2 Crón 18
18
Ri rey Josafat xjunamatej ruwech rik'in ri rey Acab
1Toq ri Josafat k'o chik pa ruk'iyal ri rubeyomel y kan k'o chik ruq'ij, jari' toq xok rachjinan ri Acab, rey richin Israel. 2Xq'ax yan k'a ka'i-oxi' juna', y ri Josafat xbe-qa pa tinamit Samaria richin xberuq'ejela' ri rey Acab, y roma ri' ri Acab xerukamisaj e k'iy karne'l y wákix richin xwa' ri Josafat y ri e beneq chirij, y xubochi'ij chi junan yeyakatej richin nibekibana' oyowal pa ruwi' ri tinamit Ramot ri k'o pa Galaad. 3Y roma ri' ri Acab rey richin Israel xuk'utuj chire ri Josafat rey richin Judá y xubij: ¿Nawajo' kami chi junan ta nibeqabana' oyowal pa ruwi' ri Ramot ri k'o pa Galaad?, xcha'.
Y ri Josafat xubij: Ri wichin yin awichin rat; y ri nuwinaq yin e awinaq rat. Roj kan xqojbe k'a awik'in pa labal, 4jak'a kan tiqak'ulubej na ri Jehová achike na nubij rija' chiqe, xcha'.
5Y k'ari' ri Acab xerumol konojel ri e q'alajirisey ruch'abel ri ki-dios, y xkimol k'a ki' e 400 achi'a', y xuk'utuj chike: ¿Utz kami chi yibe richin ninbenbana' oyowal pa ruwi' ri Ramot ri k'o pa Galaad, o xa ninmalij-qa?, xcha'. Y rije' xkibij chire chi utz nibe roma ri ki-dios kan xtujech pa ruq'a'. 6Jak'a ri Josafat xuk'utuj wi k'o ta jun q'alajirisey ruch'abel ri Jehová chiri' richin nikik'ulubej.
7Y ri Acab xubij chire ri Josafat: K'a k'o na kan jun achin rubini'an Micaías ruk'ajol ri Imlá ri achoq ik'in niqak'ulubej-wi achike nubij ri Jehová, jak'a yin kan itzel nina' chire roma man jun bey nuk'en ta pe utzilej taq rutzijol chuwe, xcha'. Y ri Josafat xubij chire ri Acab chi man tich'on itzel chirij ri achin ri'.
8Y keri' ri Acab xroyoj jun chike ri rusamajel y xubij chire chi tiberuk'ama' ri Micaías ruk'ajol ri Imlá. 9Y ri Acab y ri Josafat rey richin Judá e tz'uyul pa kich'akat y kikusan ri kitziaq richin rey, chiri' akuchi niban-wi molojri'il chuwech-apo ri ruchi' ri tinamit Samaria, y konojel k'a ri e q'alajirisey ruch'abel ri ki-dios kan ye'ajin nikik'ul ri achi'el achik' chikiwech ri e ka'i' rey ri'. 10Y jun k'a chike rije' ri rubini'an Sedequías, ruk'ajol ri Quenaaná, e rubanon ka'i' oxi' ruwachibel uk'a' rik'in q'eqapueq, y rija' xuq'alajirisaj k'a: Kere' nubij ri Jehová: Rik'in k'a re uk'a' re' xke'ikoq'ila-wi ri aj-Siria achi'el nitoq'on jun wákix, k'a toq xkek'is na pan iq'a', xcha' chike. 11Y ri ch'aqa' chik e q'alajirisey ruch'abel ri ki-dios junan ri kich'abel y nikibij chi kan utz wi chi yebe pa Ramot richin nibekibana' oyowal, y kan ja ri Acab ri xtich'akon, roma ri Jehová kan xkerujech pa ruq'a' rija' ri aj-Siria.
12Y toq xapon ri oyonel rik'in ri Micaías, xubij chire: Konojel ri e q'alajirisey ruch'abel ri qa-dios junan ri ch'abel nikibij chire ri rey, chi ja rija' xtich'akon. Wakami k'a ri ach'abel rat kan ta k'a achi'el ri kich'abel rije', xcha'.
13Jak'a ri Micaías xubij: Chuwech k'a ri k'aslik Jehová, ninbij chi achike xtubij ri Jehová chuwe, jari' ri xtinbij yin, xcha' chire ri oyonel richin.
14Ri Micaías kan xbe k'a, y toq xapon, ri Acab xuk'utuj k'a chire chi wi utz nuchop oyowal pa ruwi' ri Ramot, o xa numalij-qa. Y ri Micaías xubij chire: Kabiyin; tabebana' oyowal, roma kan jujik-wi chi kan ja rat ri xkach'akon, roma ri Jehová kan xtujech pan aq'a' rat, xcha'.
15Y ri Acab xubij chik chire: ¡Janipe' mul nubin chik chawe chi toq rat yach'on wik'in pa rubi' ri Jehová, kan tabij k'a ri qitzij chuwe!, xcha'.
16K'ari' rija' xubij chire ri Acab: Yin nintz'et chi konojel ri winaqi' israelita kitalun-ki' pa ruwi' taq juyu', achi'el taq karne'l ri maneq kiyuq'unel. Y ri Jehová nubij k'a chi konojel re winaqi' re' xa maneq kajaw. Roma ri' taya' q'ij chike chi chikijujunal ketzolin chi taq kachoch rik'in uxlanibel-k'u'x, xcha' ri Micaías.
17K'ari' ri Acab xubij-apo chire ri Josafat: ¡Xinbij-wi chawe, chi rija' kan man jun bey nuk'en ta pe utzilej taq rutzijol chuwe, xa kan xaxe ri itzel rutzijol nuk'en-pe chuwe!, xcha'.
18Y ri Micaías xch'on chik y xubij: Wakami k'a, tawak'axaj k'a ri nubij ri Jehová. Yin kan xintz'et ri Jehová tz'uyul pa rutz'uyubal, y ek'o-apo ri ángel rik'in y kan man e ajlatel ta; ek'o pa rijkiq'a' y pa rajxokon rija'. 19Y ri Jehová xuk'utuj chike ri ángel ri achike ta chike rije' nitikir nibebanon chire ri Acab chi niberubana' oyowal pa ruwi' ri Ramot ri k'o pa Galaad, y nibe xaxe richin nibeken kan. Y konojel ri ángel xech'owiyaj k'a chikiwech, y jun wi nikibij ri ch'aqa', y jun wi chik ri nikibij ri ch'aqa' chik.
20Y kan jari' xbepapo' jun espíritu chuwech ri Jehová y xubij chire chi rija' nitikir niberubana' ri samaj ri'. Y ri Jehová xuk'utuj chire achike rubanik xtuben. 21Y ri espíritu ri' xubij chi rija' xtibe y xtok jun espíritu richin tz'ukuj-tzij, y xtuben chike ri achi'a' ri e q'alajirisanela' richin xtikitz'uk-tzij. Y k'ari' ri Jehová xubij chire chi tibe y tiberubana' roma kan nitikir nuben chire ri Acab chi nibe y niken kan. 22Y keri' ri Jehová xuya' q'ij chi jun itzel espíritu xok pa kichi' re q'alajirisey ach'abel, richin xkitz'uk-tzij chawech, roma ri Jehová kan rubin chik chi k'o xtabek'uluwachij, xcha' ri Micaías chire ri Acab.
23K'ari' xjel-apo ri Sedequías ruk'ajol ri Quenaaná rik'in ri Micaías y xuya' jun q'a' chupalej, y xubij chire: ¿Achi'el toq xel-el ri espíritu richin ri Jehová wik'in yin, y xa awik'in chik rat nich'on-wi?, xcha'.
24Y ri Micaías xubij chire: Xtibeq'ax chawech k'a ja ri q'ij toq xtabeq'oq'oj-awi' pa jun jay richin xtabewewaj-awi', xcha'. 25K'ari' ri Acab xubij chi tichap-el ri Micaías, y tuk'uex-el chuwech ri Joás ri ruk'ajol rija', y chuwech ri Amón, ri q'atoy-tzij richin ri tinamit. 26Y xubij-el chi tibix chike rije' chi tikitz'apej pa jay ri achin ri', y tichajix jebel richin man nanimej, y xaxe juba' wey y juba' ya' tiya'ox chire k'a toq xtitzolin na pe rija' pan oyowal.
27Y ri Micaías xubij chire ri Acab: Wi rat xkatzolin-pe rik'in uxlanibel-k'u'x, man ja ta k'a ri Jehová ri xbin chuwe ri xinbij chawe. Y chike ri winaqi' xubij chike: Rix kan xiwak'axaj k'a ri xinbij chire ri Acab, xcha'.
28Y keri' ri Acab rey richin Israel junan rik'in ri Josafat rey richin Judá xebe pan oyowal chiri' pa Ramot ri k'o pa Galaad. 29Y ri Acab xubij chire ri Josafat: Yin xtinjel-el nuwech y xkinok-apo chupan ri oyowal, jak'a rat takusaj ri atziaq richin rey, xcha'. Y keri' ri Acab kan xujel k'a el ruwech y xbe pan oyowal. 30Ri rey richin Siria kan rubin wi k'a el chike ri e juwineq kablajuj aj-raqen ri ye'uk'uan ri carruaje chi man nikiben ta oyowal kik'in xabachike; xa kan xaxe rik'in ri rey richin Israel. 31Y keri' k'a toq ri aj-raqen kichin ri e uk'uayon ri carruaje xkitz'et ri Josafat, xkich'ob chi ja rija' ri rey richin Israel, y xepe chirij richin nikiben oyowal rik'in, jak'a ri Josafat xsik'in richin nito'ox. Y ri Jehová kan xuto', y xuben chike ri e etzelanel richin chi xkijech'ej-el-ki' chire rija'. 32Toq ri aj-raqen ri e uk'uayon ri carruaje xkitz'et chi xa man ja ta rija' ri rey richin Israel man xkoqotaj ta chik. 33Y k'o k'a jun chike ri aj-labal aj-Siria ri xuk'eq jun ch'ab choj keri', y xumej ri Acab rey richin Israel. Ri ch'ab kan choj xok ri akuchi rutunun-wi-ri' ri rutobal, y k'ari' ri Acab xubij chire ri uk'uayon ri carruaje: Tapiskolij-awi' chi'anin richin yinawelesaj-el wawe' roma xa xisokotej yan, xcha'.
34Y chijun k'a ri q'ij ri' kan janila nim ri oyowal ri xbanatej, y ri Acab kan chiri' k'a chupan ri ru-carruaje xpa'e-wi chikiwech ri aj-Siria, y ri rukik'el xbiyin k'a chupan ri ru-carruaje; y chupan k'a ri tiqaq'ij ri' xken-qa.
Currently Selected:
2 Crón 18: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
