2 Sam 2
2
Toq ri David xok kan rey richin Judá
1Chirij k'a ronojel re' ri David xuk'utuj chire ri Jehová wi ruk'amon nitzolej chupan jun chike ri tinamit richin ri Judá. Y ri Jehová xubij chire chi utz nibe. Y xuk'utuj chik k'a achike chi tinamit ri k'o chi nibe-wi. Y ri Jehová xubij chi tibe pan Hebrón. 2K'ari' xbe-el ri David y xeruk'uaj k'a el chi e ka'i' rixjayil; ri Ahinóam aj-Jezreel, y ri Abigail rixjayil kan ri ánima Nabal ri aj-Carmel. 3Chuqa' xeruk'uaj-el ri aj-labal ri ek'o rik'in, y chikijujunal rije' xkik'uaj-el kixjayilal y ri kalk'ual. Y xebek'oje' pa taq kokoj tinamit chiri' pan Hebrón. 4Y xeri' xe'apon k'a ri e aj-raqen richin ri Judá rik'in ri David richin xbekiqasaj aceite pa ruwi' richin xok kan rey. Chirij ri' xtzijox chire ri David chi ja ri achi'a' aj-Jabés ri richin Galaad ri xebanon utzil richin xkimuq ri Saúl. 5Y roma ri' ri David xeruteq-el ka'i-oxi' uk'uey rutzijol k'a kik'in ri achi'a' ri' y xuteq rubixik chike: Ja ri Jehová xtiya'on urtisanik pan iwi' rix, roma xiben ri jun nimalej utzil rik'in ri Saúl, ri qa-rey, richin ximuq toq xken. 6Rix kan janila xkixajowex roma ri Jehová, y kan man jun bey xkixrumalij kan. Y yin chuqa' kan keri' k'a xtinben iwik'in rix roma ri nimalej utzil ri xiben. 7Wakami k'a titija' iq'ij y kixok achi'a' ri maneq xibinri'il chiwech. Stape' ri Saúl ri qa-rey xa xken, jak'a re wakami ri winaqi' aj-Judá xkiqasaj aceite pa nuwi' yin richin xkiben rey chuwe, xcha-el ri David.
Ri labal chikikojol ri David y ri e rijatzul kan ri Saúl
8Y k'o k'a jun achin rubini'an Abner ruk'ajol ri Ner, y ri Abner aj-raqen pa kiwi' ri aj-labal ri xek'oje' rik'in ri Saúl. Rija' xberuk'ama-pe ri Is-bóset ruk'ajol kan ri Saúl, y xuk'uaj-el chupan ri tinamit Mahanaim. 9Y chiri' xuben chire richin xok kan rey pa kiwi' ri winaqi' ri ek'o pa Galaad, ri ek'o pa Guesurí, ri aj-Jezreel, ri aj-Efraín y ri aj-Benjamín y pa kiwi' ri ch'aqa' chik israelita. 10Re Is-bóset re' kawineq k'a rujuna' toq xuchop niq'aton-tzij pa ruwi' ri ruwach'ulew Israel, y ka'i' k'a juna' xuq'et-tzij. Y ri David xaxe k'a ri winaqi' aj-Judá ri xetzeqeliben richin. 11Jak'a ri David xuq'et-tzij wuqu' juna' y waqi' ik' pa kiwi' ri winaqi' aj-Judá. Y pan Hebrón xk'oje-wi ri ruq'atbal-tzij.
12Y ri Abner chiri' pa Mahanaim xel-wi-el richin xbe pan oyowal k'a pa tinamit Gabaón. Y rija' e rachibilan k'a el ri aj-labal ri e richin ri Is-bóset. 13Y k'o k'a jun achin rubini'an Joab ral ri jun ixoq rubini'an Seruiá. Y rija' xerachibilaj-el ri aj-labal ri ek'o rik'in ri David. Xe'el k'a pe pan Hebrón richin xbekik'ulu-ki' kik'in ri achi'a' e richin ri Israel ri chiri' chuchi' ri yakbel-ya' ri k'o chiri' pa Gabaón. Y ri aj-Judá xetz'uye' k'a re juk'an pe ruchi'. Y ri aj-Israel xetz'uye' ri juk'an chik apo. 14Y ri Abner xubij chire ri Joab chi yeyakatej-pe ka'i-oxi' alaboni' richin yech'ayon-ki' chikiwech. Y ri Joab utz xrak'axaj ri xbix chire.
15K'ari' xeyakatej y junan k'a kajlabal xeq'ax-apo: E kablajuj alaboni' e rijatzul kan ri Benjamín ri e richin ri Is-bóset y e kablajuj ri e richin ri David.
16Chikijujunal k'a rije' xkichop-ki' chi kiwi', y k'ari' xkijula' ri espada pa taq kik'alk'a'x, y ri alaboni' ri' xekamiyaj-qa konojel. Y roma ri' ri chiri' xubini'aj Helcat-hasurim,*f2* ri k'o chiri' pa Gabaón. 17Chirij ri' xkichop k'a oyowal ri e ka'i' tzobaj, y ri oyowal ri' kan janila k'ayew xuben. Ri Abner y ri aj-labal richin Israel xech'akatej koma ri achi'a' e richin ri David. 18Chiri' ek'o k'a ri e oxi' ral ri Seruiá: Ri Joab, ri Abisai y ri Asael. Jak'a ri Asael janila nanin, kan achi'el k'a jun masat ri k'o pa juyu'. 19Y ri Abner xanimej-el chuwech ri Asael, jak'a xa man xtikir ta xanimej roma ri Asael kan tzeqetel-el chirij. 20Y ri Abner xtzu'un k'a kan chirij y xutz'et chi ja ri Asael ri oqotayon richin.
21K'ari' ri Abner xubij chire chi man chik tutzeqelibej, xa tukamisaj jun chike ri ruwinaq israelita, y tumaja' ri k'o rejqalen chuwi-ruq'a'. Jak'a ri Asael man xtane' ta chi roqotaxik. 22Y roma ri' ri Abner xubij chik jun bey chire: Katane' chiwoqotaxik. Man xa katinkamisaj kan jumul. Y wi keri', yin man xkitikir ta chik xtink'ut-wi' chuwech ri animal Joab, xcha'.
23Jak'a ri Asael kan man xrajo' ta chi xtane' chi roqotaxik ri Abner. Y roma ri' ri Abner xpa'e' y xupiskolij ri rukum richin man xukusaj ta ri rutza'n. Man rik'in chi man ch'ut ta rutza'n, ri kamisabel ri' xok chupan ri Asael y xq'ax k'a ri juk'an chik chire ri ruch'akul. Y chiri' xken-wi kan. Y konojel k'a ri yeq'ax-el chiri' yepa'e-qa y nikitzu' ri Asael ri xa kamineq chik. 24Jak'a ri Joab y ri Abisai xkichop chik roqotaxik ri Abner; y xqaq'ij-qa chikiwech toq xe'apon chiri' pa ruwi' ri juyu' richin Amá, ri k'o-pe chuwech ri tinamit Guíah, ri akuchi niq'ax-wi ri bey ri nibe pa tz'iran ruwach'ulew richin Gabaón. 25Y chiri' ri Abner xerumol ri benjamita ri e animajineq richin xa jun xkiben. Y rije' xepa'e' pa ruwi' ri juyu'.
26K'ari' ri Abner xsik'in-apo chire ri Joab y xubij chire: ¡Titane' re kamisanik re'! ¿Man awetaman ta k'a chi re' xa xtuk'en-pe jun q'axo'n ri chiqawech-apo? ¿K'a janipe' k'a xtabij chike ri awinaq richin ketane' chi qoqotaxik roj ri oj iwach'alal?, xcha'.
27Y ri Joab utz k'a xrak'axaj ri xbix chire y xubij chire ri Abner: Wi man ta xach'on-pe rat re wakami, ri aj-labal ri ek'o wik'in man ta yetane' chi iwoqotaxik rix ri ix qach'alal, xcha'. 28K'ari' ri Joab xuxupuj ri uk'a' richin xtane' ri oyowal. Y jari' toq konojel ri aj-labal ri ek'o rik'in rija' xetane' chikoqotaxik ri aj-Israel. 29Chirij ri' ri Abner y ri aj-labal aj-Israel xetzolin, y xebe chupan ri taq'aj bey ri niq'ax chuchi' ri raqen-ya' Jordán, y chijun k'a ri aq'a' ri' xebiyin. Y chirij ri' xkiq'axaj-apo ri raqen-ya', y xe'apon pa ruwach'ulew Bitrón y k'ari' xeq'ax-el pa Mahanaim.
30Jak'a ri Joab, toq xetane' chikoqotaxik ri Abner, xerumol konojel aj-labal ri e beneq rik'in, y xusik'ij kibi'. Y jari' toq xunabej chi xeken kan e belejlajuj ruwinaq ri David y chuqa' xken kan ri Asael. 31Jak'a rije' xekikamisaj kan e 360 chike ri aj-labal aj-Benjamín ri ek'o rik'in ri Abner. 32Chirij ri' ri Joab y ri ruwinaq xkik'uaj-el ri ruch'akul ri Asael richin xbekimuqu' kan pa Belén, ri akuchi muqun-wi ri rutata'. Ri Joab y ri achi'a' ri e beneq rik'in xkichop chik k'a el bey y chijun aq'a' xebiyin. Y k'a ja toq niseqer-pe xe'apon pan Hebrón.
Currently Selected:
2 Sam 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.