2 Rey 6
6
Ri Eliseo xukol ri ruwi' ri ikej
1K'o k'a jun q'ij ri e q'alajirisey ruch'abel ri Dios xkibij chire ri Eliseo: Re jay re akuchi qamolon-wi-qi' man yojruben ta chik roma janila latz'. 2Taya' q'ij chiqe chi yojbe chuchi' ri raqen-ya' Jordán, richin chi nibeqabana' chiqajujunal jun tem, y niqaben jun qachoch chiri', xecha'. Y rija' xuya' k'a q'ij chike. 3Y jun chike rije' xubij: Niqak'utuj utzil chawe richin chi yabe qik'in, xcha'. Y rija' kan xbe k'a kik'in.
4Xebe k'a qa, y toq xe'apon pa raqen-ya' Jordán xkichop ruchoyik ri che'. 5Y jun k'a chike rije', toq najin nroqij ri che', chaq k'ate' xtzaq-el ri ruwi' ri ikej chuwech, y xapon k'a pa ya'. Y xsik'in y xubij chire ri Eliseo: Wajaw yin, re ruwi' re ikej xtz'oqotz'o-el, y xa nuqajon-pe, xcha'. 6Y ri Eliseo xuk'utuj chire akuchi xapon-wi. Y xuk'ut k'a chuwech. K'ari' ri Eliseo xujoq' jun xik'a'y, y xuya-qa akuchi xtzaq-wi-qa ri ruwi' ikej; y kan xberutelej k'a pe ya' ri ruwi' ri ikej ri'. 7K'ari' ri Eliseo xubij chi tuk'ama-apo, y ri q'alajirisey ruch'abel ri Dios xuk'en-apo.
Ri Eliseo y ri aj-Siria
8Ri rey richin Siria kan jantape' k'a nikiben labal kik'in ri israelita. Y k'o k'a jun q'ij re rey re' xeruk'ulubej ri aj-raqen pa kiwi' ri aj-labal y xubij chike ri akuchi yek'oje-wi-qa ri aq'a' ri'. 9Jak'a ri Eliseo, ri q'alajirisey ruch'abel ri Dios, xa xuteq rubixik chire ri rey richin Israel y xubij: Man kixq'ax kere', roma ri aj-labal aj-Siria ke taq re' ek'o-wi, xcha-el. 10Roma ri' ri rey richin Israel xuteq-el rutzijol chiri' ri akuchi xubij-wi ri Eliseo. Ronojel mul toq keri' nikiben ri aj-Siria, ri Eliseo kan nuteq rubixik chire ri rey richin Israel richin xuchajij-ri'.
11Roma ri' ri rey richin Siria kan xsach k'a ruk'u'x, y xuteq k'a koyoxik ri aj-raqen pa kiwi' ri aj-labal y xubij chike: Tiq'alajirisaj k'a chuwe ri achike chiwe rix ri nelesan-el rutzijol chike ri israelita ri akuchi ojk'o-wi, xcha'.
12K'ari' jun chike rije' xubij chi man ja ta rije' ri ye'elesan rutzijol, xa kan ja ri Eliseo ri q'alajirisey ruch'abel ri Dios ri nitaqon rutzijol chire ri rey richin Israel, y kan nubij-el ronojel ri nubij ri rey aj-Siria pan ewel. 13Y ri rey aj-Siria xubij: Kixbiyin y tikanoj akuchi k'o-wi richin chi yin ninteq ruchapik, xcha'. Y xya'ox k'a rutzijol chire, chi ri Eliseo k'o pa tinamit Dotán. 14K'ari' ri rey xeruteq-el achi'a' ri e ch'okol-el chirij kiej y ri e beneq pa carruaje y kan e k'iy k'a aj-labal, y xe'apon chi'aq'a', y xkisutij-rij ri tinamit.
15Ri ruka'n q'ij, nimaq'a' yan, xyakatej ri nilin richin ri Eliseo; y jari' toq xerutz'et ri aj-labal aj-Siria kisutin-rij ri tinamit, kik'uan-el achi'a' ri e ch'okol chikij kiej y ri e beneq pa carruaje. K'ari' ri samajel xubij: ¡Wajaw, wakami achike niqaben!, xcha'.
16Y ri Eliseo xubij chire: Man taxibij-awi', roma más e k'iy ri ek'o qik'in roj ke ri ek'o kik'in rije', xcha'. 17K'ari' ri Eliseo xch'on rik'in ri Dios y xubij: Tabana' utzil Jehová, tajaqa' ri runaq'-ruwech ri nusamajel richin yerutz'et ri aj-labal ri ataqon-pe rat, xcha'. K'ari' ri Jehová xuben chire ri samajel richin xjaqatej ri runaq'-ruwech. Y xutz'et k'a chi ri juyu' e nojineq chi aj-labal ri yech'oke' chirij kiej y ri e beneq pa carruaje rik'in q'aq', ri kisutin-rij ri tinamit. 18Y toq ri aj-Siria xexule-qa richin nibekichapa' oyowal, ri Eliseo xch'on chik rik'in ri Jehová, y xubij: Nink'utuj utzil chawe chi ke'amoyirisaj re winaqi' re', xcha'. Y ri Jehová kan xerumoyirisaj k'a achi'el xuk'utuj ri Eliseo. 19K'ari' ri Eliseo xubij chike: Man ja ta bey re', ni man ja ta tinamit re'; kinitzeqelibej-pe, y yin xtink'ut chiwech akuchi k'o-wi ri achin ri nikanoj, xcha'. Y xeruk'uaj k'a pa Samaria. 20Toq ek'o chik pa tinamit Samaria, ri Eliseo xubij chire ri Dios: Jehová, tabana' utzil tajaqa' chik ri runaq' kiwech re winaqi' re', xcha'. Y toq xjaqatej ri runaq' kiwech, xkitz'et chi xa pa runik'ajal ri tinamit Samaria ek'o-wi.
21Toq ri rey richin Israel xerutz'et, kan xuk'utuj k'a chire ri Eliseo y xubij: Ajaw, ¿yeqakamisaj re winaqi' re'? ¿Kan yeqakamisaj wakami yan?, xcha'.
22Y ri Eliseo xubij: Ni, man ye'akamisaj ta. ¿Ye'akamisaj kami rat ri e achapon-pe pan oyowal, ri e achapon-pe rik'in awuchuq'a' y rik'in ri a-espada y ri rute-ach'ab? Wakami k'a pa ruk'exel chi ye'akamisaj, xa kan taya' kiway y kiya' richin yewa' y yeuk'ya'; y chirij ri', xke'atzolij-el rik'in ri ki-rey, xcha'. 23Y kan xban k'a jun nimalej wa'in chike. Y rije' kan xewa-xe'uk'ya' jebel. Chirij ri', ri rey richin Israel xeruteq-el ri aj-Siria ri'; y kan xetzolin k'a rik'in ri ki-rey. Chirij ri', kan man jun bey chik xetzolin ri aj-labal aj-Siria pa ruwach'ulew Israel richin yebe'eleq'an chiri'.
Ri Eliseo nukol ri tinamit Samaria
24Chirij k'a ronojel re' ri Ben-hadad rey richin Siria, xerumol ri aj-labal, y xejote-el y xkisutij-rij ri tinamit Samaria. 25Roma ri' chupan ri tinamit ri' xpe k'a jun nimalej wayjal. Kan janila k'a ruk'ayewal ri xk'oje' chupan ri tinamit ri', y roma ri' ri jun rujolon bur nik'ayix chi ka'i' libra saqipueq y jun moq' rukis paloma*f2* nik'ayix chi ka'i' onza saqipueq. 26Y k'o k'a jun q'ij toq ri rey richin Israel nibijay pa ruwi' ri tz'aq, y xpe k'a jun ixoq xsik'in-q'anej y xuk'utuj to'onik chire. 27Y ri rey xubij: Wi ri Jehová man yaruto' ta, ¿achoq ik'in ta k'a xkatinto-wi yin? ¿Xkibe ta k'a ri akuchi nich'ay-wi ri trigo, o ri akuchi niyitz'-wi ri uva?, xcha'. 28Y xuk'utuj k'a chire ri ixoq ri achike ruk'uluwachin.
Y ri ixoq xubij: Re ixoq re' xubij chuwe chi tiqatija' ri ti wal yin wakami, y chua'q xtiqatej ri ti ral rija'. 29Xqachaq'arisaj k'a ri ti wal yin, y xqatej. Y ri jun chik q'ij yin xinbij chire chi tuk'ama-pe ri ti ral richin niqatej. Jak'a rija' xa xrewaj ri ti ral, xcha'.
30Toq ri rey xrak'axaj ri xubij ri ixoq, xuretz ri rutziaq chirij richin xuk'ut chi kan janila itzel xuna', y keri' rubanon xq'ax pa ruwi' ri tz'aq. Y ri winaqi' richin ri tinamit xkitz'et chi ri rey rukusan tzieq richin bis. 31Y rija' xubij: Ri Dios kan xtrelesaj k'a ri nujolon, wi yin man xtinwelesaj ta wakami ri rujolon ri Eliseo ri ruk'ajol ri Savat, xcha'.
32Rokik ri', ri Eliseo tz'uyul pa rachoch, y e rachibilan ri achi'a' ri k'o kiq'ij richin ri tinamit. Y ri rey xuteq jun achin nabey rik'in ri Eliseo y rija' xambey kan. Y man jani k'a tapon ri achin ri' rik'in, jari' toq ri Eliseo xubij chike ri achi'a' ri k'o kiq'ij ri ek'o rik'in: ¿Iwetaman chik chi ri rey, ri achin kamisanel, wakami rutaqon-pe rutzak'ixik ri nujolon? Tiwak'axaj na pe; jari' xpe ri achin ri taqon-pe. Wakami k'a titz'apej ri ruchi-jay chuwech, y man tiya' q'ij chire richin nok-pe. Roma chirij rija' peteneq ri rajaw, xcha'. 33K'a nich'on k'a ri Eliseo kik'in ri achi'a' ri k'o kiq'ij, toq xapon ri achin ri taqon-el, y ri achin ri' xubij: Wi kan ja ri Jehová taqayon-pe re jun ruk'ayewal re' pa qawi', ¿achike chik k'a xtinwoyobej yin richin ta ri Jehová nuchojmirisaj?, xcha'.
Currently Selected:
2 Rey 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
