2 Crón 17
17
Ri ruq'atbal-tzij ri Josafat chiri' pa Judá
1Ri Josafat ri ruk'ajol kan ri Asá, ja rija' xok kan rey pa ruk'exel ri rutata', y kan xk'oje' k'a ruchuq'a' richin nuto-ri' chuwech ri tinamit Israel. 2Xeruya' k'a aj-labal ri chiri' pa taq tinamit ri e sutin-kij chi tz'aq ri e richin ri rajawaren rija', y chuqa' xeruya' chajinela' ri chiri' pa taq tinamit richin Efraín, tinamit ri e ruch'akon kan ri Asá. 3Ri Jehová kan xk'oje' k'a rik'in ri Josafat roma pa taq rutikeribel chire ri ruk'aslen kan xutzeqelibej k'a ri bey ri xutzeqelibej ri David ri rumama', y man xuya' ta k'a kejqalen ri wachibel kichin ri Baal. 4Kan xutzeqelibej k'a ri Jehová, ri Dios richin kan ri Asá ri rutata'. Kan xutaqej k'a ri pixa' ri rubin ri Jehová, y man xuben ta achi'el nikiben ri winaqi' aj-Israel. 5Ri Jehová kan xujikiba' k'a ri q'atbel-tzij pa ruq'a', y konojel k'a winaqi' richin ri rajawaren k'o sipanik nikiya-apo chire ri Josafat, y rija' kan xk'oje' k'a rubeyomel pa ruk'iyal y nim ruq'ij. 6Kan xk'oje' k'a kikoten pa ránima richin xujech-ri' pa ruq'a' ri Jehová, y pa ruwi' ri' kan xerelesaj chuqa' ri che' ri ruwachibel ri Asera y ri akuchi nikiya-wi kiq'ij ri wachibel ri ek'o pa ruwi' taq juyu' ri chiri' pa rajawaren.
7Y chupan ri rox juna' chire ri ruq'atbal-tzij xeruteq-el wo'o' tata'al richin yebetijon pa taq tinamit richin ri ajawaren richin Judá. Y rije' kibini'an Ben-hail, Abdías, Zacarías, Natanael y Micaías. 8Chuqa' kik'in re tata'al re' xebe beleje' levita. Y rije' kibini'an Semaías, Netanías, Zebadías, Asael, Semiramot, Jonatán, Adonías, Tobías y Tobadonías. Chuqa' xebe ri sacerdote Elisamá y ri Joram. 9Rije' xebe k'a richin xebetijon pa taq tinamit richin ri ajawaren richin Judá, y xbekisolo-rij ri nubij chupan ri wuj richin ri rupixa' ri Jehová; y kan xeq'axilan k'a chupan ronojel tinamit richin xekitijoj ri winaqi'.
10Ri Jehová xuben k'a chi konojel ri q'atbel-tzij richin ri ruwach'ulew ri ek'o chunaqaj ri Judá xqaqa jun nimalej xibinri'il pa kiwi', y keri' kan man xetikir ta chik xkiben oyowal rik'in ri Josafat. 11Ek'o k'a chike ri aj-Filistea xkiya' sipanik chire ri Josafat, y k'iy saqipueq k'o chi nikitoj chire, y ri aj-Arabia xkiya' k'a e 7,700 achija' karne'l y chuqa' e 7,700 achija' tzuntzun. 12Ri rey Josafat xk'oje' k'a q'anej ronojel uchuq'a' pa ruq'a', y xerupabala-q'anej nimalej taq jay tz'apen-kij chi tz'aq, y chuqa' xerupaba-q'anej tinamit ri akuchi ek'o jay richin yakonabel richin ronojel ri nik'atzin, chijun ri ajawaren. 13Chupan ri tinamit richin yakonabel, janila k'a k'iy ri k'atzinel yakon kan. Y chiri' pa Jerusalem, kan janila k'a e k'iy aj-labal ri maneq xibinri'il chikiwech ri xek'oje' rik'in ri Josafat.
14Ri aj-labal kan kich'aron-ki' pa taq tzobaj. Ja kajlabal re' achi'el kajlabal pa taq kachoch: Chupan ri tzobaj richin Judá, k'o ri aj-raqen pa kiwi' ri aj-labal rubini'an Adná e rachibilan e 300,000 achi'a' ri kan k'o kuchuq'a'. 15Chuqa' junan rik'in rija', k'o ri aj-raqen rubini'an Johanán pa kiwi' e 280,000 aj-labal. 16Chuqa' k'o ri Amasías, ruk'ajol ri Zicrí, y rija' xusuj-ri' richin nuben rusamaj ri Dios; y k'o k'a pa kiwi' e 200,000 achi'a' ri maneq xibinri'il chikiwech. 17Chupan ri tzobaj richin Benjamín k'o ri Eliadá, jun achin ri maneq xibinri'il chuwech; rija' k'o pa kiwi' e 200,000 achi'a', y ja rije' ri yek'aqon rik'in rute-ch'ab y kik'uan ri kitobal. 18Chuqa' k'o ri Jozabad e rachibilan e 180,000 aj-labal. 19Konojel k'a re achi'a' re' jare' ri xek'oje' rik'in ri Josafat, y man e ajlan ta ri achi'a' ri yechajin kan chiri' pa taq tinamit ri jebel tz'apen-kij chi tz'aq chupan ri ajawaren.
Currently Selected:
2 Crón 17: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
