2 Crón 5
5
1Y toq xk'achoj ronojel re samaj re' ri ruchilaben ri Salomón richin ri rachoch ri Jehová, xuk'uaj-el junan rik'in ronojel ri samajibel ri banon rik'in q'anapueq y saqipueq ri ruch'aron kan ri David, y xberuya' kan chupan ri jay akuchi k'o-wi ri beyomel richin ri Jehová.
Ri Salomón xuq'axaj ri káxa chupan ri k'ak'a' rachoch ri Jehová
(1 Rey 8:1-11)
2K'ari' ri rey Salomón xuteq k'a koyoxik richin jun molojri'il ri chiri' pa Jerusalem konojel ri achi'a' ri k'o kiq'ij, konojel ri e tata'al ri ek'o pa kiwi' ri tzobaj winaqi' richin ri tinamit Israel, y ri e aj-raqen kichin ri aj pa jay, richin nikelesaj-pe ri káxa richin ri rujikibel-tzij ri Jehová chiri' pa rutinamit kan ri David, ri nibix Sión chire y nikiq'axaj chupan ri k'ak'a' rachoch ri Jehová ri chiri' pa Jerusalem. 3Y xkimol k'a ki' rik'in ri rey Salomón konojel ri winaqi' ri' chupan ri ik' wuqu' toq ninimaq'ijux ri nimaq'ij richin ri taq jay banon rik'in ruq'a-che'. 4Toq xe'oqaqa k'a ri achi'a' ri k'o kiq'ij richin Israel, jari' toq ri e levita xkitzeqej k'a pe ri káxa. 5Xkik'uaj k'a el ri káxa ri', chuqa' ri rachoch ri Dios ri banon rik'in tzieq y ronojel ri samajibel ri yek'atzin chupan, y ri ch'aqa' chik sacerdote ri e levita ri xe'uk'uan-q'anej. 6Ri rey Salomón y konojel ri ruwinaq ri kimolon-apo-ki' rik'in chuwech-apo ri káxa, xekikamisaj k'a richin kamelabel; kokoj y nima'q taq kawej, y roma kan janila e k'iy man chik tikirel ta chik chi xe'ajlex. 7Ri sacerdote xkiya-apo ri káxa richin ri rujikibel-tzij ri Jehová chupan ri jay ri xban akuchi nik'oje-wi ri Jehová, ri akuchi kan man jun wineq nok-apo, chuxe' ri kixik' ri querubín, 8roma ri querubín ri' kan kirik'ik'en ri kixik' pa ruwi' ri akuchi xya'ox-wi ri káxa, y kan kimatzen k'a ruwi' ri káxa y ri baloj taq che' ri uk'uabel richin ri káxa. 9Ri baloj taq che' ri' kan janila k'a e nima'q kaqen, y roma ri' chupan ri jay ri' kan niq'alajin ri kitza'n, jak'a xa man niq'alajin ta chik ri chupan ri nima-jay. Y keri' k'a rubanon kan. 10Chupan ri káxa ri' man jun achike ta chik ri k'o, xa kan xaxe ri ka'i' tz'alem taq abej ri xuya' kan ri Moisés chupan toq xk'oje' pa juyu' Horeb, ri akuchi xuben-wi ri jikibel-tzij ri Jehová kik'in ri e rijatzul kan ri Israel toq xe'el-pe pan Egipto.
11Konojel ri e sacerdote kan xkich'ajch'ojirisaj yan ki' stape' man jani tapon ri q'ij richin kisamaj. Konojel ri sacerdote ri' xe'el-pe chiri' chupan ri k'ak'a' rachoch ri Jehová. 12K'ari' konojel ri e levita ri e bixanela'; ri Asaf, ri Hemán, y ri Jedutún, junan kik'in ri kalk'ual y ri kach'alal e pa'el-apo chiri' pa relebel-q'ij chire ri porobel, kikusan ri kitziaq banon rik'in lino, y kik'uan jalajoj ruwech q'ojom, achi'el ri platillo, ri salterio, y ri arpa. Kik'in rije' ek'o chuqa' 120 sacerdote ri nikixupuj trompeta.
13Konojel k'a re' junan xeq'ojoman-q'anej y xebixan junan richin nikiya' ruq'ij ri Jehová, y nikimatioxij chire: Xkixupuj k'a ri trompeta, xkiq'ojomaj ri platillo y ri jalajoj kiwech taq q'ojom rokik yebixan, y kere' nikibij: Tiya' ruq'ij ri Jehová, roma rija' kan janila utz, ri rujoyowanik kan richin q'asen, xecha'. Y rokik yebixan, ri sutz' richin ri Jehová xunojisaj ri k'ak'a' rachoch, 14y ri e sacerdote man xetikir ta chik xek'oje' chiri' richin xesamej, roma ri sutz' ri'. Ri ruq'ij-ruk'ojlen ri Jehová xunojisaj chijun ri k'ak'a' rachoch.
Xnimaq'ijux ri rachoch ri Jehová
(1 Rey 8:12-66)
Currently Selected:
2 Crón 5: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
