1 Crón 16
16
1Xbekiya' k'a kan ri rukáxa ri Dios chupan ri jay ri banon rik'in tzieq ri xuben ri David. Y chirij ri' xekisuj chikopi' ri yeporox jumul, y chuqa' xekisuj sipanik ri nuq'alajirisaj chi junan kiwech rik'in ri Dios. 2Y toq xek'achoj chire ri kamelabel ri', ri David xuya' urtisanik pa ruwi' ri tinamit Israel pa rubi' ri Dios. 3Chirij re' ri David xusipaj oxi' ruwech kaxlan-wey chike; jun choj kaxlan-wey, jun ponon kaxlan-wey banon rik'in dátil, y jun chik banon rik'in uva chaqirisan. Y re' xusipaj chike konojel aj-Israel ri ek'o chiri'; chi achi'a' chi ixoqi'.
4Chirij ri' ri David xerucha' k'a kan ri e levita richin yesamej chuwech ri káxa richin ri Jehová, richin nikibixaj ri rubi', y nikiya' ruq'ij-ruk'ojlen ri Jehová, ri Dios richin Israel. 5Ri aj-raqen ri xk'oje' kan pa kiwi' ja ri Asaf, ri nuq'ojomaj ri platillo. Chirij-qa rija' ja ri Zacarías, y chirij-qa rija' ja ri Jeiel, ri Semiramot, ri Jehiel, ri Matatías, ri Eliab, ri Benaías, ri Obed-edom y ri jun chik Jeiel. Konojel rije' nikiq'ojomaj ri salterio y ri arpa. 6Y ri e sacerdote Benaías y ri Jahaziel, ja rije' ri yexupun ri trompeta chuwech ri rukáxa ri Dios.
Ri bix ri xuben ri David richin matioxinik
(Sal 105:1-15; 96:1-13; 106:47-48)
7Y chupan ri q'ij ri', ri David xujech k'a kan re bixanik re' pa ruq'a' ri Asaf y pa kiq'a' ri e rach'alal richin nikiya' matioxinik chire ri Jehová. Y kere' nubij:
8¡Kan tiqaya' ruq'ij ri Jehová!
¡Kan tiqatzijoj ri nimalej rubi'!
Kan tiqatzijoj chike ri tinamit
ri nima'q taq banobel ri yeruben.
9Xqojbixan k'a richin niqaya' ruq'ij-ruk'ojlen.
Kan tiqatzijoj ri meyel taq banobel ri yeruben.
10Kan tiqanimirisaj-qi' roma ri nimalej rubanobal rija'.
Kan tikikot k'a ri qánima ri yojkanon richin ri Jehová.
11Tiqakanoj k'a ri Jehová ri k'o janila uchuq'a' rik'in;
Kan tiqakanoj k'a jantape'.
12Kan toqaqa k'a chiqak'u'x
ronojel ri meyel taq rubanobal ri rubanon qik'in,
Man tiqamestaj ri rubanobal ri xaxe qik'in roj xuben-wi.
Kan toqaqa k'a chiqak'u'x ri ruchojmilal ri rubin chiqe.
13Kan toqaqa k'a chiqak'u'x roj, ri oj rijatzul kan ri Israel
ri rusamajel ri Dios.
Kan toqaqa k'a chiqak'u'x roj, ri oj ruk'ajol kan ri Jacob,
ri kan oj cha'on roma ri Dios.
14Ja rija' ri Jehová ri qa-Dios;
Ja rija' ri niq'aton-tzij pa ruwi' chijun ri ruwach'ulew.
15Rija' kan jantape' xtik'oje' pa ránima ri rujikibel-tzij;
rija' man xtumestaj ta ri rusujunik,
stape' xtiq'ax jun 1,000 sol winaqi':
16Re jikibel-tzij re' ri xuben rik'in ri Abraham,
re yo'ontzij re' ri xuben rik'in ri Isaac,
17re jikibel-tzij ri xuben chik rik'in ri Jacob,
re jikibel-tzij richin q'asen ri xuben qik'in roj ri oj israelita.
18Jare' ri jikibel-tzij ri xuben:
Kan xuya' ri ruwach'ulew Canaán chiqe;
ri xqak'ul roj richin xqichinaj kan.
19Stape' ri qate-qatata' e juba' ok,
y xa e q'axel chuwech re ruwach'ulew re',
20y xa xebe-kela' xebe-kela' pa taq ruwach'ulew,
y xeq'axilan pa jun tinamit y chupan chik jun;
21Man rik'in ri' ri Jehová
kan man xuya' ta q'ij richin xetz'ilox;
koma ri qate-qatata', ri Jehová
xuya' tijoj-poqonal pa kiwi' ri ch'aqa' chik rey.
22Y man xuya' ta q'ij richin yetz'ilox ri e rucha'on;
ni man xuya' ta q'ij richin yeyoq' ri e q'alajirisey ri ruch'abel.
23Kan tiqabixaj ri rubi' ri Jehová,
roj ri ojk'o chuwech re ruwach'ulew;
Kan q'ij-q'ij tiqatzijoj ri kolotajik ri nuya'.
24Kan tiqatzijoj ri ruk'ojlemal chike ch'aqa' chik ruwach'ulew;
y tiqatzijoj k'a ri meyel taq rubanobal chike ri winaqi'.
25Roma ri Jehová kan k'o nim ruq'ij-ruk'ojlen,
y kan xaxe rija' ruk'amon chi niqaya' ruq'ij.
Rija' kan man junan ta k'a kik'in ch'aqa' chik dios,
roma rija' kan k'o rukiy.
26Roma ri ki-dios ri ch'aqa' chik ruwach'ulew,
xa e wachibel y man jun kejqalen:
Jak'a ri Jehová kan ja rija' xbanon ri kaj.
27Kan janila niyik'lun ri akuchi k'o-wi rija'.
Ri pa rachoch kan k'o-wi uchuq'a' y kikoten.
28Kan rik'in ri Jehová k'o-wi ri k'ojlen
y kan rik'in rija' k'o-wi ri uchuq'a'.
Roma ri' roj ri oj aj pa qachoch,
kan tiqaya' k'a ruq'ij-ruk'ojlen ri Jehová.
29Kan ruk'amon richin niqanimirisaj ri nimalej rubi' ri Jehová.
Kan tiqak'ama-pe sipanik chuwech;
kan xtiqaxuk-xtiqamej-qi' chuwech ri loq'olej ruk'ojlemal rija'.
30Kan konojel k'a winaqi' xkebaybot chuwech ri Jehová.
Jak'a ri ruwach'ulew man xtisilon ta roma kan jebel jikil.
31Kan tikikot k'a ri kaj;
chuqa' kan tikikot k'a ri ruwach'ulew.
Kan xtiqatzijoj chike ri winaqi' richin chijun ruwach'ulew
chi ri Jehová, ja rija' ri rey.
32Kan tiwajin k'a ri palou y ronojel ri ek'o chupan;
kan tikikot ri juyu' y ronojel ri tikil chuwech.
33Kan kebixan ri che' ri ek'o pa k'echelaj,
Kan kebixan roma kikoten chuwech ri Jehová;
roma rija' xtipe richin xtiq'aton-tzij pa ruwi' ri ruwach'ulew.
34Kan janila qojmatioxin chire ri Dios,
roma rija' kan janila utz;
roma ri rajowabal y ri rujoyowanik
kan richin tibe-q'ij tibe-seq.
35Roma ri' tiqabij chire:
¡Qojakolo', Dios qakolonel roj!
Kan tamolo' qachi';
Kan qojakolo' chikikojol ri winaqi' ri e richin ch'aqa' chik ruwach'ulew,
richin keri' kan xtiqanimirisaj ri loq'olej abi',
richin rik'in kikoten xtiqaya' aq'ij-ak'ojlen.
36¡Tiqaya' ruq'ij ri Jehová, ri qa-Dios roj ri oj aj-Israel.
Tiqaya' ruq'ij tibe-q'ij tibe-seq.
Y konojel k'a ri winaqi' xkibij: Kan keri' wi xecha', y konojel k'a xkiya' ruq'ij ri Jehová.
37Chirij ri', ri David xuya' k'a kan ri Asaf y ri e rachibil richin yesamej q'ij-q'ij chupan ri rachoch ri Jehová ri akuchi k'o-wi rija'. 38Chuqa' xuya' kan ri Obed-edom y ri e wok'al waqxaqi' rachibil ri e beneq rik'in. Chuqa' rik'in jun chik Obed-edom, ruk'ajol ri Jedutún, y ri Hosá, xuya' kan richin nikichajij ri ruchi' ri jay. 39Y ri sacerdote Sadoc y ri e rachibil xeruya' kan richin yesamej chuwech ri rachoch ri Jehová ri banon rik'in tzieq, y re' xbanatej pa tinamit Gabaón ri k'o-el chuwi' taq juyu'. 40Y ri sacerdote ri' xkisuj k'a kamelabel chuwech ri Jehová pa ruwi' ri porobel; keri' nikiben ri nimaq'a', y keri' chuqa' nikiben ri tiqaq'ij, kan achi'el ri tz'ibatajineq kan chupan ri pixa' ri xuya' kan ri Jehová. 41Y ri David chuqa' xuya' kan ri Hemán, ri Jedutún y ch'aqa' chik ri xecha'ox kan richin yebixan y nikiya' matioxinik chire ri Jehová, roma ri rajowabal y ri rujoyowanik kan richin tibe-q'ij tibe-seq. 42Rije' nikixupuj trompeta, nikiq'ojomaj ri platillo y ri ch'aqa' chik kiwech q'ojom richin chi nikibixaj rubi' ri Dios. Ri e ruk'ajol ri Jedutún, jari' ri yechajin ri ruchi' ri rachoch ri Dios.
43Chirij ronojel re' konojel xetzolin k'a chi taq kachoch, y chuqa' ri David xtzolin chirachoch richin xerurtisaj ri aj pa rachoch.
Currently Selected:
1 Crón 16: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
