1 Crón 6
6
Ri e rijatzul kan ri Leví
1Jare' ri e oxi' ruk'ajol kan ri Leví: Ri Guersón, ri Quehat y ri Merarí. 2Jare' ri e kaji' ruk'ajol kan ri Quehat: Ri Amram, ri Ishar, ri Hebrón y ri Uziel. 3Jare' ri e oxi' ralk'ual kan ri Amram: Ri Aarón, ri Moisés y ri María. Jare' ri e kaji' ruk'ajol kan ri Aarón: Ri Nadab, ri Abihú, ri Eleazar y ri Itamar. 4Ri Eleazar xralk'ualaj ri Finees, ri Finees xralk'ualaj ri Abisúa, 5ri Abisúa xralk'ualaj ri Buquí, ri Buquí xralk'ualaj ri Uzí, 6ri Uzí xralk'ualaj ri Zeraías, ri Zeraías xralk'ualaj ri Meraiot, 7ri Meraiot xralk'ualaj ri Amarías, ri Amarías xralk'ualaj ri Ahitub, 8ri Ahitub xralk'ualaj ri Sadoc, ri Sadoc xralk'ualaj ri Ahimaas, 9ri Ahimaas xralk'ualaj ri Azarías, ri Azarías xralk'ualaj ri Johanán, 10ri Johanán xralk'ualaj ri Azarías, jun chike ri sacerdote richin ri rachoch ri Dios ri xupaba' kan ri Salomón pa Jerusalem. 11Ri Azarías xralk'ualaj ri Amarías, ri Amarías xralk'ualaj ri Ahitub, 12ri Ahitub xralk'ualaj ri Sadoc, ri Sadoc xralk'ualaj ri Salum, 13ri Salum xralk'ualaj ri Hilquías, ri Hilquías xralk'ualaj ri Azarías, 14ri Azarías xralk'ualaj ri Seraías y ri Seraías xralk'ualaj ri Josadac. 15Ri Josadac xuk'uex-el toq ri Jehová xuq'axaj ri Judá y ri Jerusalem pa ruq'a' ri Nabucodonosor.
Ri e rijatzul kan ri Leví
16Ja' kibi' re' ri e ruk'ajol ri Leví: ri Guersón, ri Quehat y ri Merarí.
17Ri kibi' ri e ruk'ajol ri Guersón ja ri Libní y ri Simí.
18Ri e ruk'ajol ri Quehat ja ri Amram, ri Ishar, ri Hebrón y ri Uziel.
19Ri e ruk'ajol ri Merarí ja ri Mahli y ri Musí.
Jare' ri e rijatzul kan ri Leví.
20Jare' ri e rijatzul kan ri Guersón: Ri Guersón xralk'ualaj ri Libní, ri Libní xralk'ualaj ri Jáhat, ri Jáhat xralk'ualaj ri Zimá, 21ri Zimá xralk'ualaj ri Joah, ri Joah xralk'ualaj ri Idó, ri Idó xralk'ualaj ri Zérah, ri Zérah xralk'ualaj ri Jeatrai.
22Jare' ri e rijatzul kan ri Quehat: Ri Aminadab xralk'ualaj ri Coré, ri Coré xralk'ualaj ri Asir, 23ri Asir xralk'ualaj ri Elcaná, ri Elcaná xralk'ualaj ri Ebiasaf, ri Ebiasaf xralk'ualaj ri Asir, 24ri Asir xralk'ualaj ri Táhat, ri Táhat xralk'ualaj ri Uriel, ri Uriel xralk'ualaj ri Ozías, y ri Ozías xralk'ualaj ri Saúl. 25Ri Elcaná xek'oje' e ka'i' ruk'ajol: Ja ri Amasai y ri Ahimot. 26Ri Ahimot xralk'ualaj ri Elcaná, ri Elcaná xralk'ualaj ri Sofai, ri Sofai xralk'ualaj ri Náhat, 27ri Náhat xralk'ualaj ri Eliab, ri Eliab xralk'ualaj ri Jeroham, y ri Jeroham xralk'ualaj ri Elcaná.
28Ri e ruk'ajol ri Samuel: Ja ri Vasní ri nabey, y ri ruka'n ja ri Abías.
29Jare' ri e ruk'ajol ri Merarí, nitiker-pe rik'in ri nimalaxel: Ja ri Mahli, ri Libní, ri Simí y ri Uzá, 30ri Simá, ri Haguías y ri Asaías.
Ri bixanela' ri xek'oje' pa rachoch ri Dios
31Ri David xeruya' k'a achi'a' richin xe'ok aj-raqen pa kiwi' ri bixanela' pa rachoch ri Jehová banon rik'in tzieq chiri' pa Jerusalem toq xk'oje' ri káxa chiri' 32kan xebixan k'a chiri' y keri' xkiben k'a toq ri Salomón xupaba-q'anej ri rachoch ri Jehová ri chiri' pa Jerusalem, chirij ri' rije' kan k'a xebixan na achi'el ri kibanon-pe. 33Jare' k'a ri kibi' ri achi'a' ri xek'oje' chiri' pa rachoch ri Dios kachibilan ri kalk'ual alaboni': Ri e rijatzul kan ri Quehat: Ri Hemán ri bixanel, re' ruk'ajol kan ri Joel, y ri Joel ruk'ajol ri Samuel, 34ri Samuel ruk'ajol kan ri Elcaná, ri Elcaná ruk'ajol kan ri Jeroham, ri Jeroham ruk'ajol kan ri Eliel, ri Eliel ruk'ajol kan ri Tóah, 35ri Tóah ruk'ajol kan ri Suf, ri Suf ruk'ajol kan ri Elcaná, ri Elcaná ruk'ajol kan ri Máhat, ri Máhat ruk'ajol kan ri Amasai, 36Ri Amasai ruk'ajol kan Elcaná, ri Elcaná ruk'ajol kan ri Joel, ri Joel ruk'ajol kan ri Azarías, ri Azarías ruk'ajol kan ri Sofonías, 37ri Sofonías ruk'ajol kan ri Táhat, ri Táhat ruk'ajol kan ri Asir, ri Asir ruk'ajol kan ri Ebiasaf, ri Ebiasaf ruk'ajol kan ri Coré, 38ri Coré ruk'ajol kan ri Ishar, ri Ishar ruk'ajol kan ri Quehat, ri Quehat ruk'ajol kan ri Leví, y ri Leví ruk'ajol kan ri Israel.
39Pa rijkiq'a' ri Hamán nik'oje' ri Asaf, ri jun chik aj-raqen pa kiwi' ri bixanela'. Ri Asaf ruk'ajol kan ri Berequías, y rija' ruk'ajol kan ri Simá. 40Re Simá re' ruk'ajol kan ri Micael, re Micael re' ruk'ajol kan ri Baaseías, re Baaseías re' ruk'ajol kan ri Malquías, 41re Malquías re' ruk'ajol kan ri Etní, re Etní re' ruk'ajol kan ri Zérah, re Zérah re' ruk'ajol kan ri Adaías, 42re Adaías re' ruk'ajol kan ri Etán, re Etán re' ruk'ajol kan ri Zimá, re Zimá re' ruk'ajol kan ri Simí, 43re Simí re' ruk'ajol kan ri Jáhat, re Jáhat re' ruk'ajol kan ri Guersón, re Guersón re' ruk'ajol kan ri Leví.
44Y pa rajxokon ri Hemán nik'oje' ri Etán ri jun chik aj-raqen pa kiwi' ri bixanela', y rija' rijatzul kan ri Merarí, ruk'ajol kan ri Quisí, re Quisí re' ruk'ajol kan ri Abdí, re Abdí re' ruk'ajol kan ri Maluc, 45re Maluc re' ruk'ajol kan ri Hasabías, re Hasabías re' ruk'ajol kan ri Amasías, re Amasías re' ruk'ajol kan ri Hilquías, 46re Hilquías re' ruk'ajol kan ri Amsí, re Amsí re' ruk'ajol kan Baní re Baní re' ruk'ajol kan ri Sémer, 47re Sémer re' ruk'ajol kan ri Mahli, re Mahli re' ruk'ajol kan ri Musí, re Musí re' ruk'ajol kan ri Merarí, ri Merarí ruk'ajol kan ri Leví.
48Jak'a ri ch'aqa' chik levita xecha'ox richin chi nikiben ch'aqa' chik ruwech samaj ri chiri' pa rachoch ri Dios ri banon rik'in tzieq. 49Ri Aarón y ri rijatzul ja rije' ri yesuju chikop ri niporox chijun y chuqa' nikiya' pom pa ruwi' ri porobel-pom. Chuqa' nikiben ronojel ruwech samaj chiri' chupan ri jay ri akuchi kan man jun wineq nok-apo roma chiri' k'o-wi ri Jehová, ri akuchi ri Jehová nuk'en chik kiwech ri winaqi' aj-Israel, achi'el ri rubin kan ri Moisés, ri rusamajel ri Dios.
Ri e rijatzul kan ri Aarón
50Jare' ri kibi' ri e rijatzul kan ri Aarón: Ri ruk'ajol rija' ja ri Eleazar, y ri ruk'ajol ri Eleazar ja ri Finees, y ri ruk'ajol ri Finees ja ri Abisúa, 51y ri ruk'ajol Abisúa ja ri Buquí, y ri ruk'ajol ri Buquí ja ri Uzí, y ri ruk'ajol ri Uzí ja ri Zeraías, 52y ri ruk'ajol ri Zeraías ja ri Meraiot, y ri ruk'ajol ri Meraiot ja ri Amarías, y ri ruk'ajol ri Amarías ja ri Ahitub, 53y ri ruk'ajol ri Ahitub ja ri Sadoc, y ri ruk'ajol ri Sadoc ja ri Ahimaas.
Ri kitinamit ri levita
(Jos 21:1-42)
54Jare' ri ruwach'ulew ri xkichinaj kan ri e rijatzul kan ri Aarón, roma rije' e kijatzul kan ri Quehat: 55Ri tinamit Hebrón ri k'o pa Judá, y chuqa' ri soq'olbel ri k'o chirij ri tinamit. 56Jak'a ri ulew richin tiko'n y ri kokoj tinamit ri ek'o chunaqaj ri Hebrón, xekiya' kan chire ri Caleb, ruk'ajol ri Jefuné. 57Y keri' k'a ri e rijatzul kan ri Aarón xkik'ul ri tinamit Hebrón, y ri tinamit ri' jun tinamit ri kan richin tobel. Chuqa' xkik'ul ri tinamit Libná, ri Jatir, ri Estemoa, 58ri Hilén, ri Debir, 59ri Asán y ri Bet-semes. Ronojel tinamit re' kan k'o kisoq'olbal. 60Y chuqa' chupan ri ruwach'ulew ri Benjamín xkik'ulumaj kan ri tinamit Gueba, ri Alémet y ri Anatot, rik'in ri kisoq'olbal. Oxlajuj*f3* k'a tinamit ri xok pa kiq'a' ri e rijatzul kan ri Aarón.
61Ri ch'aqa' chik ri e rijatzul kan ri Quehat rik'in sakinik xkik'ulumaj k'a kan lajuj tinamit chiri' chupan ri ruwach'ulew kichin ri nik'aj tzobaj richin ri Manasés. 62Y ri e rijatzul kan ri Guersón xkichinaj kan oxlajuj tinamit ri ek'o chupan ri kiruwach'ulew ri Isacar, ri Aser, ri Neftalí y ri ruwach'ulew ri Manasés ri k'o pa Basán.
63Ri e rijatzul kan ri Merarí, xeya'ox pa sakinik y xkik'ulumaj kan kablajuj tinamit; ri tinamit ri' ek'o chupan ri kiruwach'ulew ri tzobaj richin Rubén, ri Gad y ri Zabulón.
64Y keri' k'a ri ch'aqa' chik israelita xekiya' chike ri e levita ri tinamit ri' y ri kisoq'olbal. 65Y ri chiri' pa kiruwach'ulew ri e rijatzul ri Judá, pa kiruwach'ulew ri tzobaj richin Simeón y pa kiruwach'ulew ri Benjamín, rik'in sakinik xkik'ulumaj k'a kan ri tinamit ri xnatex yan qa kibi'. 66Jujun chike ri e rijatzul kan ri Quehat xkik'ulumaj kan ri kitinamit kichin ri tzobaj richin kan ri Efraín. 67Y ri tinamit ri xya'ox chike ja ri Siquem y chuqa' ri Guézer. Y ri Siquem jun chike ri tinamit richin tobel. 68Y chuqa' xkik'ulumaj ri tinamit Jocmeam, ri Bet-horón, 69ri Aialón y ri Gat-rimón; konojel k'a re tinamit re' rik'in ri kisoq'olbal.
70Y ri ch'aqa' chik rijatzul kan ri Quehat xya'ox kan chike ri tinamit Aner y ri Bileam rik'in ri kisoq'olbal, y ri tinamit ri' ek'o pa ruwach'ulew kichin ri tzobaj richin kan ri Manasés.
71Ri e rijatzul kan ri Guersón xya'ox kan chike ri tinamit Golán ri k'o pa ruwach'ulew Basán y ri tinamit Astarot rik'in ri kisoq'olbal. Y ri tinamit ri' ek'o pa ruwach'ulew kichin ri tzobaj richin kan ri Manasés ri k'o pa relebel-q'ij chire ri raqen-ya' Jordán. 72-73Chuqa' xya'ox kan chike ri tinamit Quedes, Daberat, Ramot y Anem, rik'in ri kisoq'olbal. Y ri tinamit ri ek'o pa ruwach'ulew kichin ri tzobaj richin kan ri Isacar. 74-75Chuqa' xya'ox kan chike ri tinamit Masal, Abdón, Hucoc y ri Rehob rik'in ri kisoq'olbal. Y ri tinamit ri ek'o pa ruwach'ulew kichin ri tzobaj richin kan ri Aser. 76Chuqa' xya'ox kan chike ri tinamit Quedes ri k'o pa Galilea, ri Hamón y ri Quiriataim, rik'in ri kisoq'olbal. Y ri tinamit ri ek'o pa ruwach'ulew kichin ri tzobaj richin kan ri Neftalí.
77Y ch'aqa' chik levita ri e rijatzul kan ri Merarí xya'ox k'a kan chike ri tinamit y rik'in ri kisoq'olbal ri ek'o pa kiruwach'ulew kichin ri tzobaj ri Zabulón: Ri Rimón y ri Tabor; chikijujunal rik'in ri kisoq'olbal. 78Chuqa' xya'ox kan chike ri tinamit ri ek'o pa relebel-q'ij chire ri raqen-ya' Jordán chuwech-apo ri Jericó. Xya'ox chike ri tzobaj richin ri Rubén: ri Béser ri k'o pa tz'iran ruwach'ulew, ri Jahas, 79ri Cademot y ri Mefáat; chikijujunal rik'in ri kisoq'olbal. 80Y chike ri tzobaj richin ri Gad xya'ox kan ri tinamit Ramot richin ri Galaad, ri Mahanaim, 81ri Hesbón y ri Jazer, Konojel k'a tinamit re' rik'in kisoq'olbal.
Currently Selected:
1 Crón 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
