1 Rey 3
3
Ri ruk'ulubik ri Salomón rik'in ri rumi'al ri rey richin Egipto
1Ri rey Salomón xk'ule' rik'in ri rumi'al ri rey richin Egipto, y keri' xjunamatej-kiwech, y xek'oje' chiri' pa rutinamit kan ri rey David, rokik chiri' pa Jerusalem najin rupabaxik ri rachoch rija', ri rachoch ri Jehová y ri tz'aq ri nisutin-rij ri tinamit ri'. 2Roma man jani tikipaba-q'anej ri rachoch ri Jehová pa Jerusalem, konojel ri winaqi' k'a nikisuj na kamelabel chuwech ri Jehová ri pa ruwi' taq juyu'.
Ri Salomón nuk'utuj runa'oj chire ri Dios
(2 Crón 1:1-13)
3Ri Salomón janila xrajo' ri Jehová, y roma ri' kan xutaqej ri pixa' ri ruya'on kan ri David ri rutata'; man rik'in ri' xusujula' kamelabel y xuporola' pom pa ruwi' taq juyu' ri akuchi xya'ox-wi kiq'ij ri ch'aqa' chik dios. 4Y rija' kan k'a pa Gabaón k'a nibe-wi richin niberusujula' ri kamelabel pa ruwi' ri juyu' ri k'o más rejqalen. Xeruporola' k'a janila chi chikopi' richin xusuj chuwech ri Dios. 5Y k'o k'a jun aq'a' ri Jehová xuk'ut-ri' chuwech pa rachik', ri chiri' pa Gabaón, y xubij chire: Tak'utuj k'a chuwe xabachike nawajo', y yin kan xtinya' chawe, xcha'.
6Y ri Salomón xubij chire: Rat kan janila xajoyowaj ruwech ri asamajel David ri nata', roma rija' kan xarutzeqelibej y ja ri ruchojmilal ri xuben chawech y ronojel ri xuben chawech kan qitzij wi. Y roma ri' kan xajoyowaj ruwech richin xaya' kan jun ruk'ajol chupan re q'atbel-tzij pa ruk'exel rija' roma xken-el, y ja yin ri' ri in asamajel. 7Wakami k'a Jehová Dios wajaw yin, rat xinaya' pa ruk'exel kan ri nata' richin ninq'et-tzij, stape' k'a in ala' na y man jani k'o nuna'oj, y kan man jun wetamabal. 8Y wakami, ja yin ri xik'oje' kan chuwech ri nimalej tinamit ri acha'on rat, jun nimalej tinamit ri kan man e ajlatel ta. 9Tabana' utzil chuwe yin ri in asamajel chi tanojisaj ri wánima rik'in na'oj, richin keri' xkitikir xtinq'et-tzij pa ruwi' ri atinamit roma, ¿achike ta k'a nitikir niq'aton-tzij pa ruwi' ri atinamit, roma kan janila nim?, xcha'.
10Ri Dios kan janila k'a xqa' chuwech ri ch'abel ri xubij ri Salomón, 11y roma ri' xubij chire: Kan xqa' k'a chinuwech ri xak'utuj chuwe; man xak'utuj ta k'iy q'ij chire ri ak'aslen, ni ta beyomel, ni ta ri kikamik ri etzelanel awichin. Xa kan ja k'a ri nojibel ri xak'utuj richin yatikir naq'et-tzij pa ruwi' ri atinamit. 12Y roma ri' ninya' chawe ri xak'utuj chuwe. Xtinojisaj k'a ri awánima rik'in na'oj y re' kan man jun achoq chire nuya'on-wi y man jun achoq chire xtinya-wi ri chawech-apo. 13Y chuqa' xtinya' chawe ri man xak'utuj ta chuwe: Ri beyomel y ri ak'ojlemal. Kan man jun chik xtiq'aton-tzij achi'el ri xtaben rat. 14Y wi xtatzeqelibej ri nubey y kan xtataqej ronojel ri ninbij chawe achi'el xuben ri David ri atata', xtinya' k'a k'iy juna' ak'aslen, xcha' ri Jehová. 15Toq xuna' ruwech ri Salomón, jari' toq xunabej chi jun achik' ri xuben. Y toq xtzolej pa Jerusalem xapon akuchi k'o-wi ri káxa richin ri rujikibel-tzij ri Jehová, y xusuj k'iy kamelabel ri yeporox jumul, y chuqa' xusuj sipanik richin nuq'alajirisaj chi junan ruwech rik'in ri Dios. Y xuben k'a jun nima-wa'in kik'in konojel ri e tata'al chupan ri rajawaren.
Ri Salomón jun achin ri janila runa'oj
16Pa ruq'ijul ri rey Salomón, xe'apon k'a e ka'i' ixoqi' ri itzel kik'aslen rik'in richin jun ch'ojikil. 17Y jun k'a chike rije' kere' k'a xubij: Yin y re jun chik ixoq re' junan ojk'o pa jun jay. Y yin xalex jun ti wal y kan xaxe k'a rija' ri xk'oje' wik'in chupan ri jay ri'. 18Oxi' q'ij kik'achoj yin chirij re ak'ual toq rija' chuqa' xalex jun ti ral. Kan man jun chik k'o qik'in chupan ri jay ri', xaxe roj oj ka'i'. 19Pa jun aq'a' ri ral re ixoq re' xken roma rija' xa xupitz'-qa. 20Y pa nik'aj-aq'a' xyakatej-q'anej rija', y xberuk'ama-pe ri ti wal yin, rokik yin yiwer, y ri ral rija' ri kamineq chik xberuya' kan wik'in yin. 21Y toq xseqer-pe y xiyakatej-q'anej richin ninya' rutz'um ri ti wal, jari' toq xintz'et chi xa kamineq chik, y xintz'et chi re ak'ual re' man ja ta re' ri ti wal yin, xcha' ri ixoq.
22Y ri jun chik ixoq xubij: Ja ti wal yin re k'es, y ri awichin rat ja ri xken, xcha'.
Jak'a ri jun chik xubij: Ni ja la k'es ri ti wal yin, xcha'. Y keri' k'a nikibila' chuwech ri rey.
23Y ri rey xubij-qa: Ri jun nubij chi ri ak'ual k'es ri k'o rik'in, kan richin rija' y ri ak'ual kamineq, richin ri jun chik. Y ri jun chik ixoq nubij chi man keri' ta, xcha-qa. 24K'ari' ri rey xubij chike ri rusamajela' chi tikik'ama-pe jun espada. Y xuk'uex k'a apo jun espada chire. 25K'ari' xubij chike ri rusamajela': Titzak'ij pa nik'aj re ak'ual k'es. Y tiya' k'a nik'aj chire jun ixoq y nik'aj chik chire ri jun chik ixoq, xcha'
26K'ari' jun chike ri ixoqi' xubij: Utz wi keri' nibanatej, roma ni chuwe yin ni chawe rat man niya'ox ta. Más utz titzak'ix pa nik'aj, xcha' ri ixoq ri'.
Jak'a ri rute' ri ak'ual ri k'es, roma kan nujoyowaj ruwech ri ti ral, kere' xubij chire ri rey: ¡Ni, wajaw yin!, tabana' utzil man nakamisaj ta la ak'ual. Más utz taya' chire la ixoq, xcha'.
27K'ari' xch'on chik ri rey y xubij: Tiya' chire re ixoq re' ri ak'ual k'es, roma rija' kan qitzij te'ej, xcha' ri rey. 28Konojel k'a winaqi' ri ek'o pan Israel xketamaj ri q'atoj-tzij ri xuben ri rey Salomón pa ruwi' ri jun ch'ojikil ri', y konojel ri winaqi' kan xkiya' ruq'ij ri rey, roma xkitz'et chi kan ja ri Dios xya'on runa'oj richin nuq'et-tzij pa kiwi'.
Currently Selected:
1 Rey 3: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
