2 Crón 6
6
1Y k'ari' ri Salomón xubij: Rat Jehová, abin chi kan yak'oje-wi chupan jun mokol sutz'. 2Jak'a re wakami, yin xinpaba-q'anej re jun jebelej y nimalej awachoch richin yak'oje' chupan richin q'asen, xcha'.
3K'ari' ri Salomón xupiskolij-ri' y xerutzu' ri ruwinaq ri e pa'el-apo chiri', y xroyoj k'a urtisanik pa kiwi' konojel rije', ri e rijatzul kan ri Israel. 4Y xubij: Kan nim k'a ruq'ij-ruk'ojlen ri Jehová ri qa-Dios, roma wakami xbanatej ri rusujun kan chire ri David ri nata', toq xubij chire chi 5kan man jun tinamit ri rucha'on chupan ri ruwach'ulew Israel ri akuchi ta nipabex-wi-q'anej jun rachoch richin niqaya' ruq'ij. Keri' rubin-pe kan chupan-pe ri q'ij toq xerelesaj-pe pan Egipto ri qate-qatata' k'a re wakami. Ri Dios xubij chuqa' chi xaxe ri David ri xucha', richin chi ja rija' niyuqen qichin. 6Ri Dios xubij chuqa' chi rija' xucha' ri tinamit Jerusalem richin chi wawe' niqaya-wi ruq'ij, y chi rija' xucha' ri David richin nuq'et-tzij pa qawi'. 7Y ri nata' janila rayibel xk'oje' pa ránima richin xupaba' ta q'anej jun rachoch ri Jehová ri qa-Dios. 8Jak'a ri Jehová xubij chire rija' chi janila utz ri xuben richin xk'oje' ri rayibel ri' pa ránima richin xupaba' ta q'anej ri rachoch. 9Jak'a xubij chire chi man ja ta rija' ri xtipaban-q'anej ri rachoch, ja yin ri ruk'ajol ri xkipaban-q'anej.
10Y ri Jehová kan xuben achi'el ri rusujun, y roma ri' ja yin xik'oje' kan pa ruk'exel ri nata', y wakami xik'oje' kan richin ninq'et-tzij pan iwi' rix, y kan xinpaba-q'anej ri rachoch ri Jehová, ri qa-Dios. 11Y chupan k'a ri' xinya-wi ri káxa ri akuchi k'o-wi kan ri jikibel-tzij ri xuben ri Jehová kik'in ri qati't-qamama', xcha' ri Salomón.
Ri Salomón nich'on rik'in ri Jehová
12Chirij k'a re', ri Salomón xbe-apo chuwech ri porobel richin ri Jehová, y chikiwech konojel israelita, xurik'-q'anej ri ruq'a'. 13Chiri' k'o k'a jun palibel ri rubanon rik'in q'enq'oj-pueq. Ri retabal ri palibel ri' jun jaj rik'in ka'i' q'a'aj ri raqen y ri ruwech keri' chuqa' ri retabal, y ri rujotolen waqi' q'a'aj rik'in wo'o' ruwi' q'a'aj. Y ri palibel ri' banon pa runik'ajal ri ruwa-jay richin ri rachoch ri Jehová. Ri Salomón xjote-el chiri' y k'ari' xxuke-qa chikiwech konojel ri ruwinaq y xurik' chik q'anej ri ruq'a', 14y xubij k'a: Jehová ri at qa-Dios roj, kan man jun chik k'a Dios achi'el rat, ni ri chila' chikaj, ni pa ruwi' re ruwach'ulew. Rat kan naben ri ajikiban y kan najoyowaj kiwech ri yesamajin awichin ri kitaqen ri abey rik'in ronojel kánima. 15Rat kan achajin wi k'a jebel ri ach'abel ri abin kan chire ri asamajel David ri nata'; y chupan re q'ij re' kan xtz'aqet k'a ri asujun. 16Wakami k'a Jehová ri at qa-Dios, kan tabana' k'a ri xasuj chire ri David ri asamajel, toq xabij chire chi man jun bey xtitole' kan ri rutz'uyubal richin ri q'atbel-tzij roma maneq jun rijatzul ri xtibiyin ta achi'el ri xuben rija'. 17Wakami k'a Jehová ri at qa-Dios richin Israel, kan tabana' k'a ri ach'abel ri asujun kan chire ri asamajel David ri nata', xcha' ri Salomón.
18Chuqa' ri Salomón xubij k'a chire ri Dios: ¿Kan qitzij kami chi rat Dios yak'oje' chuwech re ruwach'ulew re'? Roma rat kan at nimalej wi, y ri kaj chi tz'etel, chi man tz'etel ta kan man nitikir ta yarukuch; k'a ta la' chik re jay re xinpaba-q'anej re awichin rat. 19Man rik'in ri', tabana' utzil kinawak'axaj toq yin ri in asamajel yich'on-q'anej awik'in, toq nink'utuj janila utzil chawe richin najoyowaj nuwech. ¡Jehová Dios! Tawak'axaj k'a ri nuraqoj-chi'ij, y ri ch'owen ri ninben chawe yin ri in asamajel, chupan re q'ij re'. 20Ri atzubal jantape' ta k'a xtik'oje' pa ruwi' re jun jay re', chi paq'ij chi chaq'a', ri akuchi abin chi kan yak'oje' rat. Keri' kan xtawak'axaj ta k'a ri nuch'owen ri ninben awik'in, yin ri in asamajel. 21Kan kinawak'axaj k'a toq yikamela'an yin ri in asamajel y chuqa' toq yekamela'an ri atinamit toq yetzu'un pa ruchojmilal ri awachoch. Kan tawak'axaj k'a pe ri chila' chikaj ri akuchi atk'o-wi, y takuyu' tasacha' k'a qamak.
22Y wi k'o ta jun ri k'o numakuj chuwech ri rachpochel, y nik'amer-pe chuwech re porobel re' chupan re awachoch richin nuya' rutzij chi wi aj-mak o man aj-mak ta, 23rat ajaw kan tawak'axaj ri chila' chikaj, y xtaben k'a ri ruk'amon. Xtaq'et-tzij pa kiwi' ri winaqi' ri'. Kan xtaben k'a chi xtiqaqa ri ruk'ayewal pa ruwi' ri aj-mak, y xtaben k'a ri ruchojmilal pa ruwi' ri maneq rumak. Rik'in ri chojilej aq'atbel-tzij rat xtaq'et-tzij pa kiwi'.
24Wi ta ri nuwinaq xkech'akatej-el roma jun chik tinamit ri etzelanel qichin roma xemakun chawech rat, jak'a wi xa xtitzolin pe kik'u'x y xtikik'utuj kuyubel-mak chawech y xtikiya' chik aq'ij ak'ojlen, y xtikik'utuj utzil chawe pa ruchojmilal re awachoch; 25wi keri', rat ajaw kan xtawak'axaj k'a pe ri chila' chikaj y xtakuy k'a rumak ri atinamit Israel y xketzolej ta chik k'a pe chupan re ruwach'ulew re' ri xaya' rat chike ri qati't-qamama'.
26Y wi ri kaj nitz'ape' y man ta nuben job roma xemakun chawech rat, jak'a wi nikik'utuj kuyubel kimak chawech pa ruchojmilal re awachoch re' y xtikiya' chik aq'ij, y wi xketane' chire ri mak toq nikik'owisaj ri tijoj-poqonal; 27wi keri', rat kan xke'awak'axaj k'a pe chila' chikaj y xtakuy ta rumak ri atinamit Israel, y xtak'ut ta k'a ri utzilej bey ri akuchi k'o chi yebiyin-wi, y xtaya' ta chik k'a pe ri job pa ruwi' re ruwach'ulew ri xkichinaj ri atinamit pan aq'a' rat.
28Y wi chuwech re ruwach'ulew k'o ta nima-wayjal o nima-yabil kichin ri awej, o wi ri tiko'n nuchop ul o wi yepe pus chirij, o wi yepe ta ri tzobaj sak' richin nikik'is ri tiko'n, o yepe ta ri e etzelanel qichin nikisutij-rij ri qatinamit y xtikichop chi oyowal, o xtipe xabachike nima-ruk'ayewal o xabachike yabilal pa kiwi', 29y wi k'o ta jun ri nutz'et ri nima-ruk'ayewal y nuna' ri q'axo'n pa ránima y xtuyek ta ri ruq'a' y xtitzu'un pa ruchojmilal ri awachoch richin nich'on awik'in o nuk'utuj chawe; 30wi keri', rat kan xtawak'axaj k'a ri chila' chikaj ri akuchi atk'o-wi, xtakuy ta rumak ri atinamit. Kan xaxe k'a rat ri yatz'eton ri kánima konojel ri winaqi', y roma ri' kan xtaben k'a kik'in achi'el ri kibanobal chikijujunal. 31Richin keri' kan xtikiya' k'a aq'ij y xtikinimaj-atzij ronojel q'ij ri janipe' xkek'ase-el chuwech re ruwach'ulew ri xaya' kan chike ri qate-qatata'.
32Y wi k'o ta jun wineq ri man qawinaq ta, y xtrak'axaj k'a pe chirij ri nimalej abi' y ri nimalej awuchuq'a' y roma ri' nel-pe chupan rutinamit ri k'a nej k'o-wi, richin noch'on awik'in y noruya' aq'ij chupan re jay re'; 33wi keri', rat xtawak'axaj k'a ri chila' chikaj ri akuchi atk'o-wi y xtaben k'a ronojel ri nuk'utuj chawe ri wineq ri' ri man qawinaq ta. Richin keri' konojel ta k'a ri winaqi' richin ri ch'aqa' chik tinamit xtiketamaj ta ri abi' y xtikiya' ta aq'ij y xtikinimaj ta ri atzij, achi'el nuben ri atinamit Israel. Y keri' xtiq'ax chikiwech konojel winaqi' chi kan xaxe chupan re jay re', re xinpaba-q'anej yin, ri niban-wi ronojel k'utunik chawe rat.
34Y wi rat nateq-el ri atinamit xabakuchi richin niberubana' oyowal kik'in ri e etzelanel qichin, y wi rije' yech'on awik'in rat Jehová pa ruchojmilal ri awachoch ri xinpaba-q'anej chupan re atinamit Jerusalem; 35wi keri', rat k'a chila' chikaj k'a xtawak'axaj-pe ri kik'utunik, y kan xke'ato' rik'in ruchojmilal.
36Yin wetaman chi kan man jun ri man ta nimakun chawech. Roma ri', toq ri atinamit xkemakun chawech, rat xtiyakatej awoyowal chikij, y xke'ajech-el pa kiq'a' ri xabachike etzelanel qichin. 37Y wi chupan ri ruwach'ulew ri akuchi xe'uk'uex-wi el, xtitzolin-pe kik'u'x awik'in y nikik'utuj kuyubel kimak chawe y xtikibij chi rije' xemakun, xkijel rubanik ri apixa' y xkiq'ej ruwi' jumul, 38jari' toq xkech'on awik'in. Wi kan rik'in ronojel kánima xtitzolej-pe kik'u'x awik'in rat, stape' k'a ek'o na chupan ri kiruwach'ulew ri e etzelanel qichin, y wi yech'on ta awik'in rat Jehová pa ruchojmilal re awachoch re xinpaba-q'anej ri akuchi niya'ox wi aq'ij-ak'ojlen, chupan re atinamit Jerusalem, chupan re qaruwach'ulew ri xaya' chike ri qati't-qamama', 39jari' k'a toq rat k'a chila' chikaj xtawak'axaj-pe ri kich'owen awik'in, y ri utzil ri nikik'utuj chawe. Y rat kan xke'ato' k'a pa ruchojmilal. Kan xtakuy k'a kimak ri atinamit.
40Wakami k'a qa-Dios roj, kan jantape' ta k'a xtawak'axaj ri utzil ri niqak'utuj chawe y ri ch'owen ri niqaben awik'in chupan re awachoch. 41¡Jehová Dios!, kayakatej k'a wakami richin yak'oje' chupan ri awachoch ri kan awichin rat, y chuqa' chupan re jay re' xtik'oje-wi ri káxa ri k'o ri nimalej awuchuq'a' chupan. Tabana' chi ri sacerdote kan jantape' ta k'a utz xtel ronojel chikiwech, y chi roj ri qakuquban qak'u'x awik'in xqojkikot ta k'a rik'in ronojel ri utzil ri naya' chiqe. 42Jehová Dios, man kinawetzelaj kan yin ri in acha'on richin xinaya' chupan ri q'atbel-tzij. Taya' k'a ri ajoyowanik pa nuwi' yin, achi'el xaya' chire ri David ri asamajel, xcha' ri Salomón.
Currently Selected:
2 Crón 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
