ᐊᐸᔅᑕᓚᒃ 21
21
ᐹᓪ ᐃᑐᑌᐤ ᒋᕉᓴᓚᒥᒃ
1ᑮ ᐃᑭᓐ ᒫᑲ, ᐃᔅᐱ ᑳ ᑮ ᓇᑲᑕᑭᒋᒃ, ᓀᔥᑕ ᐁ ᑮ ᐃᓕᓕᒫᔑᔮᒃ, ᒀᔭᔉ ᓂ ᑮ ᐯᒋ ᐃᑖᔑᓈᓐ ᐊᓐᑕ ᑯᐅᔅ, ᒥᓇ ᒫᑲ ᐎᐋᐸᒃ ᐊᓐᑕ ᕈᑦᔅ, ᐁᑯᑕ ᒫᑲ ᐅᒋ ᐊᓐᑕ ᐹᑖᕋ: 2ᐁ ᒥᔅᑲᒫᒃ ᒫᑲ ᓈᐱᒀᓐ ᐁ ᐎ ᐃᑖᔅᑕᒃ ᐊᓐᑕ ᐱᓂᓯᔭ ᐃᔑ, ᓂ ᑮ ᐳᓯᓈᓐ, ᐁᑯ ᒫᑲ ᑳ ᑭᔑᒋᒣᔮᒃ᙮ 3ᐃᔅᐱ ᒫᑲ ᑳ ᑮ ᐙᐸᑕᒫᒃ ᓴᐃᑉᕋᔅ, ᓇᒪᑎᓂᔉ ᐃᑌᑫ ᓂ ᑮ ᓇᑲᑕᐁᓈᓐ, ᐊᓐᑕ ᓯᕆᔭ ᒫᑲ ᓂ ᑮ ᐃᑖᔑᓈᓐ, ᓀᔥᑕ ᐊᓐᑕ ᑖᐃᕐ ᓂ ᑮ ᑲᐹᓈᓐ: ᐌᓴ ᐁᑯᑕ ᑫ ᑲᐸᑌᓈᓱᓈᓂᐗᒃ ᓈᐱᒀᓂᒃ ᐅᒋ᙮ 4ᐁ ᒥᔅᑲᐗᑭᒋᒃ ᒫᑲ ᑭᔅᑭᓄᐊᒪᐙᑲᓇᒃ, ᐊᓐᑕ ᓂ ᑮ ᑕᔑᑳᓈᓐ ᓂᔂᔅ ᐁ ᑭᔑᑳᑭ; ᐁᐗᒀᓂᑭ ᑳ ᐃᑖᒋᒃ ᐹᓚ ᐊᒑᑯᒃ ᐅᒋ ᐁᑳ ᒋᕉᓴᓚᒥᒃ ᑭᒋ ᐃᑐᑌᓕᒋ᙮ 5ᐃᔅᐱ ᒫᑲ ᑳ ᑮ ᑎᐱᐸᓕᑖᔮᒃ ᐊᓂᐃ ᑭᔑᑳᐗ, ᓂ ᑮ ᑭᑐᑖᓈᓐ ᑭᒋ ᐃᑐᑌᔮᒃ ᐃᑕ ᐙ ᐃᑐᑌᔮᒃ; ᒥᓯᐌ ᐁ ᐃᑕᓯᒋᒃ ᒫᑲ ᓂ ᑮ ᐯᔑᐎᓕᑯᓈᓇᒃ, ᐊᓯᒋ ᐎᐎᐙᐗ ᓀᔥᑕ ᐅᑦ ᐊᐙᔑᒥᔑᐙᐗ, ᐹᑎᒪ ᐃᓕᑯᒃ ᐃᑖᐎᓂᒃ ᑳ ᑮ ᐅᒋ ᐗᓚᐎᔮᒃ; ᓀᔥᑕ ᒫᑲ ᐁ ᐅᒋᒋᑾᓂᐱᔮᒃ ᒋᑭᐯᒃ, ᓂ ᑮ ᐋᔭᒥᐋᓈᓐ᙮ 6ᐃᔅᐱ ᒫᑲ ᑳ ᑮ ᐋᔭᑕᒥᔅᑳᑐᔮᒃ, ᓂ ᑮ ᐳᓯᓈᓐ, ᐎᓚᐗᐤ ᒫᑲ ᒥᓇ ᑮ ᑭᐌᐗᒃ᙮
7ᐃᔅᐱ ᒫᑲ ᑳ ᑮ ᐳᓂᐃᑖᔑᔮᒃ ᑖᐃᕐ ᐅᒋ, ᓂ ᑮ ᐯᒋ ᐃᑐᑖᓈᓐ ᐊᓐᑕ ᑖᓕᒣᐊᔅ, ᓂ ᑮ ᐊᑕᒥᔅᑲᐙᓈᓇᒃ ᒫᑲ ᑳ ᐎᒋᔖᓂᑐᒋᒃ, ᓀᔥᑕ ᐯᔭᑯ ᑭᔑᑳᐤ ᓂ ᑮ ᐎᒋᑕᔑᑫᒫᓈᓇᒃ᙮ 8ᐎᐋᐸᒃ ᒫᑲ ᓂᓚᓈᓐ ᐹᓪ ᑳ ᐅᐎᒉᐙᑲᓂᔮᒃ ᓂ ᑮ ᑭᑐᑖᓈᓐ, ᓀᔥᑕ ᓂ ᑮ ᐯᒋ ᐃᑐᑖᓈᓐ ᐊᓐᑕ ᓯᓴᕇᔭ; ᓂ ᑮ ᐱᑐᑫᐙᓈᓐ ᒫᑲ ᐎᑭᒃ ᐱᓕᑉ ᑳ ᒥᓗᐋᒋᒧᐎᓕᓕᐎᑦ, ᐁᐗᑯ ᐯᔭᒃ ᐊᓂᑭ ᐁ ᓂᔂᔅ ᐃᑕᓯᒋᒃ; ᓂ ᑮ ᐎᑭᒫᓈᓐ ᒫᑲ᙮ 9ᐁᐗᑯ ᐃᓕᓕᐤ ᒫᑲ ᑮ ᓀᐎᓕᐗ ᐅᑖᓂᓴ ᑳ ᑮ ᑭᔅᑭᐙᐃᑫᓕᒋ᙮ 10ᐁᑯᑕ ᒫᑲ ᐁ ᑮ ᐃᑖᔮᒃ ᒥᒉᑐ ᑭᔑᑳᐗ, ᒎᑎᐊᐃᒃ ᑮ ᐅᒋ ᐯᒋ ᐃᑐᑌᐤ ᐯᔭᒃ ᐅᑭᔅᑭᐙᐃᑫᐤ ᐋᑳᐸᔅ ᐁ ᐃᔑᓂᑳᓱᑦ᙮ 11ᐃᔅᐱ ᒫᑲ ᑳ ᑮ ᐯᒋ ᓈᔑᔭᒥᑦ, ᑮ ᐅᑎᓇᒬᐤ ᐹᓪ ᐅ ᐸᑾᑌᐅᓂᓕᐤ, ᐁ ᑮ ᒫᒫᑯᐱᑕᒃ ᒫᑲ ᑎᐱᓚᐌ ᐅᒋᒋᔭ ᓀᔥᑕ ᐅᓯᑕ, ᑮ ᐃᑗᐤ, ᐁᑴᑗᑦ ᐸᓓᑭ ᐊᒑᒃ, ᐁᑯ ᑖᐱᔅᑯᒡ ᒎᐗᒃ ᒋᕉᓴᓚᒥᒃ ᑳ ᐃᑖᒋᒃ ᑫ ᐃᔑ ᒫᒪᒋᑯᐱᑖᒋᒃ ᐊᓂᐃ ᐃᓕᓕᐗ ᑳ ᑎᐱᓚᐌᐎᓯᓕᒋ ᐅᒣᓕᐤ ᐸᑾᑌᐅᓂᓕᐤ, ᑲᑕ ᐸᑭᑎᓀᐗᒃ ᒫᑲ ᐅ ᒋᒋᓖᒃ ᒉᓐᑖᐃᓚ᙮
12ᐃᔅᐱ ᒫᑲ ᐅᐅ ᑫᒀᓇ ᐱᐁᑕᒫᒃ, ᑖᐱᔅᑯᒡ ᓂᓚᓈᓐ, ᐊᓂᑭ ᓀᔥᑕ ᐁᑯᑕ ᑳ ᑕᔑᑫᒋᒃ ᓂ ᑮ ᐸᑯᓭᓕᒫᓈᓐ ᐁᑳ ᑭᒋ ᐃᑐᑌᑦ ᒋᕉᓴᓚᒥᒃ᙮ 13ᐁᑯ ᐹᓪ ᓀᔥᑴᐗᔑᐃᐌᑦ, ᑫᒀᓐ ᑭᑦ ᐃᑌᓕᑌᓈᐗᐤ ᓈ ᑭᒋ ᒫᑐᔦᒃ ᓀᔥᑕ ᑭᒋ ᐱᑯᐸᓕᑖᔦᒃ ᓂᑌᐃ? ᐌᓴ ᓂᑦ ᐋᔦᔅᑯᓯᓐ ᓇᒪᐎᓚ ᐱᑯ ᑭᒋ ᒫᒪᒋᑯᐱᑎᑲᐎᔮᓐ, ᒫᑲ ᐊᓯᒋ ᑭᒋ ᓂᐱᔮᓐ ᒋᕉᓴᓚᒥᒃ ᐅᑦ ᐃᔑᓂᑳᓱᐎᓐ ᐅᒋ ᐅᑎᐯᓕᒋᑫᐤ ᒋᓴᔅ᙮
14ᐃᔅᐱ ᒫᑲ ᐁᑳ ᐙ ᔑᑭᒫᑲᓂᐎᑦ, ᓂ ᑮ ᐳᓂᓈᓐ, ᐁ ᐃᑗᔮᒃ, ᐁᑯᔑ ᐅᑦ ᐃᑌᓕᑕᒧᐎᓐ ᐅᑎᐯᓕᒋᑫᐤ ᑲᑕ ᐃᑭᓂᓕᐤ᙮
15ᑳ ᐳᓂᐸᓕᑭ ᒫᑲ ᐅᐅ ᑭᔑᑳᐗ ᓂ ᑮ ᓂᓵᐎᓈᓐ, ᐁᑯ ᑳ ᐃᑐᑌᔮᒃ ᒋᕉᓴᓚᒥᒃ᙮ 16ᓂ ᑮ ᐎᒉᐎᑯᓈᓇᒃ ᐊᓯᒋ ᐋᑎᑦ ᐊᓂᑭ ᑭᔅᑭᓄᐊᒪᐙᑲᓇᒃ ᓯᓴᕆᐊᐃᒃ ᑳ ᐃᑖᒋᒃ, ᑮ ᐯᒋ ᐎᒉᐌᐗᒃ ᒫᑲ ᐊᐌᓕᐗ ᓀᓴᓐ ᐁ ᐃᔑᓂᑳᓱᓕᒋ, ᓵᐃᑉᕋᔅ ᐃᓕᓕᐗ, ᐁ ᑭᔐ ᑭᔅᑭᓄᐊᒪᐙᑲᓂᐎᓕᒋ, ᐁᐗᒀᓇ ᑫ ᐎᑐᑫᒪᑭᑦ᙮
ᐹᓪ ᒫᐗᑎᑌᐤ ᒉᒻᓴ
17ᐃᔅᐱ ᒫᑲ ᑳ ᑕᑯᔑᓂᔮᒃ ᒋᕉᓴᓚᒥᒃ, ᑳ ᐎᒋᔖᓂᑐᒋᒃ ᓂ ᑮ ᐱᑐᑲᐃᑯᓈᓇᒃ ᐁ ᒥᓚᐙᑕᑭᒃ᙮ 18ᐎᐋᐸᒃ ᒫᑲ ᐹᓪ ᓂ ᑮ ᐎᒋᐱᑐᑫᒥᑯᓈᓐ ᐁ ᓇᑕᑭᑦ ᒉᒻᔅ; ᒥᓯᐌ ᒫᑲ ᐅᓂᑳᓀᓕᑖᑯᓯᐗᒃ ᐊᓐᑕ ᑮ ᐃᑖᐗᒃ᙮ 19ᐃᔅᐱ ᒫᑲ ᑳ ᑮ ᐋᔭᑕᒥᔅᑲᐙᑦ, ᒥᑐᓂ ᑮ ᐙᐎᑕᒪᐌᐤ ᐊᓂᐃ ᑫᒀᓇ ᑭᒋᒪᓂᑐᐗ ᑳ ᑮ ᑐᑕᒥᓕᒋ ᒣᑴᔭᔥ ᒉᓐᑖᐃᓚ ᐅ ᑲᑫᔅᑭᒥᐌᐎᓐ ᐅᒋ᙮ 20ᐃᔅᐱ ᒫᑲ ᐱᐁᑕᑭᒃ, ᑮ ᑭᔅᑖᒋᒣᐗᒃ ᐅᑎᐯᓕᒋᑫᐗ, ᓀᔥᑕ ᑮ ᐃᑌᐗᒃ, ᑭ ᐙᐸᑌᓐ, ᓂᒋᔖᓂᓈᓐ, ᐁᔅᐱᒋ ᒥᒉᑡᐤ ᒥᑖᑐᒥᑖᓇᐤ ᐁ ᐃᑕᓯᒋᒃ ᒎᐗᒃ ᑳ ᑖᐺᑕᑭᒃ; ᒥᓯᐌ ᐁ ᐃᑕᓯᒋᒃ ᒫᑲ ᒪᔥᑲᐌᓕᑕᒶᒃ ᐅᓚᔓᐌᐎᓂᓕᐤ: 21ᑮ ᐎᑕᒪᐙᑲᓂᐎᐗᒃ ᒫᑲ ᑭᓚ ᐅᒋ ᐁ ᑭᔅᑭᓄᐊᒪᐗᒋᒃ ᒥᓯᐌ ᒎᐗᒃ ᑳ ᐃᑖᒋᒃ ᒣᑴᔭᔥ ᒉᓐᑖᐃᓚ ᑭᒋ ᐌᐱᓈᒋᒃ ᒣᓯᓴ, ᐁ ᐃᑗᔭᓐ ᐁᑳ ᑭᒋ ᑭᔅᑭᓄᐙᒋᔣᒋᒃ ᐅᑦ ᐊᐙᔑᒥᔑᐙᐗ, ᐁᑳ ᓀᔥᑕ ᑭᒋ ᓄᔅᐱᓇᑕᑭᒃ ᐊᓂᐃ ᐋᔨᑎᐎᓇ᙮ 22ᑫᒀᓐ ᒫᑲ ᐅᒪ? ᒥᔭᒪᐎᒥᒉᑎᒋᒃ ᐃᓕᓕᐗᒃ ᔮᓕᑌᓪ ᑲᑕ ᐯᒋ ᒫᒪᐎᐃᑐᑌᐗᒃ: ᐌᓴ ᑲᑕ ᐯᑕᒶᒃ ᐁ ᑮ ᑕᑯᔑᓇᓐ᙮ 23ᐁᐗᑯ ᐅᒋ ᑐᑕ ᐅᒪ ᐁ ᐃᑎᑖᒃ: ᓂᑦ ᐋᔭᐙᓈᓇᒃ ᓀᐤ ᐃᓕᓕᐗᒃ ᑳ ᑮ ᑭᔅᑭᒧᒋᒃ; 24ᐅᑯ ᐅᑎᓂᒃ, ᓀᔥᑕ ᐎᒋᐹᔦᑭᐃᑎᓱᒥᒃ, ᓀᔥᑕ ᐎᒋᑎᐸᐊᒫᑫᒥᒃ, ᑭᒋ ᑳᔥᑭᐹᑕᑭᒃ ᐅᔅᑎᒀᓂᐙᐗ: ᒥᓯᐌ ᒫᑲ ᑭᒋ ᑭᔅᑫᓕᑕᑭᒃ ᐊᓂᐃ ᑫᒀᓇ ᑳ ᑮ ᐎᑕᒪᐙᑲᓂᐎᒋᒃ ᐁ ᐃᑖᒋᒥᑳᐎᔭᓐ ᐁᑳ ᐙᔦᔥ ᐁ ᐃᑖᐸᑕᑭ; ᒫᑲ ᑭᓚ ᑫᒋᐙᒃ ᒀᔭᔉ ᐁ ᐱᒧᑌᔭᓐ, ᓀᔥᑕ ᐁ ᑲᓇᐌᓕᑕᒪᓐ ᐅᓚᔓᐌᐎᓐ᙮ 25ᐊᓂᑭ ᒉᓐᑖᐃᓚᒃ ᒫᑲ ᐅᒋ ᑳ ᑖᐺᑕᑭᒃ, ᓂ ᑮ ᒥᓯᓇᐁᓈᓐ ᓀᔥᑕ ᓂ ᑮ ᐎᑌᓈᓐ ᐁᑳᐎᓚ ᐊᓂᒣᓕᐤ ᑭᒋ ᓈᑲᒋᑖᒋᒃ, ᐱᑯ ᐁᑳ ᑭᒋ ᐋᐸᒋᑖᒋᒃ ᑫᒀᓕᐤ ᑳ ᑮ ᐸᑭᑎᓇᒫᒥᓕᒋ ᒪᓂᑐᑳᓇ, ᓀᔥᑕ ᒥᑯᓕᐤ, ᓀᔥᑕ ᑳ ᑭᐱᑭᑐᓀᓈᑲᓂᒥᒋ, ᓀᔥᑕ ᐁᑳ ᑭᒋ ᐱᔑᒀᑎᓯᒋᒃ᙮
26ᐁᑯ ᐹᓪ ᐌᑎᓈᑦ ᐊᓂᐃ ᐃᓕᓕᐗ, ᐎᐋᐸᓂᓕᒃ ᒫᑲ ᐁ ᐎᒋᐹᔦᑭᐃᑎᓱᒫᑦ ᑮ ᐱᑐᑫᐤ ᑭᒋᐋᔭᒥᐁᐎᑲᒥᑯᒃ, ᐁ ᐎᑕᒃ ᑭᒋ ᑎᐱᐸᓕᓕᑭ ᐹᔦᑭᐃᑎᓱᐎ ᑭᔑᑳᐗ, ᐹᑎᒫ ᐃᓕᑯᒃ ᐸᑭᑎᓂᑫᐎᓐ ᑫ ᐸᑭᑎᓇᒫᒋᒃ ᒥᓯᐌ ᑕᑐ ᐁ ᐃᑕᓯᒋᒃ᙮
ᐹᓪ ᒫᑯᓈᑲᓂᐎᐤ ᐲᒋ ᐊᔭᒥᐁᐎᑲᒥᑯᒃ
27ᐃᔅᐱ ᒫᑲ ᐊᓂᐃ ᓂᔂᓱ ᑭᔑᑳᐗ ᑫᑳᑦ ᑳ ᐳᓂᐸᓕᑭ, ᐊᓂᑭ ᒎᐗᒃ ᐁᔕᐃᒃ ᑳ ᐅᒌᒌᒃ, ᐃᔅᐱ ᐎᐋᐸᒫᒋᒃ ᑭᒋᐋᔭᒥᐁᐎᑲᒥᑯᒃ, ᑮ ᔑᑭᒣᐗᒃ ᒥᓯᐌ ᐃᓕᓕᐗ, ᓀᔥᑕ ᑮ ᐅᑎᑎᓀᐗᒃ, 28ᐁ ᑌᐺᒋᒃ, ᑭᓚᐗᐤ ᐃᔅᕃᐃᓪ ᐃᓕᓕᑐᒃ, ᐎᒋᐃᐌᒃ; ᐊᐗ ᐁᐗᒀᓇ ᐃᓕᓕᐤ ᑳ ᑭᔅᑭᓄᐊᒪᐙᑦ ᒥᓯᐌ ᐃᓕᓕᐗ ᒥᓯᐌ ᐃᑕ ᑭᒋ ᐋᑕᐌᓕᒫᓕᒋ ᐅᐅ ᐃᓕᓕᐗ, ᓀᔥᑕ ᐅᓚᔓᐌᐎᓂᓕᐤ, ᓀᔥᑕ ᐅᑕ: ᐊᓯᒋ ᓀᔥᑕ ᑮ ᐯᔑᐌᐤ ᒃᕆᑲ ᐅᑕ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᑮ ᒪᒉᓕᑖᑯᑕᐤ ᐅᒣᓕᐤ ᐸᓓᑭᑲᒥᑯᓕᐤ᙮ 29(ᐌᓴ ᐋᔕᔾ ᑮ ᐙᐸᒣᐸᓇᒃ ᐁ ᐎᒉᐙᓕᒋ ᐃᑖᐎᓂᒃ ᐊᓂᐃ ᑕᕋᐱᒪᔅ ᐁᐱᓴᔅ ᐃᓕᓕᐗ, ᐊᓂᐃ ᐹᓪ ᑮ ᐱᑐᑲᐁᐤ ᑭᒋᐋᔭᒥᐁᐎᑲᒥᑯᒃ ᑳ ᐃᑌᓕᑕᑭᒃ᙮)
30ᒥᓯᐌ ᒫᑲ ᐃᑖᐎᓐ ᑮ ᒥᑯᔥᑳᒋᐸᓕᐤ, ᒥᓯᐌ ᒫᑲ ᐃᓕᓕᐗᒃ ᑮ ᒫᒪᐎᐃᔅᐸᑖᐗᒃ: ᑮ ᐅᑎᓀᐗᒃ ᒫᑲ ᐹᓚ, ᓀᔥᑕ ᑭᒋᐋᔭᒥᐁᐎᑭᒥᑯᒃ ᑮ ᐅᒋ ᐗᓚᐎᐃᑌᐗᒃ: ᑮᔖᒡ ᒫᑲ ᐃᔥᒀᑌᒪ ᑮ ᑭᐸᐃᑳᑌᐗ᙮ 31ᒣᒀᒡ ᒫᑲ ᐁ ᓇᑕᐎ ᓂᐸᐋᒋᒃ, ᐃᑖᒋᒧᐎᓂᓕᐤ ᑮ ᐯᒋ ᐅᑎᑎᑯ ᑭᒋ ᓇᑐᐸᓕᐎᑭᒪᐤ ᒥᓯᐌ ᒋᕉᓴᓚᒥᒃ ᐁ ᒀᓗᑐᑖᑐᓈᓂᐗᓂᓕᒃ᙮ 32ᐊᓇ ᑭᔖᒡ ᑳ ᑮ ᐅᑎᓈᑦ ᐅᓇᑐᐸᓕᐗ ᓀᔥᑕ ᓇᑐᐸᓕᐎᑭᒫᐗ, ᑮ ᓈᒋᐸᐁᐤ ᒫᑲ: ᐃᔅᐱ ᒫᑲ ᐎᐋᐸᒫᒋᒃ ᑭᒋ ᓇᑐᐸᓕᐎᑭᒫᐗ ᓀᔥᑕ ᐅᓇᑐᐸᓕᐗ, ᑮ ᐳᓂ ᐅᑖᒪᐌᐗᒃ ᐹᓚ᙮ 33ᐁᑯ ᑭᒋ ᓇᑐᐸᓕᐎᑭᒪᐤ ᐱᐁᒋ ᐃᑐᑌᑦ, ᓀᔥᑕ ᑮ ᐅᑎᓀᐤ, ᓀᔥᑕ ᑮ ᐃᑕᔓᐌᐤ ᓂᔓ ᐱᐙᐱᔅᑴᔮᐱᔭ ᑭᒋ ᐅᒋ ᒫᒪᒋᒀᐱᓱᓕᒋ; ᑮ ᑲᑴᒋᑫᒧ ᒫᑲ ᐊᐌᓇ ᐁ ᐋᐎᓕᒋ ᓀᔥᑕ ᑫᒀᓕᐤ ᑳ ᑮ ᑐᑕᒥᓕᒋ᙮ 34ᐋᑎᑦ ᒫᑲ ᐯᔭᒃ ᑫᒀᓐ ᑮ ᐃᔑ ᑌᐺᐗᒃ, ᐋᑎᑦ ᒫᑲ ᐱᑐᔥ ᑫᒀᓐ, ᒣᑴᔭᔥ ᒥᔭᒪᐎᒥᒉᑎᓕᒋ ᐃᓕᓕᐗ; ᐃᔅᐱ ᒫᑲ ᐁᑳ ᐁ ᑫᒋᓈᔦᓕᑕᒃ ᐌᒋ ᑮᔥᑴᔦᓕᑖᑯᓯᓈᓂᐗᓂᓕᒃ, ᑮ ᐃᑕᔓᐌᐤ ᓇᑐᐸᓕᐎᑲᒥᑯᒃ ᑭᒋ ᐃᑐᑕᐋᑲᓂᐎᓕᒋ᙮ 35ᐃᔅᐱ ᒫᑲ ᐱᐁᒋ ᓵᑲᒋᐌᑦ, ᑮ ᐃᑭᓄᑯᐸᓐ, ᐁ ᑮ ᐱᒥᐎᓕᑯᑦ ᐅᓇᑐᐸᓕᐗ ᑳ ᐃᔅᐱᒋ ᐋᑯᓚᐌᓯᓕᒋ ᐃᓕᓕᐗ᙮ 36ᐌᓴ ᒥᔮᒪᐎᒥᒉᑎᒋᒃ ᐃᓕᓕᐗᒃ ᑮ ᓄᔅᐱᓇᔑᐌᐗᒃ, ᐁ ᑌᐺᒋᒃ, ᑭᑐᑖᔾ᙮
ᐹᓪ ᓈᑕᒫᓱ
37ᒣᒀᒡ ᒫᑲ ᐹᓪ ᑳ ᐃᑐᑕᐋᑲᓂᐎᑦ ᓇᑐᐸᓕᐎᑲᒥᑯᒃ, ᑮ ᐃᑌᐤ ᑭᒋ ᓇᑐᐸᓕᐎᑭᒫᐗ, ᑭ ᑳ ᐋᔭᒥᐃᑎᓐ ᓈ?
ᐁᐗᑯ ᑳ ᐃᑗᑦ, ᒃᕇᒃ ᐃᔑᑭᔗᐎᓂᒃ ᓈ ᑭ ᑮ ᐋᔭᒥᓐ? 38ᓇᒪ ᓈ ᑭᓚ ᐊᓇ ᐃᒋᑉᑦ ᐃᓕᓕᐤ, ᐊᓇ ᓕᒧᔑ ᐅᐅ ᑭᔑᑳᐗ ᑳ ᑮ ᒥᑯᔥᑳᒋᐃᑫᑦ, ᓀᔥᑕ ᑳ ᑮ ᐃᑐᑕᐋᑦ ᓀᐗᐤ ᑭᒋᒥᑖᑐᒥᑕᓇᐤ ᐃᓕᓕᐗ ᑳ ᑮ ᓂᐹᔨᐌᔅᑭᓕᒋ?
39ᒫᑲ ᐹᓪ ᑮ ᐃᑗᐤ, ᓂᓚ ᓂᑦ ᐃᓕᓕᐎᓐ ᐁ ᒎᐎᔮᓐ ᑖᕐᓴᓯᒃ ᐁ ᐅᒋᔮᓐ, ᐃᑖᐎᓐ ᓯᓕᓯᔭᐃᒃ, ᐁ ᐃᑖᐎᓂᐎᓕᓕᐎᔮᓐ ᐁᑳ ᐁ ᐋᐱᔅᑌᓕᑖᑾᒃ ᐃᑖᐎᓐ ᐅᒋ: ᑭ ᐸᑯᓭᓕᒥᑎᓐ ᒫᑲ, ᐃᓕᓈᐎᓐ ᑭᒋ ᐋᔭᒥᐊᑭᒃ ᐃᓕᓕᐗᒃ᙮
40ᐃᔅᐱ ᒫᑲ ᑳ ᑮ ᓇᔅᑯᒥᑯᑦ, ᐹᓪ ᑮ ᓂᐸᐎᐤ ᓵᑲᒋᐌᓈᓂᒃ, ᓀᔥᑕ ᑮ ᐙᔅᑎᒋᒉᓄᔅᑕᐌᐤ ᐃᓕᓕᐗ, ᐃᔅᐱ ᒫᑲ ᒥᑐᓂ ᑫᐱᑐᐌᓕᒋ, ᐦᐃᐹᕉ ᐃᔑᑭᔗᐎᓂᒃ ᑮ ᐋᔭᒥᐁᐤ, ᐁ ᐃᑗᑦ᙮
Currently Selected:
ᐊᐸᔅᑕᓚᒃ 21: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
