ri ek'o chiri' y xubij chike: Rix xitz'et chi wakami xken jun chike ri tata'al, jun achin ri nim ruq'ij chupan re qaruwach'ulew Israel. 39Jak'a yin stape' qasan aceite pa nuwi' richin xinok rey, wakami ninna' chi xa man jun wuchuq'a' k'o, roma ri Joab y ri Abisai xa kan ik'owineq chik ruwi' kuchuq'a' chinuwech yin. Y roma ri' ninbij chi kan ja ta k'a ri Jehová xtiya'on rutojbalil chike roma ri itzel ri xkiben, xcha'.
Currently Selected:
2 Sam 3: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.