1 Crón 5
5
Ri e rijatzul kan ri Rubén
1Ri Rubén, ri nabey ruk'ajol ri Israel kan ja wi rija' ri k'o más ruq'ij, jak'a roma xmakun, roma ri' xelesex chire chi ja rija' ri k'o más ruq'ij, roma xk'oje-qa rik'in ri rixjayil ri rutata'. Y ri k'o ruq'a' rija' chire, xya'ox chike ri e ruk'ajol ri José, ri jun chik ruk'ajol ri Israel; ri Rubén man xya'ox ta chik rejqalen. 2Ri tzobaj richin ri Judá ja rije' ri xk'oje' más kuchuq'a', y chiri' xel-wi-pe jun tata'al pa kiwi' ri rach'alal. Jak'a ri k'atzinel chi niya'ox ta kan chire ri nimalaxel, xa xya'ox chire ri José. 3Ja kibi' re' ri e ruk'ajol ri Rubén, ri nabey ruk'ajol ri Israel: Ri Hanoc, ri Falú, ri Hesrón y ri Carmí. 4Ri e ruk'ajol kan ri Joel ja ri Semaías, ri Gog, ri Simí, 5ri Micaías, ri Reaías, ri Baal, 6y ri Beerá. Re Beerá re' ja rija' ri k'o más ruq'ij chikikojol ri rubenita; y xuk'uex-el roma ri Tiglat-Piléser, rey richin ri Asiria.
7Ri e rach'alal ri Beerá xtz'ibatej kan kibi' achi'el ri kajlabal ri e aj pa kachoch: Ri e kitata'al ja ri Jeiel y ri Zacarías, 8y ri Bela, ri ruk'ajol ri Azaz, ruk'ajol ri Sema, ruk'ajol ri Joel. Ri Bela xk'oje' pa tinamit Aroer, y ri ruk'ulba't ri ruruwach'ulew nibe pa xaman chire ri juyu' Nebo, y ri tinamit Baal-meón. 9Ri ruk'ulba't napon pa relebel-q'ij y k'a pa tz'iran ruwach'ulew ri k'o-pe chuwech ri raqen-ya' Éufrates, roma xk'iyer k'a ri kawej chiri' pa ruwach'ulew Galaad.
10Toq pa ruq'ijul kan ri rey Saúl, ri e rijatzul kan ri Rubén xkiben jun labal kik'in ri winaqi' agareno, y kan xech'akatej pa kiq'a' ri rubenita, y xek'oje' kan chupan ri kulew ri k'o pa relebel-q'ij chire ri ruwach'ulew Galaad.
Ri e rijatzul kan ri Gad
11Ri e rijatzul kan ri Gad xek'oje' pa xaman chike ri e rijatzul kan ri Rubén k'a pa ruwach'ulew Basán y k'a pa tinamit Salcá. 12Ja ri Joel ja rija' ri k'o más ruq'ij, y chirij-qa rija' ja ri Safán, k'ari' k'o-qa ri Jaanai y pa ruk'isibel ja ri Safat. 13Ja ruchojmilal re' ri kibi' ri e wuqu' kach'alal: Ri Micael, ri Mesulam, ri Sebá, ri Jorai, ri Jacán, ri Zía y ri Éber. 14Jare' ri e ruk'ajol kan ri Abihail, ri ruk'ajol ri Hurí, re' ruk'ajol ri Jaróah, re Jaróah re' ruk'ajol ri Galaad, re Galaad re' ruk'ajol ri Micael, re Micael re' ruk'ajol ri Jesisai, re Jesisai re' ruk'ajol ri Jahdó, y re Jahdó re' ruk'ajol ri Buz. 15Ri Ahí, ruk'ajol ri Abdiel, y rumam ri Guní. Y ri Ahí xk'oje' más ruq'ij chikiwech ri ek'o pa rachoch ri rute-rutata'. 16Konojel k'a rije' xek'oje' pa ruwach'ulew Galaad, pa Basán, y pa taq kokoj kitinamit y pa taq soq'olbel richin ri Sarón. 17Y chi wiq k'a xtz'ibatej kan ri kibi' toq niq'aton-tzij ri Jotam, rey richin Judá, y pa ruq'ijul ri Jeroboam, rey richin Israel.
Ri kibanobal ri e ka'i' tzobaj rik'in nik'aj
18Ri e rijatzul kan ri Rubén y ri Gad, y ri nik'aj tzobaj richin ri Manasés; rije' kan e achi'a' ri maneq xibinri'il chikiwech. Rije' kan jebel e tijon richin nikiben labal, y e kik'amon k'a pe ri kitobal, ri ki-espada y ri rute-kich'ab. Ek'o k'a 44,760 aj-labal. 19Y xkibanala' k'a oyowal kik'in ri oxi' tzobaj winaqi' agareno: Ri Jetur, ri Nafís y ri Nodab. 20Y ri Dios kan xeruto' k'a chupan ri oyowal toq xkik'utuj to'onik chire, y rije' kan xkikuquba' kik'u'x rik'in. Y roma ri' kan xetzaq k'a ri e etzelanel kichin, y chuqa' ri e junamatajineq-kiwech kik'in. 21Xekik'uala' k'a el ri kawej ri e etzelanel kichin: E 50,000 camello, e 250,000 karne'l y e 2,000 bur. Y chuqa' xekik'uaj k'a el e 100,000 winaqi'. 22Kan janila k'a k'iy xeken chupan ri labal ri', roma kan ja ri Dios xya'on q'ij chike ri israelita. Xek'oje' k'a kan pa taq kitinamit ri winaqi' agareno, k'a toq xe'uk'uex-el pan Asiria.
23Ri nik'aj chire ri tzobaj richin ri Manasés ri ek'o pa relebel-q'ij chire ri raqen-ya' Jordán kan janila k'a xewinaqir; xkiq'atapuj k'a ri ruwach'ulew, nitiker-el rik'in Basán y napon k'a pa Baal-hermón, ri nibix chuqa' Senir y juyu' Hermón chire. 24Y jare' ri kibi' ri e aj-raqen ri ek'o pa rachoch ri kitata': Ri Éfer, ri Isí, ri Eliel, ri Azriel, ri Jeremías, ri Hodavías, y ri Jahdiel: Rije' e achi'a' ri janila kuchuq'a' y maneq xibinri'il chikiwech. 25Jak'a rije' man xkikuquba' ta kik'u'x rik'in ri Jehová ri ki-Dios y ri ki-Dios ri kite-kitata'. Roma xa xekitzeqelibej ri ki-dios ri winaqi' aj chiri', ri xa xe'elesex yan el roma ri Jehová toq ye'ok yan apo chupan ri ruwach'ulew. 26Y roma ri' ri Dios richin ri Israel xuben chire ri Pul rey richin Asiria richin xeyakatej chikij. Ri Pul xeruk'uaj-el pa ximonri'il ri winaqi' rubenita, gadita y ri nik'aj tzobaj richin ri Manasés ri k'o pa relebel-q'ij chire ri raqen-ya' Jordán. Y xeruk'uaj-el chupan ri tinamit Halah, Habor, Hará y chunaqaj ri raqen-ya' Gozán, ri akuchi ek'o-wi k'a re wakami. Ri Pul chuqa' nibix Tiglat-piléser chire.
Currently Selected:
1 Crón 5: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
